Garda

GARDA
Popolassión: 4.092 Altessa: 67 metri sóra el livèl del mar
Superfice: 14,37 chilometri quadri Comùni confinanti: Bardolìn, Costermàn, Tóri del Bènàco.
 
Garda, splendido comùn che se specia ne le aque de l'òmonimo lago, posissionà in un gran golfo che scominciando a sud da le contrà de Bardolìn el finisse a nord con Ponta San Vigilio. El Teritorio l'è çircondà da una corona de coline e serà ne la parte meridional da la Roca mentre ne la parte setentrionàl dal Monte Lupia. Le origini de Garda jè molto antiche come ne pól testimoniàr i ritrovamenti de epoca preistorica ai piè de la Roca come i resti de un vilàio su palafite, çeramiche e bronsi, mentre ne la località Sabionara i è stà catadi tòcheti de çeramiche de l'età del Bronso e in via San Bernardo disnove tombe ànca queste de l'età del brónso, con vasi, piati, bronsi e ossi laoràdi. De gran interesse jè le "incisioni rupestri" del Monte Lupia con più de 4000 ani de storia. ànca i Romani jè passadi da Garda basta vardar la disposission del çentro storico secondo i classici criteri imperiali, el cippus funerario che se cata in Piassal Roma e varie lapidi che ne prova l'esistensa de un antico vilàio romàn. A causa de numaròse invasioni in epoca Barbarica el paese l'éra deventado un pónto molto importante nel sistema difensivo de la parte inferiore del lago contro i eserciti che i vegnéa da le Alpi. El nome Garda el deriva probabilmente dal Longobardo Warda, (gh'è ci dise ànca dal tedesco Warte) che vól dir guardia, come podarìa èssar stà nel caso de la Roca. Nel corso dei secoli sucessivi questa costrussión l'éra dal pónto de vista strategico-militàr molto importante. El primo documento 'ndóe gh'è scrito el nome de Garda l'è del 712 a.C., ai tempi de Liutprando, re longobardo, che ne parla del "teritorio gardense". Sóto el dominio dei Franchi (774-888) Garda l'è restà autonoma e 'l so feudatario el stava ne la Roca aministrando el teritorio. De l'epoca medievàl l'è famosa la storia de la Regina Adelaide de Borgogna, imprisonada ne la Roca da Berengario Duca de Ivrea che'l vólea obligarla a sposàr el fiól Alberto. Grassie a l'aiuto de un frate l'éra riussida a taiàr la corda deventando moiér de Ottone I che par vendicarla la butà zò la Roca.

..."Da ti, Garda, el lago el spina
le memorie vèce e intate....
L'éra tua quèla regina,
ch'è scapà vestì da frate
col rosario atorno al col"... (Berto Barbarani poesia "Garda")

In epoca comunàl, el nobile veronese Turrisendo dei Turrisendi, l'éra riussido ne l'impresa de resistar par oltre un ano a Federico Barbarossa (1162) sempre da l'interno de questa fortessa mentre j è stà manco fortunadi i scaligeri, sconfiti nel 1387 dai Visconti. E pròpio sóto el dominio scaligero, Garda faséa parte de la "Gardesana del'Aqua", federassión de diese comuni (Malsésen, Brensón, Pai, Tóri, Albisàn, Garda, Costermàn, Bardolìn, Sisàn e Lasise) che la gavéa compiti de repressión e de ripartissión dei oneri fiscali oltre a una larga autonomia (con a capo el "Capitan del Lago" che dovarìa avér abità par qualche tempo nel Palasso dei Capitani difronte al porto), riconossuda ànca da i dominadori sucessivi come i Visconti (1387), i Da Carrara (1404) e la Republica de Venesia fin al 1802. Nel 1452 nasse la "Corporassion dei Antichi Originari", composta da le faméje originarie da Garda e relativi eredi con diriti su la pesca ne le aque del lago. Nel 1508 da segnalàr el passàio dei soldà Venessiani e quei dei Stati de la "Lega de Cambrai" mentre i Lansichenechi direti verso Roma dopo èssar passadi nel 1526 iè vegnudi ancora da ste parti nel 1630 portando la peste. Dal 1797 i s'a alternado domini austriaçi e francesi par un pochi de ani, par finìr in mane austriache fin al 1866 prima de passàr sóto el Regno d'Italia. Da visitàr, uno dei posti piassè bei del Lago, Ponta San Vigilio con la splendida Vila Guarienti costruida nel çinquesento par l'umanista Agostino Brenzone su disegno del Sanmicheli, la céseta dedicada a San Gioàni Nepomuceno, la storica locanda, el portesel e la Baia de le Sirene.garda El tuto visitado da Maria Luigia duchessa de Parma, nel 1816, l'imperadór Alessandro de Russia, nel 1822, el re de Napoli, nel 1823, Winston Churchill, Laurence Olivier e Vivien Leigh, el prinçipe Carlo d'Inghiltera. Se Ve piase far quatro passi a piè, consiliemo (partendo da la cèsa parochiàl) de far 'na visita a le do çime de la Roca de Garda, 'ndóe da la prima se pól amiràr el paese da l'alto e su la seconda gh'è l'Eremo dei Camaldolesi costruido dai frati de San Romualdo con a l'interno conservà una pala del pitór Palma "El Zoeno" che rafigura el santo protetór e un San Giorgio de Gioàni Tedeschi. A Garda val la 'pena'édar la Vila Carlotti, vissin a la tór civica che la finisse in un edificio "la lòsa" costruido su disegno del Sanmicheli; el Palasso Fregoso costruido nel '500 da un condotièr genovese in esilio; Vila Albertini e la vissina cèsa de San Carlo Borromeo i éra de propietà dei nobili Becelli de Costermàn e dopo èssar passà in man ai conti Degli Albertini nel '700, l'è deventà famosa par avér ospitado par qualche giorno Re Carlo Alberto (durante la prima guera de indipendensa nel dugno 1848), che l'à fato firmar ai lombardi la sótomission al Piemonte. Molto belo l'è el parco con statue, fontane, tórete; tra Garda e San Vigilio gh'è Vila Carlotti-Canossa de l'800 con drénto un bèl poche de opere d'arte. Val la 'pena far una visita a la Césa parochiàl de Santa Maria Sunta costruida ne la forma atuàl nel '500, zontàndoghe el campanìl nel 1571 con murà un angelo de epoca longobarda, mentre la parte piassè antica l'è composta da la canonica e dal ciòstro con un tochetin de ciborio longobardo. Drénto gh'è un bèl altàr de San Luigi del Palma, 'na pala de l'Anunziada del Paglia e n'antico afresco in sagrestia. Da segnalàr ànca altre cése del paese come quèla de San Stefano che conserva un importante "martirio" del Farinati e quèla de San Bernardo del XIV secolo. Se Ve piase "tradisioo" e folclor, beh, alora no podì mancàr a l'anuàl Pal del Vo', 'ndóe i pescadori con le barche piéne de reti e seguidi da altre imbarcassiòni i speta el passàio dei banchi de sardele par dopo magnarle durante la famosa "Sardelada al Pal del Vò", frisendole e spiansandole col vin. A questa tradissión no l'à vóludo mancàr gnanca Federico III nel 1489, che da sóra una galea de la republica venessiana, el s'à godù a pescar. De antica tradissión l'è ànca la "gara de le bisse", 'ndóe quatro remadori in piè su ogni imbarcassión de origine venessiana, provenienti da le varie località lacustri, i se sfida ne le aque del Garda.


Pin It