Gressana

GRESSANA (Grezzana)
Popolassión: 10.788 Altessa: 169 metri sóra el livèl del mar
Superfice: 49,49 chilometri quadri Comùni confinanti: Verona, Negràr, Sèro Veronese, Sant'Ana d'Alfaedo, Arbedo, Boscocesanoa, Roarè Veronese.
 
Importante comùn de la Valpantena a pochi chilometri da Verona con le frassioni prinçipali Stalavena, Lugo, Sago (Azzago), Sénàgo (Alcenago), Rosaro e Romagnàn. El Teritorio de Gressana l'è stà frequentado fin dal Paleolitico inferior da l'Hòmo Erectus comparso circa tri milioni de ani fa. Numaròsi reperti jè stà catadi a tal proposito in Lessinia e ne la zona de Gressana come i strumenti litici recuperadi a Monte Gazzo e Lotrago. L'òmo del Paleolitico Medio, inveçe, l'à frequentà bèn 'sto teritorio come documentado dai reperti archeologici de Zovo, Croseta, del Vajo Troto e del Riparo Tagliente (Coal de le Tessare) che l'à ciapà el nome da un sior che l'à scoèrto 'sto lógo nel 1962 de l'Hòmo neanderthalensis. Resti de un pochi de çentri abitadi del periodo Eneolitico jè stà catadi a Belori, Sago, Magnavaca nel Vaio del Paradiso, Monte Cuco (m.461 a sud - est de Sago), Casale de sóto (m.633), Dosso de Casàl (m.701), Monte S. Viola (m.858) e in località Borgo de Gressana. Del Bronso medio e tardo jè inveçe i reperti catadi a la Roca sóra Lugo a m.653 come piati e vasi biconiçi dei secoli XV-Xlll a.C.; A Bellori, ne la zona de confluensa del Vaio de l'Anguila con el Progno de Valpantena jè stà catade scudèle e vasi; Al Dosso Magnavaca jè stà catadi ànca material litico e ceramico; a Ca' Nova dei Casoti (m. 575) jè stà scoèrte do fondi de capane, vasi ovoidali e biconici, scudèle. Questi lóghi abitadi i par 'bandoné nel I secolo a.C., forse a causa de un intervento armà dei Romani. A Gressana numaròse jè ànca le testimonianse romane catade; nel 1860 dei bei tochi gressana arvedide pièra incurvà 'arènte la cèsa; nel 1886 do tombe romane; la fonte batesimal de la Parochial ricavà da un cippus romàn. Se pensa adiritura che la base del so campanìl el sia stà in origine una tór romana. Par 'sto motivo no l'è impossibile pensàr che'l nome de Gressana el g'àbia 'ste origini; s'à pensà a un tempio dedicà a le Grazie o dal nome de 'na persona Graecius o Gratianus forse propietaria de un pochi de teréni ne la zona. A Romagnàn dal latin Romanius, jè sta rinvegnude de le luserne e do iscrissiòni romane. El nome de Lumiàgo forse deriva da "Aemilius" più suf. -ACU, Lotràgo da "lotterius" più -ACU, Sago dal nome del patrissio "Attius", Lugo da Lucus (bosco) e Stalavena da "stallum avenis", parchè gh'éra la stassión de posta par el cambio dei cavài e dei bò' che i tirava i careti. La prima testimoniansa scrita del paese de Gressana l'è del X secolo ànca se catémo 'na "plebem S.Martini de Gratiana" in un documento datado 839 'ndóe el Vescovo Ratoldo el passa la pieve al diacono Audone. La stessa pieve l'è ricordà ne la bóla papàl de Eugenio III nel 1145. In 'sto periodo Gressana l'éra feudo del Capitolo dei Canonici de la Catedral de Verona e sicuramente gh'éra ànca un castèl. Piassé tardi jè 'rivà i Scaligeri che i l'à inserida nel "Capitanado de la Montagna", mentre sóto i Venessiani a l'inissio del '400 l'è stà spartìa da le faméje Oliboni, Alegri, Malaspina, Farinati e Giusti. ànca le frassioni jè piéne de storia: Sago l'è ricordà nei documenti del 988 e del 996 da Ottone III 'ndóe se parla dei possedimenti de l'Abassìa de San Zén "in vico Azzago" e nel 1145 da Eugenio III; stessa bóla papàl ànca par Sénàgo "Curtem Alcenagi". Ne la cèsa parochiàl del '400 de San Clemente ghe una lapide che la ne ricorda de 'na capela dedicada al santo ne l'XI secolo; altri possedimenti de San Zén i vien confermadi da Federico I nel 1163 ne la zona de Lugo de Valpantena. La cèsa parochiàl del '700 atuàl dedicada a S.Apolinare Martire l'è stà rimessa a posto par bèn, no molto tempo fa ma conservando el batistero del 1440 e 'l campanìl romanico; ànca Romagnàn l'éra in possesso de l' Abassìa de San Zén su concessión de Otone I nel 967, a l'epoca l'éra un "castrum" abità dai "Herimani" òmini libari. Da sótolineàr che ne la cèsa parochiàl, pieve dedicà a Santa Maria de origine romanica, conserva ànca un bèl coro ligneo del '400 intajà e una pala del Brusasorzi. Nel teritorio da visitàr jè assolutamente le vile, tra le più importanti e tra le più grandiosi del veronese gh'è Vila Arvedi del '600 a Cussan (Cuzzano) con decorassioni, afreschi un bèl giardìn a l'italiana e un l'oratorio dedicà a San Carlo; Vila Pavarana del XV secolo che la se cata sul coston del monte de 'Sago, caraterisada da porteghi e colone oltre a la capela de la Madona del Rosario; Vila Pelegrini conossuda come "El Serbaro", da le forme venete con parco e relative fontane la presenta ànca una capela dedicà a San Francesco Savério; Vila Cometti-Giusti del '500 con afreschi del '700 a Gressana e parco costruido dai Bevilaqua de Lasise; a Stalavena Vila Cologne con pòrtego, colombare e un bèl parco con oratorio. Da visitàr par ci ghe piase le curiosità l'è la tór del Falasco sóra località Cologne, utilisado anticamente come rifugio e lógo de contról par passàr ne l'alta val ma sóratùto base dei banditi, composto da un riparo e 'na costrussión in tufo; el carateristico molin de Belori; el forte militàr costruido nel 1905 sul Monte Santa Viola. Foto: Vila Arvedi