Isola Rissa

ISOLA RISSA, RIZA (Isola Rizza)
Popolassión: 3.266 Altessa: 23 metri sóra el livèl del mar
Superfice: 16,68 chilometri quadri Comùni confinanti: Opeàn, Rociàra, Ronco al'Àdese, Boolón, San Piéro de Morubio.

Comùn de la Bassa Veronese a 26 km sud-est da Verona posissionà ne la campagna tra el Menago e l'Àdese con a sud el Bussè e travérsà dal Piganzo. L'òmo l'è presente in 'sto teritorio fin da l'antichità come pól testimoniàr i reperti de la çiviltà Paleoveneta ne l'Età del Fer de çirca 3000 ani fa (X-IX sec. a.C.) scoerti in località Pieve nel 1949. Del VI secolo a.C. l'è inveçe el vaso etrusco in brónso catà sempre in 'sto teritorio mentre del III secolo a.C. l'è la necropoli Galica con piassé de 100 tombe oltre a monéde, scudèle e vasi in località Casalandri. Nel 1733 sóto la pavimentassión de la cèsa parochiàl, l'è stà catà na scrita su pièra del periodo romàn I sec. a.C. de tipo funebre, dedicà a M. Ladavonius e a so moiér Sempronia Prima, mentre in località Mandella nel 1909 un anfora e 'na monéda sempre del stesso periodo. Secondo i studiosi el nome originario de Isola Rissa in tardo-latin l'éra Insula Porcaritia: Insula pól indicar un toco de tera suto tra boschi e paludi mentre ne l'etimologia, la parola Porcaritia ne indica 'na zona agricola, 'na propietà usà par arlevàr le bestie, in 'sto caso "porsei". Altri studiosi i ne dise che el nome podarìa derivàr da Isola del Canal Richenza: "porca" col significà de canàl e "Ritia" forma modificà de "Richentia", el nome de la regina moiér de Lotaro re de Germania, d'Italia e imperadór dal 1133 al 1137, che con el so esercito l'à sponsà pròpio da 'ste parti, dispensando diplomi e calmando le beghe, mentre Richenza l'avarìa contribuì coi schèi par el scavo del canàl. L'ultima version etimologica l'è dialetal, dal veronese "porcorizzo". Ma el nome nel 1872 su decisión dei abitanti l'è cambià da Isola Porcarizza in Isola Rizza (vr. Rissa) mentre el stema comunàl co' la roia (scrofa) con in boca un massolìn de spighe de riso l'è ricomparso nel 1932 dopo avérlo cavà. Secondo 'na legenda, in epoca Longobarda, nel 573 la regina Rosmunda dopo avér copà el re Alboin l'è scapà col tesoro real insieme con Elmichi da Verona in diressión Ravena, sponsadose un poco ne l'antica dogana de Isola prima de ripartir in barca su l'Àdese. El "Tesoreto de Alboin" l'è stà catà nel 1872 composto da tredese pressiosi de oro e argento. Del VIII secolo l'è l'origine del primo çentro abità e de la prima cèsa de Isola Rissa dedicà ai Santi Fermo e Rustico arènte a la via romana Magna (deventà strada Regia Postal e col tempo "la Napoleónica"); la pieve l'è ricordà ne la bóla de Papa Eugenio III nel 1145 come "Plebem Insulae Porchariciae, cum capellis, et decimis, et curte". Nel XI secolo Isola Rissa l'éra tra i possedimenti dei Vescovi de Verona e sóto i Scaligeri l'éra ne la giurisdissión de Zevio. Nel 1403 Caterina Visconti moiér de Gian Galeasso l'avéa restituì al Comùn de Verona con "motu pròpio" 19 vicariadi compreso quél de Insula Porcaritia, composto da sete "vile": Insula Porcaritia, Ruperclaria Caselarum, Ruperclaria Fonzane, Ruperclaria Sancti Petri (Roverchiara), Tomba, Opedanum, Palus. Nel 1405 Isola Rissa l'è passà a la Serenissima e nel periodo Venessian s'à 'isto grandi opere de bonifica, l'aumento de la popolassión e del comercio; cossita l'è stà sgrandà la "Napoleónica", la strada che la va da Legnago a Verona e pròpio lóngo 'sta via l'è nato l'atuàl çentro abità e la cèsa de Santa Maria de la Piassa a la fin del '400, un tempo in man oltre ai paroci, a le confraternite de la Compagnia del Rosario e de la Scóla de Santa Crose fin a l'inissio del '900.....beghe comprese. A l'inissio del XVI secolo a causa de la peste e de varie malatie portà dai soldà de la Lega de Cambrai la popolassión la s'à dimesà e con la sconfita venessiana ne la batàja de Agnadello el paese l'è stà messo sóto sóra, tanto che, nel 1817 durante 'n ispession, un Vicario venessiàn el scrivea a Venessia che “Ixola Porcarezza, quàl'éra belisima villa, adeso è ruinata”. Nel 1653 i risultava paróni dei piassé importanti fondi de la "villa" le faméje dei: Miniscalchi, Sagramoso, Conti San Bonifacio, Maffei, Auricalco (Recalchi), Martelli, Morando, Da Còmo, Mandelli. In 'sto periodo fra Isola Rissa e Tomba gh'éra bèn 300 campi a risare. Nel XVII secolo, altro giro de peste e contadini ritornà ne la miseria mentre el Vicario ghe tocava contrólàr bestie e persone infetade. A la fin del XVIII secolo con l'arivo dei francesi le cose no jè andà al mejo, Isola l'è stà messa sóto sóra, campagne e vile comprese, e durante la batàja de Ronco e Àrcole nel noémbre 1796 Messena e i so soldà i s'à campà pròpio da 'ste parti. Pochi ani dopo con i austriaçi le cose le andava mejo e a parte qualche insuression Isola Rissa nel 1866 l'è deventà Italiana. Da segnalàr la cèsa parochiàl dedicà ai Santi Piéro e Paolo ricostruida nel 1535 da l'Arciprete Oricalco e modificada ne la forma atuàl nel '800, gh'è conservà 'na tela de Sante Prunati con rafigurà la Madona coi Santi Piéro e Gerolamo. Tra le vile da segnalàr Vila Bonanome arènte la cèsa parochiàl 'ndóe l'à fato visita Napoleón, Vila Sagramoso-Buri del '400 e 'l Palasso del Muniçipio, zà Vila Tedeschi e Polettini, el conserva nel gran salon l'afrescà "La finta malà" del pitór Faretto (1849-1887).