Lavagno

LAVAGNO
Popolassión: 8.435 Altessa: 67 metri sóra el livèl del mar
Superfice: 14,64 chilometri quadri Comùni confinanti: Ilasi, Caldier, San Martìn Bonalbergo, Messane de Sóto, Colognola, Zevio.

Comùne che'l se cata a l'inissio de la Val de Messane tra pianura e coline, composto da le frassioni San Brissio, San Piéro (l'atuàl sede municipal) e Vago. La zona l'è stà abità fin da la preistoria come ne pól testimoniàr i resti de un vilàio de la çiviltà Atestina (VII-VI secolo a.C.) catadi arènte al forte ne la frassión de San Brissio e 'l "Castèlar" de Lepia de l'età del brónso a sud del teritorio comunàl. De 'na çerta importansa jè i reperti de l'Epoca Romana come la scrita rinvegnuda ne la canonica a San Piéro nel 1766 de la Gens Valeria o el sepolcreto con monéde de Costantin e tochi de muri e pavimentassióni a Vago o altre curiosità romane a San Brissio. A Vago i dise che passasse l'antica Via Postumia lóngo l'atuàl strada statàl 11 e probabilmente in quél' epoca sul Monte Grigliano gh'éra una fortessa de contról su la pianura come ne pól testimoniàr i numarosi reperti. L'origine del nome Lavagno no l'è sicura, ghe ci dise che possa derivàr da la parola latina "labes" frana; da la voçe "lava" riferendose a la presensa de un vulcan sul col de San Brissio; da un nome latin de un çerto "Lavanium"; probabile l'origine retica "Lavaniu" e no romana del nome. In epoca romana, comunque, la Via Postumia l'à separà e definido du çentri "Lavaneus ad Montem" in colina e "Lavaneus ad Planum" ne la campagna. Tra i primi documenti scriti su Lavagno g'avémo quél del 1035 'ndóe el Vescovo de Verona Gioàni, g'à lassà al monastero de San Nazàr i teritori Lavanei, Maximagi, Mezanarum o quél che ne parla del Vicus e del Castrum che Corado II el g'à dà al Vescovo de Verona mantegnendoli par du secoli e andà in man in ordine de tempo de Scaligeri, Visconti e Venessiani. Un altra donassión del 1103 la parla de la cèsa de San Martìn constructa in vico Lavaneo. bisògna tegnér conto parò che a l'epoca la località Lavagno vegnéa identificà con l'atuàl San Brissio el piassé antico çentro del comun e sede de l'antica pieve. La località San Brissio italianisà malamente in San Briccio, l'è stà ciamà cossita dopo la costrussión de la pieve romanica de San Brizio de Tours. Storicamente in epoca medioval l'abitado de San Brissio el gavéa ne la propia giurisdissión Marcelise e San Martìn bòn Albergo. La vècia cèsa de l'ano mile, de 'sta frassión de Lavagno, l'éra stà costruida sóra al col 'ndóe 'desso gh'è el forte militàr. De una çerta importansa l'è l'antico monastero de San Giuliano de Lepia del XII secolo che l'à ospitado el papa Lucio III, e la cèsa de San Giacòmo del Griglian simbolo del teritorio de Lavagno 'ndóe secondo tradissión, jè stà rinvegnudi i resti mortali de l' Apostolo Giacòmo 'ndóe 'na olta gh'éra 'na Capela. Infati l'an dopo, nel 1396, el Comùn de Verona che g'avéa tra le propietà dei teréni in 'sta zona, l'à fato costruìr el Santuario. Realisada in stile romanico-gotico su disegno de Nicolò da Ferara l'è stà sgrandà e finida nel '400 e nel '500 dai monaci Olivetani, conserva magnifiçi afreschi del '400 de la Scóla de l'Altichiero e de Martìn da Verona. Tra le cése da segnalàr quèla de la frassión S.Brissio ricostruida nel 1885 su disegno de Don Gottardi, drénto conserva 'na pala del '500 del Giolfino; la cèsa de San Piéro in stile neoclassico l'è stà costruida nel 1821 e drénto la conserva altàri del XVI secolo, e na pala de Gioàni Caliari; in stile neoclassico l'è ànca la parochiàl del Vago finida nel 1847 e parochia dal 1899. Tra le vile, da segnalàr la piassé importante, Vila Verità (dopo Montanari, Grassi e Fraccaroli), conossuda col nome de Vila del Boscheto, costruida par Girolamo Verità dal "Sanmicheliano" Dòminico Curtoni con statute, giardini, fontane e pescheria sensa desméntegàrse che drénto jè conservadi afrschi de Filippino Maccari e Giorgio Anselmi; Vila Contarini del '700 con vial albarado e Capela de San Nicola da Tolentino; in località Montesei (Monticelli) Vila Castèlli conossuda come San Roco, con bèl parco e 'na Capela; Vila Castèllani del '700 in contrà Fontana, con barchesse, colombare e Capela; Vila Gelmi del '700; Vila Rensi in çentro a San Piéro de fine '700; Vila da Porto del '700 con bèl parco. Lavagno al dì de ancò se presenta come un çentro agricolo con una bòna coltivassión de çereali e uva sensa contàr de l'importante produssion de vin e de numaròse atività artigianali e industriali.


Pin It