Legnago

LEGNAGO
Popolassión: 25.351 Altessa: 16 metri sóra el livèl del mar
Superfice: 79,27 chilometri quadri Comùni confinanti: Boschi Sant'Ana, Minerbe, Bonaigo, Angiari, Zerèa, VilaBartolomea, Terazo, Castèlnóvo Bariano RO, Bergantin RO
 
El comune piassé grando de la provincia veronese dopo Verona, el g'a come frassioni Canove, Porto, S.Piéro, S.Vito, Teranegra, Toreta, Vangadiza, Vigo e se cata a 40 km da la nostra çità ne la Bassa Veronese. Numarosi reperti preistoriçi catadi ne la zona pól farne capir l'importansa storica de 'sto comun fin da l'antichità, come tochi de palafite, necropoli e reperti de l'età del brónso, sensa contàr quei de epoca romana come lapidi, tombe, tochi de strade e case, tegnendo conto che Legnago l'éra un importante çentro romàn conossù come "Forum Allieni". Legnago ciamà nei secoli ànca "Lemniacus" e "Lignago", ne le varie epoche storiche l'è stà 'na ecessional fortessa militàr, partendo da l'Epoca Barbarica, passando dal Dominio Vescovile ai domini del Comùne veronese, dei Scaligeri, dei Visconti, dei Carraresi, dei Venessiani, dei Francesi e par finìr Austriaçi. In epoca longobarda Legnago l'è deventà el lógo dei "Arimanni" òmeni libari e grassie a 'n documento del 932 se sente parlar del paese con el nome de "Castèl" infati in quél tempo Legnago l'éra una roca fortificada de forma quadrangolàr con quatro tóri bele grande. Nel 1184 Federico Barbarossa el g'à consegnà ne le mane del Vescovo de Verona Ognibene dopo la paçe de Costansa, la roca, che l'è entrà cossita a far parte dei numarosi beni dei vescovili ne la zona. Nel 1207 se vede la cession de Legnago da parte dei Vescovi al Comùne de Verona, in cambio de la giurisdissión de Monteforte. Nel 1307 dopo Legnago ànca Porto con la so Roca l'è stà crompà da Verona. Legnago vista la so posission strategica g'a sempre fato gola a tanti e nel 1230 i Padovani dopo avér conquistà e butà zò Porto i gà riservà el stesso tratamento a Legnago mentre nel 1232 i Legnaghesi i s'à ciapà la Roca de Porto. Poco tempo dopo s'a fato vivo ànca Eselìn da Romàn ma Legnago dopo avér resistido, s'à consegnà ne le mane de Azzo d'Este nel 1256. Padova l'éra aleada con la potente faméja dei Sambonifacio par conquistàr Verona, fatalità Legnago s'a catà justo justo in mèso a 'ste do realtà, cossita da 'ste parti l'è passà ànca el Conte de Sambonifacio che parò 'isto el spirito indipendente che l'a caraterisà i legnaghesi nei secoli, l'è stà butà fora dal paese. Sóto Mastino I de la Scala, un çerto Pulcinela de le Carceri con un grupo de dissidenti l'è andà a la conquista dei castèi de Legnago, Vilafranca e Soave ma grassie a Gherardino da Pisa che'l guidava le trupe Scaligere, nel 1270 Legnago l'è deventà dei De la Scala. Sóto Alberto De la Scala l'è deventà un importante çentro comerciàl de smistamento merci con Venesia travérso l'Àdese e cossita l'è stà costruida una bèla tór a guardia de l'Àdese de fronte a le roche de Legnago e Porto, 'ndóe nel 1387, Antonio de la Scala el s'a rifugià durante la so fuga verso Venessia, dopo èssar stà butà fora da Verona da Gian Galeazzo Visconti nei i ultimi momenti de vita de la signoria Scaligera. Grassie a la fedeltà dei Legnaghesi ai Visconti contro i Scaligeri, Gian Galeazzo el g'à concesso una bòna autonomia a Legnago con el "Privilegium", dandoghe la possibilità ai legnaghesi de farse un Statuto, de nominar dei propi magistradi e de giudicar ogni causa civil e penal; privilegi confermadi dai Venessiadi nel 1406. Nel 1405 parò, solo Porto l'éra stà conquistà dai Venessiani mentre Legnago s'à consegnà un par de mesi dopo a la Serenissima dimandando la conferma del Privilegio, concesso nel 1406 dal Doge Steno. Nel 1438 Legnago l'è passà ne le mane dei Milanesi fin al 1440 quando l'è ripassà ai Venessiani. Nel '500 l'è stà la 'òlta de la Guera de Cambrai 'isto che Legnago l'éra uno dei çentri de una çerta r importansa strategica; cossita la fortessa legnaghese l'à cambià parón un fraco de 'olte, da l'imperadór Massimilian, ai spagnoli e ai francesi par ritornàr ai venessiani nel 1516 dopo nove ani. Le roche i éra talmente messe mal che 'l Senato Venessian l'à preferido lassarle al so destin e nel 1517 Venessia l'à riconfermà i vèci privilegi fasendo riscrìvar i statuti e dando cossita la piéna autonomia a Legnago destacandola da Verona. Diese ani dopo s'a scomincià a costruìr de le nove fortificassioni con grandi opere a cura del Pignatello e de Michele Sanmicheli fasendo deventàr Legnago una de le fortesse piassé importanti su la teraferma de la Republica Venessiana. Nel XVI secolo dopo avér ricostruido le case e avér risistemà el çentro devastà da le guere, s'a scomincià a sfrutàr da nóvo la via comerciàl fluviàl de l'Àdese e a introdur le coltivassioni del riso e del formento. Dopo el periodo Venessian s'à alternà el dominio francese a quél austriaco e dal 1828 al 1855 jè stà restaurade, rinforsade e ricostruide le vèce fortificassioni sóto l'Austria. Legnago con Verona, Mantoa e Peschiera l'éra in 'sto periodo una de le çità dellegnago teatro salieri "Quadrilatero" un insieme de fortesse con grande strutura difensiva. Nel 1866 Legnago l'è passà sóto a l'Italia e nel 1868 e nel 1882 le piéne de l'Àdese i a spacà fora tuto, case e 'l ponte in legno sostituido da uno in fero nel 1889 mentre nel 1888 tute le fortificassioni venessiane e austriache i è stà butà zò no lassando quasi gnente de 'ste opere. De la potensa militàr de Legnago gh'è restà solo uno dei torioni de la roca arènte al Duòmo dedicà a San Martìn Vescovo inissià nel 1779 e finida nel 1811. La cèsa de la Dissiplina inveçe l'è stà ricostruida al posto de un tempio del '300 e la conserva un dipinto del XIV secolo importantissimo par Legnago, 'na Madona con Butìn conossuda ànca come Maria de la Misericordia. A S.Piéro de Legnago da visitàr, la magnifica cèsa romanica de San Salvar che come ne dise 'n iscrission del 1127 l'è stà costruida par vólontà de Matilde de Canossa, sui resti de 'na costrussión romana; drénto se pól 'édar i afreschi del Dal Pozzo del XVI secolo e na 'tòla con rafigurà la Madona. A Vangadiza la cèsa dedicà a la Natività de Maria sede fin dal X secolo de la potente Abazia dei Camaldolesi, l'è stà sgrandà col passàr dei ani e la presenta drénto le opere del Ridolfi e del Farinati. Da visitàr assolutamente l'è el Museo Fioroni de Legnago con 'na bòna colessión de armi da l'alto medioevo ai giorni nostri, l'Archivio Storico de Legnago e 'na biblioteca publica, mentre nel Museo Archeologico ghe lì arènte, se pól catàr i reperti dei scavi fati ne la Bassa Veronese da l'epoca preistorica. Da segnalàr le vile de San Piéro de Legnago: Parma-Lavezzola del '500, Vila Rossato del 1695 con quatro torete e un bèl parco a l'italiana, Vila Corrubbio con tór e merladura ghibelina oltre a un bèl parco, Vila Giazara del '700 con balcon in stil baroco e capitei corinzi, Vila Moratello/La Ponzina con tór medievàl del '400; Vila Mezane conossuda fin dal 1368 a San Piéro. Altre vile: Pompei con tór e costrussión del '500 a Vangadiza; Vila Zerbinato/I Santi abitada a partir dal 1750 da la faméja Giannella a Porto de Legnago; Vila Bertassello in località Albèro, casa colonica a corte con rùsteghi; Vila La Piopa del 1696 a Porto de Legnago; Tra le persone famose gh'è de sicuro el grande Antonio Salieri (1750-1825) compositor a la Corte Imperiàl de Vienna, tanto famoso al pónto che, el teatro del comun el porta el so nome.