Messàne

MESSANE DE SOTO (Mezzane di sotto)
Popolassión: 2519 Altessa: 122 metri sóra el livèl del mar
Superfice: 19,71 chilometri quadri Comùni confinanti: Verona, Ilasi, Lavagno, San Martìn Bonalbergo, Tregnago.
 
Tra la Val Squaranto e quèla de Ilasi, se cata Messane e la so splendida val costituida da tri nuclei importanti Castagnè (con Pian de Castagnè, Gugi, Val de Castagnè e un poche de case), Messane de Sóra (con Capovila, Postuman, Dosso, Sul Vago, Torasine e altre contrà), Messane de Sóto (con Casal, Casoni, Frata, Lione, Malevesina,e un poche de altre località). Partendo dal fondo val, sóto i 100 m de altessa se ariva fin a quota 600, passando da la coltivassión de l'ua e de l'olivo al bosco e al pascolo lessinico. Essendo travérsàda da un bèl pochi de corsi d'aqua, la presensa de l'òmo in questa val l'è antica, fin dai tempi de la preistoria. Infati in località Casal Farinati a Messane de Sóto, i è stà catadi reperti del Paleolitico Medio e del Neolitico. De epoca romana: 'n ara dedicà a Giove e a Silvano catà a Messane de Sóto; copi, quarèi e contenidori par el vin catà in località Ruini; tombe nel fondo "La tór" con compasso e monéda de Galieno; nel 1949 scoerti in contrà Torcolo quarèi, 'na luserna e un cameo; nel 1954 durante i scavi in contrà Fiui jè vegnudi a la luçe muri, pavimenti a mosaico e altri materiale da costrussión; in contrà Guaite un bèl mucio de monéde del Basso Impero; a Castagnè gh'è murà nel campanìl du frontoni de stele funerarie. messane soraStoricamente, in 'sto periodo, da Messane ghe passava la Via Cara, importante via de comunicassion e de passàio par caréti e bestiame bovin e cavrin, che la partìa dal setimo mïo romàn de la Via Postumia a l'altessa de Vago de Lavagno e lóngo la dorsal l'rivàa in Lessinia. Durante el medioevo la zona la faséa parte dei possedimenti dei Vescovi de Verona, come ne dise el privilegio papàl del 1145 "Pieve di Mezzane cum cappellis et decimis et castèllo at familiis". Nel X secolo se sente parlar par la prima 'òlta de "Castagnè in finibus veronensis in valle Pretoriense" mentre un secolo dopo vien stipulà un contrato da tri abitanti in "loco Castanedo". Nel XII secolo el compare inveçe el toponimo de Messane bèn distinto, Mezane de Subtu, in Mezane de Supra, con la zonta de Postumanus. Durante la Serenissima la zona l'è deventà sogiorno estivo par le nobili faméje veronesi, infati in paese podémo catàr la splendide vile afrescade del '700, la Maffei (opere de Andrea Porta del 1786) e la Roja-Schiavoni con stupendo parco; da segnalàr la più antica vila de la zona la Giuliari con tór e pòrtego del '400 e palasso del XVI secolo. Drénto podémo amiràr un afresco de la Scóla del Farinati e statue del '700 de Angelo Sartori; 'pena fora Messane, vila Della Torre se presenta come 'na costrussión su du piani con lòsa in stile paladian con drénto afreschi del Farinati. El piassé antico monumento del paese l'è sensa dubio la tór campanaria romanica del XII secolo de la pieve andà in roina, ricordà ne la bóla de papa Eugenio III nel 1145; la pieve de Santa Maria Sùnta l'è stà costruida in seguito in posission piassé alta tra el 1871 e 'l 1889 su disegno del Gottardi e consacrà el 19 setembre del 1936. Drénto a 'sta cèsa parochiàl gh'è un fraco de opere d'arte de la vècia cèsa: una pala d'altàr de Gerolamo da Libri, altre pale de Antonio Giarola con i Santi Francesco e Carlo Borromeo, de Claudio Ridolfi e par finìr Gioàni Caliari con Cristo Crocefisso con arènte la Vergine e San Gioàni. A Messane de Sóra da 'ndóe ghe una magnifica 'ista su la val podémo farghe 'na visita a la parochiàl dedicà ai Santi Fermo e Rustico del XVIII secolo costruida su n'altra cèsa del '400; drénto gh'è le tele de Ugolini, P. Farinati e Santa Prunati e na fonte batesimal del '400 opera de Bartolomeo da Massa mentre el campanìl l'è del 1768. Ne la frassión Castagnè gh'è la cèsa del '700, parochia con rector nel 1529, dedicà a San Ulderico con tele de l'Orbeto e del Ridolfi. Ne l'altra frassión Postuman inveçe gh'è la cèsa dedicada a San Nicola da Bari. Par finìr a Messane de Sóto podémo farghe 'na visita a un capitel del 1353 con un bassorilievo de la Madona con Butìn. Foto: Messane de Sóra, San Fermo e Rustico 


 

Pin It