Mossecàn

MOSSECÀN (Mozzecane)
Popolassión: 7.506 Altessa: 47 metri sóra el livèl del mar
Superfice: 24,85 chilometri quadri Comùni confinanti: Vilafranca de Verona, Pojan Veronese, Nogarole Roca, Valéso sul Menso, Roverbela MN.

Ultimo Comùn del Veronese al confìn con la provincia de Mantoa, a 21 chilometri in diressión sud-ovest da Verona con le frassioni Gressan, Quistel, San Zén, Tormine. L'òmo l'è presente a Mossecàn fin dal'Età del Bronso come pól dimostrarne i resti catà a Boscheto de Gressan e Tormine, mentre del periodo romàn jè vegnù a la luçe tombe, monéde e mosaiçi, sensa parò desméntegàrse che da 'ste parti ghe passava la Via Postumia in diressión Verona, vèrta nel 148 a.C. Dopo la fin de l'impero romàn l'è stà el turno de Longobardi e Franchi come da documenti tra el IX e 'l XI secolo, 'ndóe vien parlà de cambi de propietà in San Zén in Mosso (it. Mozzo) tra i sconfiti Longobardi e i novi ocupanti. Altri documenti del IX secolo i parla de la frassión Tormine de sicura origine romana come ne dise el nome che'l deriva da "Terminus" paese de confìn. Mentre ne la bóla de Papa Eugenio III se parla de l'esistensa de la pieve de Gressan (it. Grezzano dal latin Graecius) "Plebem de Gregiano cum capellis et decimis et curte". El toponimo Mossecàn (it. Mozzecane) el deriva da un çerto "Mucio Cane", che l'éra riussido a farse dar in concessión dei teréni dal Comùn de Verona nel 1202 ne la "Campanea Maior", area de campagna usada dai çitadini par el bèn de tuti. Nel 1206 "Mucius Canis" el risulta morto e i so dissendenti i vien ciamadi "de Mucio Cane" col tempo "Muciis Canibus" e "Moçecanis". Ma el fato storico piassé importante l'è quél del 1226 quando i rapresentanti de le importanti çità del nord Italia i s'à riunì ne la ceséta de San Zén in Modio par rinovar de altri 25 ani l'antica lega Lombarda contro Eselin e l'amigo imperadór Federico II. Dopo numaròse lote tra veronesi e Mantoani, San Zén in Mozzo e Gressan i éra tra i feudi Scaligeri. Dopo i De la Scala, l'è stà el turno par un pochi de ani de Visconti e Cararesi prima de la rivàr nel 1405 al periodo Venessian. Nel 1414 Simone de Canossa dopo avér combatù par la Republica de Venessia l'è riussì avérghe el teritorio de Gressan 'ndóe l'è stà costruido el palasso de faméja mentre poco tempo dopo S.Zén in Mosso l'è deventà propietà de Jacopo dal Verme e Mossecàn un Vicariado autonòmo. In 'sto periodo de tranquilità jè stà bonificadi i teréni impaludé e jè scomincià le coltivassioni del gelso, de cavaleri e del riso, dando un forte urton a l'economia local. A parte la peste nel 1630 che l'à somenà morte in tuto el teritorio, le dominassioni de l'800 austriache e francesi, e l'union de i quatro comuni Gressan, Mossecàn, San Zén in Mosso in uno sol no gh'è particolari eventi da segnalàr. Tra le cése da segnalàr quèla de San Zén in Mosso (da "modio", in italian "moggio" unità de misura agraria corisp. a 146 litri in Lombardia) parochia autonoma nel 1530, rifata nel 1770 par l'intervento de Conti Miniscalchi; la parochiàl del XVIII secolo a Mossecàn dedicà a San Piéro e Paolo 'ndóe gh'è conservà 'na tela de Gerolamo Andrioli con rafigurà la "Strage dei Inoçenti" piturà sóra a 'n opera de la Scóla del Mantegna;. sempre del '700 l'è la parochiàl de Tormine dedicà a Sant' Antonio Abate mentre del 1682 l'è quèla atuàl de Gressan fata ricostruir da Luigi Canossa. Da segnalàr el simbolo de Mossecàn Palasso Canossa costruido nel XVI secolo su disegno de Michele Sanmicheli e finìo nel XVIII secolo sóto la diressión de l'architeto Cristofali. E par finìr Palasso Ruffini del '600 realisà dal Cristofali e de propietà prima de la faméja Vecelli e dopo dei marchesi Cavriani de Mantoa, 'ndóe nel 1821 durante el Congresso de Verona l'éra ospite Ferdinando I° Re de le Do Sicilie mentre nel 1860 i austriaçi i l'à fato deventàr caserma e ospedal.


Pin It