Nogaróle

NOGARÒLE (NOGAROLE ROCCA)
popolassión: 3.677 Altessa: 37 metri sóra el livèl del mar
Superfice: 29,14 chilometri quadri Comùni confinanti: Traénsòl (Trevenzuolo), Roverbella MN, Mossecàn, Poéjàn (Povegliano), Vigasi.

Comùn de la Bassa Veronese a 25 chilometri in diressión sud-ovest da Verona con le frassioni Bagnol, Colombare, Pradele. L'òmo l'è presente in 'sto teritorio fin da l'Età del Bronso come i pól farne pensàr i reperti vegnudi a la luçe lóngo i arzari del fiume Tión in località Corte Vivaro ne la frassión Bagnol mentre de Epoca Romana l'è l'epigrafe de un çenturion de la legion Flavia Firma catà in località Varan. Ma la storia de Nogarole l'è ligà a quèla de l'antica faméja dei Nogarola vegnudi in Italia nel 933 durante el regno de Lotario II che'l g'à dà in gestión 'ste tere costruendoghe sóra un castèl ricordà nei documenti del XIII secolo. El primo documento che ne parla del teritorio l'è del 844 'ndóe se lese che a Bagnol l'Arcidiacono e sò sorela i g'avéa 'na "colonicella in casale Banhoni"; solo nel 1184 la contrà vien ciamà col nome "Bagnolus". Storicamente el castèl posissionà al confìn col Mantoan l'è stà un ecessional pónto difensivo del teritorio veronese e nel 1233 durante la guera tra Eselìn da Romàn amigo dei Nogarola e i Mantoani i g'a tacà fogo, tirandolo su da nóvo piassé màsiso diese ani dopo. Nel 1277 Antonio Nogarola l'è stà copà nel tentativo de difèndar Mastino De la Scala da un imboscada e par 'sto motivo che l'à dimostrà l'assoluta fedeltà dei Nogarola ai Scaligeri i s'à imparentà; Bailardino Nogarola l'è deventà cugnà de Cangrande sposandoghe la sorela Caterina. In pratica i Scaligeri i considerava el castèl de Nogarole un sicuro rifugio in caso de rogne. A metà del XIV secolo i De la Scala i avéa fato costruìr el mitico "serajo", un murajon che partendo da Valéso e passando da Vilafranca el finiva pròpio a Nogarola. Sóto i Visconti el castèl l'éra ne le mane de Nicolò Diversi e Guglielmo Bevilacqua consijeri de Gian Galeasso Visconti. Nel 1405 quando jè rivà i Venessiani, Nogarole l'è deventà sede de un Vicariato e 'l castèl consegnà ne le mane de Jacopo Dal Verme che a la so morte l'è tornà a la Republica de Venessiana. Nel 1441 Nogarole Roca e 'l so castèl jè stà vitime de Carlo Gonzaga nemigo de Venessia sensa desméntegàrse che gran parte del "Serajo" tra Vilafranca e Nogarole l'è stà butà zò dai mantoani. Da 'ste parti a l'inissio del '500 i éra passà i soldà de la Lega de Cambray mentre nel 1543 el castèl l'è stà vendù a Leonardo Boldri con l'obligo de cavar terapiéni, fossi e l'aspeto carateristico de fortessa. Nel 1545 el castèl l'è stà vendù a Gioàni Bevilacqua Lazise che da quél momento l'à ciapà el titolo de "Conte de Nogarole Roca" mentre nel '800 la costrussión l'è finì ne le mane de Benedéto Barbieri e dal 1973 donà a l'Aministrassion Provincial de Verona. Drénto al castèl gh'è 'na ceséta dedicà a San Carlo Boromeo 'ndóe un tempo gh'éra conservà 'na pala de la Vergine con butin, S.Gioàni e S.Carlo Boromeo. Nel 1630 grassie ai Mantoani che i avéa messo a fero e fogo Nogarole l'è rivà ànca la peste, portando la zente ne la piassé completa miseria. Nel 1690 l'è scomincià l'opera de bonifica ne le risorgive de Nogarole Roca e nel percorso del fiume Tión, portando meno problemi de salute e fasendo svilupar le coltivassioni de riso e de morari par cavaleri. Tra le cése, da segnalàr la cèsa parochiàl de Nogarole Roca dedicà a San Lorenso costruida nel '700 che la conserva do pale, quèla del "Cristo Risorto" del Brusasorzi e la "Vergine del Carmelo" de Biagio Falcieri. Ne la frassión Colombare podémo catàr 'na bèla céseta de l'800 dedicà a la Madona del Carmelo. Tra le vèce costrussióni de un tempo, da ricordàr el "Porton de fero con toreta" e 'l palasso "l'Olmo" colegadi con la roca de Nogarole.

Pin It