Palù

PALÙ
Popolassión: 1.262 Altessa: 23 metri sóra el livèl del mar
Superfice: 13,61 chilometri quadri Comùni confinanti: Opeàn, Ronco al'Àdese, Zevio

Comùne che'l se cata a disnove chilometri da Verona in diressión est-sud-est e posissionà tra i fiumi Bussè e Mirandolo. Par sentir parlàr de Palù bisògna risalir fin al XII secolo, quando a causa de l'aumento de le nassite e de la conseguente dimanda alimentar in çità, el Comùne de Verona l'à creado un consorsio con 400 iscriti composto da nobili çitadini con lo scopo de bonificàr la gran palude Palus Comùnis Veronae tra Zevio, Opeàn e Ronco a l'Àdese. Nel 1194 i è scominçià i laori, canàlisando el Bussè e 'l Fosso Storto, terminadi nel 1199 con la fondassión de Palù su uno dei çinque tochi de tera che i comprendea 4000 campi ricavadi da la bonifica. Col tempo le propietà divise i-éra passade dai soci del consorsio ne le mane de faméje potenti Maffei, Miniscalchi e Sagramoso. Sóto la dominassión venessiana parte l'agricoltura e in particolar la coltivassión del riso nel XVI secolo par merito a quanto par del "serenissimo" Teodoro Trivulzio, che l'avéa comprà un pochi de teréni messi mal ne la zona. Così, Palù l'éra deventà un çentro de rifornimento par la çità de prodoti agricoli a pochi schèi. Interessanti e bèn conservade i è le antiche vile signorili: Vila Maffei o Corte Granda l'è un bèl complesso con pila da riso concessa dal governo Venessian a la fin del XVI secolo, Vila Miniscalchi ne la contrà Creda con bèla e granda propietà divisa nel XVII secolo a metà tra questa faméja e i Pompei, Vila Sagramoso ne la contrà Sant'Egidio. Tra le cése, da segnalàr quèla vècia dedicada a San Zénone, nata con el paese nel XII secolo, parochia nel 1526 e ristruturada nel 1691, con drénto un afresco atribuido a Gioàni Caroto e 'na pala con Cristo Risorto de Pasqual Ottino mentre la cèsa noa l'è stà costruida nel 1964 e completada nel 1988.


Pin It