Pescantina

PESCANTINA
Popolassión: 17.128 Altessa: 80 metri sóra el livèl del mar
Superfice: 19,73 chilometri quadri Comùni confinanti: Verona, San Piéro Incariàn, Bussolengo, Sant'Ambroso de Valpoleséla, Pastrengo.

Comùne posissionà ne la parte meridional de la Valpoleséla a 16 km da la rena de Verona in un teritorio arènte a l'Àdese con le frassioni Setimo, Balconi, Arçè, Ospedaleto e S. Lussia. Le prime testimonianse storiche su Pescantina jè de epoca romana come da reperti vegnudi a la luçe: al Nassàr un pilòto de marmo de Marco Tenazio Labeone, a Pescantina el pilòto de Lucio Tenazio Varo, a Arçè un poche de scrite su pièra e a Setimo un altàr. In 'sto periodo e forse ànca prima la Valpoleséla e quindi ànca Pescantina, faséa parte del Pagus dei Arusnati, popolassión de origine retica. Nel medioevo i çentri abità de Arcè 'ndóe gh'éra de sicuro un castèl, Santa Lussia (Pulio), Setimo e Pescantina i éra inserì ne la "Vallis Provinianensis", una de le do zone ne la sudivision de la Valpoleséla. Durante el XII secolo Pescantina l'éra tra le propietà dei Vescovi de Verona, confermà tempo dopo dai Scaligeri e dai Venessiani. A l'inissio del XIV secolo Pescantina faséa parte del feudo de la Valpoleséla sóto Federico De la Scala, ma dopo avér tentà de farghe le scarpe al cusin Cangrande i g'à distruto el castèl e l'è stà messo al bando. Nel corso de la so storia Pescantina, l'à sempre tegnù conto de l'importansa de l'Àdese dal pónto de 'ista comerciàl-economico, tanto che, le fabriche de barche e barconi par la navigassioni e 'l porto jè restà verti fin a la fin de l'800. Nel 1404 e 1405 el teritorio de Pescantina l'è stà messo a fero e fogo da la guera tra Cararesi e Venessiani e par 'sto motivo l'éra stà costruì 'na bastia tra Arcè e Pescantina butà zò tempo dopo. Nel XVI secolo durante el periodo venessiàn, ghè stà 'na batàja tra la Republica Venessiana e la Lega de Cambray. Sóto Venessia, Pescantina faséa parte del Vicariato de la Valpoleséla, nel "Piovadego" de San Fioran (Florian); Nel teritorio de Pescantina dopo l'elession, el nóvo Vicario, el faséa 'na visita a la cèsa de San Maria de Ospedal de Mesacampagna l'atuàl frassión Ospedaleto in compagnia de ci l'è stà in carga prima de lu. Dopo el periodo de l'800 con dominassioni francese e austriaca nel 1866 come el resto de la provincia veronese l'è deventà italiana. Tra le cése da segnalàr el Dòmo de San Lorenso Martire, in stil neoclassico-baroco, costruì su progeto de Alessandro Pompei a partir dal 1753 al posto de 'n altra cèsa che l'éra a le dipendense de quèla de San Fioran fin dal 1145, pieve nel 1450 e parochia con arciprete nel 1600. El campanìl atuàl l'è stà costruì tra el 1820 e 'l 1840 su disegno del Barbieri mentre drénto la cèsa se pól 'édar un bèl altàr maiòr de la Scóla del Cignaroli. Sempre a Pescantina podémo catàr la cèsa de San Roco del '400 con portal del XV secolo con campnil a bifore, el Santuario de la Beata Vergine de la Pietà "De la Madonina" del 1732. A Arçé gh'è la ceséta romanica de San Michel Arcangelo del XII secolo, come da documenti del 1145 risulta a le dipendense dei Benedetini de San Fermo Minor. A Santa Lussia de Pol la nova cèsa parochiàl costruì nei ani '50 al posto de quèla vècia presente nel XII secolo, la conserva ancora tochi de afreschi tardo-medioevali e decorassioni. A Setimo la cèsa de Sant'Antonio Abate del XV secolo un tempo a forma quadra l'è stà restaurà nel '700, la conserva afreschi de la fin del '400. Tra palassi, corti e vile sparse nel teritorio da segnalàr a Arçè Vila Albertini rifata ne l'800, la se presenta con grande parco arènte l'Àdese e la ceséta de Sant'Ana; a Ospedaleto Vila Quaranta del XVII secolo con decorassioni de otima qualità con arènte la cèsa de la Purificassion de Maria de origine medievàl con afreschi de Paolo Ligozzi; a Setimo: Vila La Mirandola 'ndóe l'è stà catà un ara pagana; Vila Bricci del '500 de Scóla Sanmicheliana con colombare, porteghi, barchesse e un bèl salon decorà; Vila Bertoldi del '600 con Capela e un bèl salon con quatro tele de Andrea Porta; Vila Sparavieri del '500 con pòrtego e lòsa. Palasseto Giacopini con pòrtego e lòsa, Palasso Betteloni sede del municipio, Corte Brizzi bèla e interessante, Corte La Presa con magnifiche piture murali. Da ricordàr l'è el monumento ai ex-internadi a Balconi, costruì nel 1966 arènte a la stassión in memoria dei caduti nei "Lager" de la seconda guera mondiàl. Se Ve piase far quatro passi o andàr in bicicleta consiliemo de andàr arènte a l'Àdese lóngo la "strada de Alzaia" (un tempo percorsa dai cavài che i tirava le barche contro corente) vardando el panorama e la natura, le vèce fornase e i ex-molini, le vile e i canài.


Pin It