Peschiera

PESCHIÉRA - PISCHÉRA (Peschiera del Garda)
Popolassión: 10.354 Altessa: 68 metri sóra el livèl del mar
Superfice: 18,27 chilometri quadri Comùni confinanti: Castèlnòo del Garda, Valéso sul Menso, Sirmione BS Ponti sul Menso MN Pozzolengo MN, Desenzano BS

Comùn posissionà ne la parte meridional del Lago de Garda 'ndóe nasse el fiume Menso e al confìn con le province de Mantoa e Bressia. L'òmo l'è presente in 'stà zona fin da l'Età del Bronso (conossù come orisonte cronologico Peschiera-Zeit) come pól dimostràr i numarosi reperti scoerti; del secondo milenio prima de Cristo, jè i vilai su palafite oltre a materiali de uso comun e tochi de bestie, vegnudi a la luçe durante i laori de fortificassion dei bastioni, dal Genio Austriaco nel 1851. In epoca romana l'éra considerà economicamente importante, infati nel "Vicus Arilica" vècia denominassion de Peschiera, i g'avéa sede i colegi dei barcaroi veronesi e peschieradel Benaco come ricordà ne le donassióni in sesterzi da tri scrite su pièra. In 'sto periodo nel 101 a.C. l'è stà fortificado el vilaio da Caio Mario impegnà ne le lote contro i Cimbri, nel 55 a.C. l'è passà Cesare e i so soldà che i à sponsà un poco durante l'inverno, nel 15 a.C. la flota naval l'è stà utlisà da Druso e Tiberio durante l'invasion de la Retia, nel 38 d.C. le tere de la Riviera del Gardà i è stà consegnà ne le mane del console Publio Nonio Asprenate par i so meriti militari, da parte de Augusto. Ne la Selva de Lugana, intorno al çentro del paese, nel 249 l'è stà copà l'imperadór Filipo nel tentativo de contrastar el traditor Decio e sempre da 'ste parti nel 268 i soldà todéschi jè stà sconfiti da Claudio II mentre i stava andando a la conquista de Verona. Poco distante da Peschiera a Salionse de Valéso gh'è stà el storico incontro nel 452 d.C. tra "l'ambassador" Papa Leone I mandà da l'imperadór Valentiniano e Attila che l'avéa fato sosta coi Unni da 'ste parti, finido con la ritirada dei barbari. Durante 'sto periodo el paese l'à cambià nome in "Ardelica Pischeriae" e l'è stà rinforsà par paura de eventuali invasioni barbariche. Nel VI secolo sóto el dominio longobardo s'à 'isto el potensiamento de la navigassion, cressuda bèn dal pónto de 'ista strategico-economico dopo el periodo de l'impero romàn. Nel VIII secolo el re longobardo Rachis l'avéa concesso, come scrito su un documento, la gestión de le tere in "Piscaria" al Monastero de San Colomban de Bobbio. Verso la fin del IX secolo dopo la creassion de la Iudicaria Gardensis, Re Berengario 'isto le numaròse invasioni dei Ungari, l'avéa concesso de costruìr castèi e roche oltre a rinforsar le fortificassioni esistenti. Nel XII secolo Peschiera la dipendea dal Vescovo e dai Rettori de Verona, manifestando una çerta autonomia ànca grassie a l'elession dei propi consoli. Dopo la conquista da parte de Federico Barbarossa nel 1154 che l'avéa portà concessioni e privilegi, l'è stà el turno de le lote tra i guelfi Sambonifacio e i ghibelini Monteci amiçi de Eselìn da Romàn. Finìo 'sto periodo l'è stà el turno dei Scaligeri che con Mastino I nel 1271 i à vólù rinforsar e sgrandàr l'antica roca zontando ànca tóri e muri, come nel 1327, quando Cangrande I l'à fato ristruturar la Roca de Peschiera "...In castro Pischeriae fecit aedificari I Dòmos Mathas I Cameras Salis Muros et Fabricas et Revóltum I Rochas cum Scalis Lapideis". Ne l'epoca Scaligera Peschiera l'è stà ricordà da Dante, nel XX° canto de l'Inferno: "Siede Peschiera bello e forte arnese da fronteggiar bresciani e bergamaschi, ove la riva intorno più discese. Ivi convien che tutto quanto caschi ciò che 'n grembo a Benaco star no po' e fassi fiume giù pe' verdi paschi. Tosto che l'acqua a correr mette co' no più Benaco, ma Mincio si chiama fino a Governolo ove cade in Po". Ne le prisoni de la fortessa nel 1365, Cansignorio l'à fato prima imprisonar el fradel Paolo Alboin e dies'ani dopo strangolar par questioni de "eredità". Dopo i Visconti e i Carraresi Peschiera l'è passà ai Venessiani a l'inissio del XV secolo; in 'sto periodo s'à pensà de rinforsar i muri ànca parché l'éra a guardia de le comunicassioni tra Veneto e Lombardia e de la navigassion sul Garda. Cossita dopo la guera de Cambray a l'inissio del '500, l'è stà deciso de sgrandar e métar in sicuressa ancor piassé le fortificassioni. Nel 1548 su progeto de Guidobaldo Della Rovere e sóto la diressión de Michele Sanmicheli l'è stà creada la fortessa pentagonal bastionada che al dì de ancò podémo amiràr; jè stà realisà dei terapiéni intorno ai vèci muri, çinque baluardi bastionadi, vèrta Porta Verona (inveçe Porta Bressia vèrta nel secolo prima) e pochi ani dopo altri terapiéni a protession de la Roca. Con la Serenissima s'à 'isto un bèl svilupo economico tra i piassé importanti de la storia del paese mentre numaròse guere, eserciti de passàio e la tremenda peste no i à creà particolari problemi. Con l'arivo de Napoleón jè scomincià le rogne e nel 1797 col Tratato de Campoformio Peschiera l'è passà sóto la Republica Cisalpina ma nel 1799 dopo la sconfita par man austriaca a Pastrengo, i francesi i è stà costreti a ritirarse da la fortessa e darghela ai soldà austro-russi. Da l'an dopo fin al 1814 Peschiera l'è stà francese. Sóto i austriaçi s'à visto parò un çerto svilupo economico e un poche de investimenti de risorse nel teritorio. Nel 1848 ne la prima guera de indipendensa, Peschiera l'è stà el prinçipal obietivo de l'esercito piemontese, ocupà ma riconsegnada ai austriaçi pochi mesi dopo. Cossita l'Austria l'à bèn pensà de rinforsar Peschiera in modo masisso e con Verona, Mantova e Legnago l'éra una de le çità del famoso "Quadrilatero", un incredibile sistema difensivo passà a la storia. Nel 1859, ne la seconda guera de indipendensa, la fortessa l'è stà ciapà de mira dai italo-francesi con una massacrante batàjafinida grassie al'armistizio de Vilafranca, restando in man austriaca. Nel 1866 Peschierà l'è deventà italiana. Da segnalàr ànca che nel 1917 durante la prima guera mondiàl Peschiera l'à ospità un convegno, ne la palassina adibida a sede del comando militàr, Re Vitorio Emanuele III, i aleadi ne la guera contro l'Austria, Llyod George par l'Inghiltera, el General Foch e Painlevé par la Francia, el Re Vitorio Emanuele III con i ministri Sonnino e Orlando par l'Italia. Secondo Vitorio Emanuele bisognava métar l'esercito su la linea del Piave e l'à respinto la proposta dei aledi de ripiegar al'Adige, al Menso e al Po. Da 'édar a parte le magnifiche fortificassioni con bastioni e porte, Vila Albertini del '600 in stil sanmicheliano con arènte l'oratorio de Santa Maria. Tra le cése da segnalàr el Santuario de la Madona del Frassino 'pena fora paese, 'ndóe nel 1510 'na statueta con la Madona col Butìn l'è comparsa tra i rami. Nel 1514 i Frati Minori Francescani i à costruido el convento. Nel Santuario gh'è conservà i afreschi e dipinti de Paolo Farinati, Zéno da Verona e de la Scóla del Morone mentre ne la capela de la Madona gh'è conservà la famosa statueta catà dal contadin Bartolomeo Braglia '500 ani fa. La cèsa parochiàl de Peschiera dedicà a San Martìn l'è comparsa su un documento del 1008, rimessa a posto nel '400 ma butà zò e rifata nel 1821. E alora ne resta che saludarse con un brindisi bevendo un gosso de bianco Lugana.


Pin It