Roérciàra

ROÉRCIÀRA (Roverchiara)
Popolassión: 2.771 Altessa: 20 metri sóra el livèl del mar
Superfice: 19,65 chilometri quadri Comùni confinanti: Isola Rissa, San Piéro de Morubio, Angiari, Bonavigo, Albaredo d'Àdese, Ronco al'Àdese.

Comùne de la Bassa Veronese posissionà con la so frassión Roerciarèta tra el Canal Bussè e l'Àdese. La zona l'è stà abità fin da l'antichità come ne dimostra le monéde de epoca romana catade nel teritorio mentre le prime notissie su Roérciàra jè del IX secolo, infati su 'n documento del' 813 se parla de tute le donassioni del Vescovo de Verona Ratoldo a la Schola Cantorum de "Roueclaria". Da 'ste parti gh'éra 'n antica pieve costruida 'ndóe 'desso gh'è la cèsa parochiàl nova, ricordà ne la bóla papàl del 1145 da Papa Eugenio III e nei documenti del 1041. In 'sto periodo Roérciàra l'éra tra i possedimenti del Vescovo de Verona fin al 1206, data in cui el Comùne de Verona l'è subentrà ne la gestión. Nel 1234 da segnalàr el passàio de Eselìn da Romàn e relativo esercito, che, travérsando l'Àdese a l'altessa del Comùne de Roérciàra, l'è andà a la conquista de Albaredo. Par el resto, sto comun l'à seguido le vicende storiche de Verona, con dominassioni Scaligere, Viscontee e Venesiane. Cossita sóto la Republica Venessiana, come nel resto de la provincia veronese, se vede un bèl svilupo de l'agricoltura (riso e cereali) con el conseguente aumento de l'ocupassión e de la navigassión cara ai venessiani, infati a Roerciareta gh'éra un porto su l' Àdese. Pròpio par la presensa del faro del porto che faséa luçe su l'Àdese de note, i dise el vegna el toponimo de Roérciàra "Ripaclara", ipotesi che vien scartà par quèla piassé credibile, secondo la quàl, podarìa derivàr da la parola tardo-latina "rubecularia" o "rubeclara" campagna piéna de spini, de "rubus" rovi, ànca se nel stema comunàl catémo la pianta del "roaro" difusa un tempo nel teritorio Tra le cése da segnalàr quèla parochiàl del 1860 dedicà a San Zén, costruida 'ndóe gh'éra un tempo n'antichissima pieve, conserva 'na tela de Paolo Farinati con "Cristo Crocefisso con i Santi Zéno e Lorenso", do tele de Francesco Montemezzano, una con la "Madonna con i Santi Sebastiano e Rocco" e l'altra con rafigurà "la presentasion al tempio" mentre quèla de grande valòr l'è de Antonio Balestra con "Cristo Risorto con la Madona inzenocìa e Sant'Antonio". A Roerciarèta (Roverchiaretta) gh'è la cèsa parochiàl del XIX dedicà a la Madona del Carmelo costruida in sostitussion de quèla vècia del '500. Drénto podémo amiràr una fantastica pala de Felice Brusasorzi del '500 con rafigurà "Madona del Carmine con San Girolamo e San Francesco". Da segnalàr, sempre a Roerciareta, l'Oratorio del '600 a forma otagonal dedicà a la Beata Vergine de le Grazie costruido nel 1633 e simbolo del paese. Tra le vile, da segnalàr quéle piassé importanti: la "Pindemonte-Fiumi" del '600 in çentro Roérciàra, storica abitassion del poeta Lionello Fiumi; Vila Guarienti lóngo la strada che da La Rissa la porta a Roverciara costruida nel 1530 con afreschi e tór colombara; Vila Guera in località Casalino del '600. Al dì de ancò Roérciàra se presenta come un paese svilupà nel setor agricolo grassie ànca a la costante irigassión de le tere da parte de l'Àdese e del Bussè ma podémo èssar contenti de la costante cressita de l'artigianado del mobile d'arte.


Pin It