Ronco a l'Àdese

RONCO A L'ÀDESE (Ronco all'Adige)
Popolassión: 6.029 Altessa: 23 metri sóra el livèl del mar
Superfice: 42,82 chilometri quadri Comùni confinanti: Belfiór, Albaredo d'Àdese, Isola Rissa, Roérciàra, Opeàn, Zevio, Palù.

Ronco l'è posissionà a destra de l'Àdese con le frassioni Albaro, Scardevara e Tombazosana a quasi 'na trentina de chilometri in diressión sud-est da Verona. Dopo l'aluvion del 589 d.C. che l'à modificà el corso del'Àdese gran parte de la zona l'éra quertà da paludi e da tere infestà da piante e soltanto ne l'alto medioevo l'è stà scomincià l'opera de bonifica come pól testimoniàr el nome de Roncà, toponimo che deriva dal verbo "runcare" che vól dir disboscàr, remenar el terén tirandoghe via la gramégna par poderlo coltivàr. Tra le prime testimonianse scrite g'avémo quèla del 896 'ndóe ne vien contà che Re Berengario l'avéa concesso a Boniperto presbitero de la cèsa de San Procolo, la gestión de le tere ne la "Vila de Ronco". Nel 929 se vede la nàssita del çentro abità e de la cèsa dedicà a la Vergine, fata costruìr dal conte de Verona Milone, importante personajo amigo del Berengario, de quèla faméja che col tempo la s'à fato ciamar "Sambonifacio" ma che in origine l'éra conossuda come "Conti de Ronco". La cèsa nel 1145 l'è ricordà da Papa Eugenio III come "Plebem de Runco cum capellis et decimis" e pieve con arciprete nel 1526. Nel so testamento Milone, l'à lassà i teréni al monastero Venessian de S.Zacaria, ma i dissendenti dopo numaròse guere giudisiarie jè stà costreti a lassar le propietà. Dopo el periodo Scaligero e Visconteo, Ronco l'è passà ai Venessiani che i l'à unido al Vicariado de Isola Rissa. In 'sto periodo l'à regnà la paçe e 'na çerta prosperità economica grassie a la presensa de un porto su l'Àdese dedicà sóratuto al comercio de cereali che i vegnéa trasportà su i "peoti", barche no massa grandi che travérso i canài i passava par le campagne fin al porto 'ndóe gh'éra i "burchi", imbarcassioni de discrete dimensioni che tirade dai cavài o da bò, lóngo i àrzari de l'Àdese i rivàa fin a Verona contro corente. Visto el grosso trafico su l'Àdese, la Republica de Venessia nel 1536 l'è stà costreta a regolamentar i trasporti con 'na lege composta da tredese articoli. Nel 1593 nàsse el Consorsio de Bonifica dei teréni de Ronco e Tomba; e pròpio in 'sto periodo se svilupa el comercio del legname con partensa dal Trentino e arivo a l'arsenal venesian. In 'sti ani s'à svilupà la coltivassión del mais, le risare le à quertà gran parte del teritorio e l'à fato comparsa el baco da seda conossù come "cavaler" che'l magnava le foje de morar; par 'sto motivo jè stà piantà ne la campagna longhi filari de morari (gelsi). Dopo la Republica de Venessia verso la fin del 1796 a Ronco l'è rivà Napoleón che l'avéa siélto el palasso de l'atuàl Municipio come quartier generàl durante la famosa batàja de Àrcole e dal campanìl de la vècia cèsa el vardava el combatimento. 'De stà cesa a parte el campanìl e l'abside gh'è restà poco a parte l'aquasantiera e fonte batesimal che podémo catàr ne la cèsa noa costruida arènte nel 1965 con drénto opere del XVI-XVII secolo de Montemezzano, Ceschini, Gobbini. Tra le cése da segnalàr de Scardevara (scardeva=pésse de aqua stagnante) dedicà ai Santi Filipo e Giacòmo sede de 'n abassia benedetina fin dai tempi de Milone, smembrà e deventà parochia nel XVII secolo; la parochiàl de Tombazosana dedicà a Sant'Ambroso 'ndóe gh'è conserva 'na tela de l'Orbeto e 'na Madona coi Santi de D. Brusasorsi, l'è stà costruida tra el 1864 e '1867 su disegno de l'ing. Locatelli de Zevio dopo avére butà zò a Tomba de Sóto nel 1863 la vècia cèsa romanica del IX secolo restaurada nel 1220 al tempo de l'arciprete Winco. Tra le vile e le corti da segnalàr Vila Camozzini al Canton con du grandi barchesse e un bèl cortil costruida da Francesco Camozzini nel 1850 sóra ai resti de n'altra, parché Anton Maria Perez a l'inissio de l'800 l'éra el parón e prima de lu nel 1653 Gerolamo Emilei; corte Polfranceschi del XVII secolo con casa padronale stale e canài; corte Corso ciamada ànca "El Vatican" 'na 'òlta un antico monastero de moneghe, restaurà e sgrandà dal milanese Francesco Podestà nel 1877 mentre nel 1878 grassie a l'aiuto del pitór Gazieri l'à rimodernà la capela (la vila l'è passà ai Da Lisca e nel 1929 ai Tirapelle). Tra i personeagi famosi da ricordàr el pitór Giuseppe Resi (1904-1974) e 'l fondator de la Società de Mutuo Socorso nel 1885 Don Giuseppe Baldo. podémo dir che Ronco l'à mantegnudo nei secoli la so vocassion agricola con pomi e riso sensa desméntegàrse de l'industria de copi e quarèi.


Pin It