Salissól

SALIZÓL, SALISSÓL (Salizzole)
Popolassión: 3.779 Altessa: 22 metri sóra el livèl del mar
Superfice: 30,70 chilometri quadri Comùni confinanti: Isola de la Scala, Concamarise, Sanguinè, Nogara, Boolón.

Comùn de la Bassa Veronese a 27 km in diressión sud da Verona con le frassioni Engazà, Bionde de Visegna e Valmorsel in un teritorio compreso tra i fiumi Tartaro e Menago. Secondo la toponomastica el nome Salizól el podarìa végnar da una de le piante de la foresta mèsa impaludà che anticamente querzéa la zona, in 'sto caso el "Salgàr" (Salice); in pratica un terén piantà a "Salix" come i disea in latìn; ànca el toponimo de origine longobarda "Engazà" ne ricorda che 'sta frassión faséa parte anticamente de un gran bosco che'l se catava a "Gazi et Hengazate Nogarie". L'òmo l'è presente in 'sto teritorio fin da l'Età del Bronso ma i reperti piassé interessanti come monéde e lapidi jè del periodo romàn mentre el primo documento scrito che parla de Salissol l'è del 15 agosto 968 quando in un diploma de Ottone catémo scrito: «In eodem Comitatu veronesi prata juris regni nostri inter Saureciole et Septimo» (Nel istesso comitato veronese i prà de dirito del nostro regno tra Salissol e Setimo). Un altro documento del 1144 ne parla che l'Imperator Corado III l'à confermà la gestión de 'ste tere e quéle de la corte de Nogara con pieve e capele «Salecolis cum Camarisia» a l'Abassìa de Nonantola. Nel 1180 un ato de compravendita ne dise che le propietà del conte Sauro de Sambonifacio e de la sorela Mabilia le passava ne le mane de Bonifacio de Amoverga che'l rapresentava come "decan" el Comùn de Zerea, par 1400 libre de monéde veronesi; tra le propietà ghera un fraco de campi ne le "vile" (paesi) de Salissól, Isola de la Scala e Zerea, Sparé e Casaleon oltre a località tra i fiumi Menago, Tregnone e Tartaro. Nel XIII secolo Gioàni de la nòbil faméja dei Da Palazzo, l'è stà costreto, dopo essarse messo da la parte de Rizzardo de Sambonifacio durante le lote a Verona e imprisonà nel 1230 (liberà nel 1231), a vendar i beni a Eselìn da Romàn nel 1247; el fiól de Gioàni, Bartolomeo da Palazzo, verso la fin del secolo el risultava tra i çitadini esiliadi da Verona dopo che l'éra stà copà Mastino De la Scala, esilio che l'à comportà la confisca dei beni. Ma el momento piassé importante ne la storia de Salissol l'è quél scaligero, quando nel in 'sto comun, 'na dona, Verde de la faméja dei conti de Salissol l'è deventà moiér de Alberto de la Scala e mare de Cangrande. Del periodo gh'è restà una de le costrussióni medioevali piassé bele del Basso Veronese, el castèl con du tóri, una alta 27 metri con resti de merladura ghibelina e l'altra alta 35 metri vóluda da Alberto de la Scala del '200, el tuto restà in piè dopo el passàio del 1441 de l'esercito de Federico Sforsa che l'à butà zò le mura e du tóri. Altra faméja conossuda a Salissol l'è quèla dei De la Cappella che nel 1573 l'è stà nominà col titolo de "Conti de Salissol" da la Serenissima, goernando el paese e pì de 500 campi bagnadi da fossi, come la "fossa Cappella" fata scavar nel XVI secolo ciapando l'aqua del Piganso arènte a Butapièra. Altre faméje presenti in 'sto Comùn nel periodo Venessian e conossude bèn, jèra i Turco, i Trivelli, i Spolverini, i Sagramoso, i Gualdo, Verità-Poeta, i Sambonifacio. Tra le cése da segnalàr la parochiàl de San Martìn Vescovo a Salissol, ricordà nel 1145 ne la bóla de Papa Eugenio III deventà parochia nel 1454 e ricostruida nel 1857, conserva un bèl batistero del 1430 e do tele regalade dal conte Cosimo de Cosmi del '700 con rafigurà San Martìn e 'l martirio de Santa Eurosia. La parochiàl de Engazà dedicà a Maria Sùnta l'è de origine del '300 ma con fassàda in stile gotico e portal del '500, la conserva de le magnifiche tele come un "Incontro de Gesù con Maria" del Brusasorzi e "I Misteri" de Pasquale Ottino del '600 sensa desméntegàrse de la "Sùnta" del '500 ne l'abside e 'na statua lignea del '400 con rafigurà la Madona. La parochiàl de Bionde de Visegna del 1776, dedicà a Santa Caterina la conserva de le interessanti piture come la "Madona in trono con Santi e Sant'Orsola" del Brusasorzi e na "Pentecoste" del' Ottino. A Valmorsel da ricordàr la ceséta dedicà a la Madona Sùnta e a San Roco con altàr in marmo de Sant'Ambròso, le statue de San Roco e de la Vergine in legno de la Val Gardena. Tra le vile da ricordàr Vila Sagramoso del '500 e Palasso Pullè antica sede municipal; a Bionde Palasso Portalupi ora Chiaramonte del '500 con arènte un torion squadrà e merlà del XIV secolo e 'na tór del '400, Vila da Vico e Palasso Scipioni un tempo Serego-Alighieri in stil sanmichelian. Oltre a l'agricoltura da 'ste parti s'à bèn svilupà la produssión del mobile d'arte, deventando col tempo una de le atività piassé importanti del teritorio.