Sant'Ambroso

SANT'AMBROSO (Sant'Ambrogio di Valpolicella)
Popolassión: 11.737 Altessa: 174 metri sóra el livèl del mar
Superfice: 23,50 chilometri quadri Comùni confinanti: Dolçè, Rìole Veronese, Cavàiòn Veronese, San Piéro In Cariàn, Pastrengo, Pescantina, Fumane.

Comùn de la Valpoleséla a 18 km in diressión nord-ovest da Verona el gà come frassioni Domeàra, Gargagnago, Monte, Ponton e San Giorgio comprese tra i 87 e i 1075 m.s.l.m. La zona l'è abità fin da la preistoria come pól dimostrarne i reperti che i va dal neolitico a l'Età del Bronso scoèrti a Cà Verde, Domeara, Mandaiole, Monte Solane, Passo del Picon, Sant' Ambroso e sóratuto a San Giorgio. De epoca romana jè le iscrissioni sacre dedicade a Cuslano, a la Dea Fortuna, al Sol, a la Luna e a Vesta, vegnude a la luçe a San Giorgio (castrum romanum), de la popolassión pre-romana dei "Arusnati" o "Arusnates" de origine forse reto-etrusca che in Valpoleséla g'avéa el so "Pagus Arusnatium" e in 'sta località el çentro religioso. Come savemo, Sant'Ambroso l'è conossù in tuto el mondo par l'estrassion e la laorassion del marmo come el "Rosso Verona", ma ànca in epoca romana grassie a la vicinansa con l'Àdese 'sto prodoto de qualità el vegnéa esportà da partuto. Infati grassie a 'na scrita su le colonete del ciborio longobardo del 712, a l'Epoca de re Liutprando, conservà ne la cèsa de San Giorgio "Inganapoltron", savemo de l'arte del "scopelin" con Mastro Orso e i aiutanti Juventino e Juviano. El ciborio l'è stà rimesso a posto nel 1923 e se presenta sóra a l'altàr magior con quatro colonete laorade. La prima testimoniansa scrita che ne parla de 'sta cèsa col titolo de Pieve l'è ne la bóla papàl del 1145 con Papa Eugenio III "Plebem S.Georgii cum capellis et decimis et familiis et dimidia curte". La cèsa atuàl costruida verso el 1200 l'è stà la sede de un seminario schola juniorum. Mentre l'ultima testimoniansa scrita col titolo de Pieve l'è del 1456 quando l'à fato visita el Vescovo Barbaro. Da 'édar ghe ànca el fonte batesimal in mono bloco de marmo sensa desméntegàrse del stupendo ciòstro e del campanìl in stil romanico. san giorgio 'N altra antica cèsa l'è quèla de San Zén in Poia del XIII secolo in località Grola costruida a strati in calcare rosa e la se presenta a navada unica e con i resti dei afreschi che i rafigura San Zén e San Giorgio. Altre cése parochiàli jè: quèla de Ponton, parochia fin dal 1465, consacrà col nome de San Piéro dal Vescovo Gian Mateo Giberti e sgrandà nel 1565 ne la forma atuàl cambiandoghe nome in Santa Maria Madalena, la conserva dei afreschi e tele de Bernardino India e del Brusasorsi oltre a 'na Madona in legno del XVI secolo; quèla de Domeara del 1897 su disegno del Fraccaroli e la conserva un afresco con rafigurà el Cristo Maestro del pitór L. Filocamo; quèla de Gargagnago costruida nel 1820 su disegno del Giuliari, decorà nel 1890 e consacrà nel 1939, conserva el simulacro de la Madona de la Misericordia del 1517; quèla de Monte divisa da quèla de Cavalo nel 1735 ma consacrà nel 1836 con baistero del '700; quèla de Sant'Ambroso costruida nel 1785 e 'ndóe nel 1456 l'arciprete el s'éra spostà da la Pieve de San Giorgio su dimanda dei fedeli, la conserva piture de Angelo Da Campo, Orazio Farinati, Paolo Brenzoni e Giambattista Bellotti. Ne la frassión Monte, storicamente nel 1255 secondo el Dalla Corte: "Ezzelino, dubitando che suo fratello Giannotto (Giovan Antonio) potesse tradirlo, lo fece prendere un giorno che questi si trovava fuori città e co' ferri ai piedi e alle mani serrare nel Castèllo di Monte, che è nella Valle Policella e quasi sopra la Chiusa oggidì si ritrova, e poco dappoi". Poco distante dal çentro de la frassión gh'è el forte austriaco Mollinary del 1848 serà al publico ma da 'ndóe se pól gustarse un stupendo panorama. Tra le vile da 'édar la Vila Serego-Alighieri a Gargagnago rifata piassé 'olte e costruida in origine par Piéro Alighieri, quarto fiól del grande poeta Dante e dosento ani dopo nel 1549 l'ultima dissendente Ginevra Alighieri s'à sposà con Marcantonio Serego. 'Sta magnifica vila oltre a le belesse artistiche conservade e zontà dai vari paróni nel corso dei ani, la gà arènte 'na capela dedicà a la Vergine fata costruìr dal Conte pièralvise nel 1637 'ndóe gh'è conservà 'na belissima Madona col Butìn del Liberale da Verona; Vila Rovereti a Domeara del 1780 su disegno del Cristofoli con statue e 'ndóe 'na 'òlta nel XIX secolo gh'éra 'na sorgente d'aqua termal usà par scopi terapeutici; Vila Brenzoni a Sant'Ambroso del '500 da tempo sede de la Mostra Machine Marmo; Vila Nichesola del '500 a Ponton con parti de Scóla sanmicheliana e grandi sale afrescà dal Farinati, 'ndóe un tempo, gh'éra conservà iscrissioni antiche che nel 1612 jè passade al Museo Lapidario Mafeian. "Rus amoenum in quo ... sunt perampla praedia et egregiae aedes" (amena compagna nella quale sono ampli terreni e dimore signorili): cossita nel 1606 el Pona l'a ricordà la vila a pochi ani da la so costrussión e col tempo ànca el Pescetti "deliziosissima e magnifica villa". Da 'édar arènte a la cèsa de San Giorgio inganapoltron el "Museo de la Pieve" con testimonianse de storia, cultura reperti preistoriçi e dei arusnati, are e iscrissioni romane, sculture longobarde e altro material de ogni epoca. E a proposito de poeti, dopo Alighieri Ve lassemo coi versi del nostro grande poeta Berto Barbarani:

Fumane
E tuto intorno a piombo de tirèla
dindola al monte, pronta e sucarina,
I'ua del <<Recioto>> de Valpoleséla
con San Giorgio e Negràr degna Regina,
e castalda del vin de quèla <<Grola>>,
che no ghe manca gnanca la parola!

Val d'Àdese
Quél l'è Volargne e quél l'è Domeliare,
e Sant'Ambrogio de Valpoleséla
coi marmi rossi de le so preare.

foto: Césa de San Giorgio Inganapoltron


Pin It