Sant'Ana

SANT'ANA (Sant'Ana d'Alfaedo)
Popolassión: 2.553 Altessa: 939 metri sóra el livèl del mar
Superfice: 43,43 chilometri quadri Comùni confinanti: Gressana, Arbedo (Erbezzo), Negràr de Valpoleséla, Maràn de Valpoleséla, Fumane, Dolçè, Avio TN, Ala TN

Comùn de la montagna Veronese, ne la Lessinia oçidental sóra a la Valpoleséla con le contrà Campostrin, Cona, Posse, Vaona, Zivelongo e le frassioni: Cerna con Boar, Maso e Spiassi; Fosse con Adamoli, Camparso, Casarole, Coste, Martelungo, Michelazzi, Tommasi; Giare con Saletti; Ronconi Ceredo, Vallene, Cescatto, Laita, Provalo, Selvavècia, Steffani; Vagimàl con Corubio, Crestena e Giardìn. Fin da la Preistoria e par èssar precisi 120 milioni de ani fa nel Paleolitico Inferior, el teritorio, specialmente arènte al Ponte de Veja, l'éra abità da l'òmo, mentre prima, l'éra querto dal mar come ne pól testimoniàr 'na tartaruga marina de 70 milioni de ani fa e 'l squalo fossile lóngo sié metri, el piassé grando d'Italia, catà ne le cave de pièra, ora conservà nel Museo Paleontologico e Preistorico de Sant'Ana. Ne la zona jè presenti ànca resti de insediamenti del Paleolitico Superior, del Mesolitico e del Neolitico con la çiviltà Campignana. Interessanti jè i vilai fortificadi colegà tra lori, de l'Età del Bronso, conossudi come "castèlieri" a San Gioàni, sul Monte Loffa, a le Guaite, a Ceredo e Fosse che nel corso dei secoli fin ai romani i s'à sgrandà pian pianin. Tra i fenòmini naturali da segnalàr el Ponte de Veja, tra le piassé bei de la nostra provincia, 'n arco natural de origine carsica lóngo 52 metri con spessor de 6 metri a quasi 'na trentina de metri dal fondo val, lógo 'ndóe i dise che Dante l'àbia ambientà el giron de le Malebolge del famoso "Inferno" e 'ndóe el Mantegna l'à ciapà ispirassion par l'afresco de la "Camera dei sposi" nel castèl dei Gonzaga a Mantoa; sóra l'altopian del Corno d'Aquilio (1.545 m.) santananome che i dise el possa derivàr dal latin aquilus lógo scuro, fosco, arènte a 'na céseta dedicà a le vitime de la speleologia, gh'è l'entrada a uno dei abissi carsici piassé profondi del mondo, la Spluga de la Preta che la va sóto tera de quasi 900 m.; a poca distansa podémo catàr la Grota del Ciabatin (scarpolin in ver.) scavà nel "rosso amonitico". E pròpio ne le vicinanse de l'Aquilio nàsse el Progno Pantena. Da segnalàr, 'isto che la zona l'éra sfrutà par el pascolo zà ai tempi dei romani, reperti interessanti de l'epoca, come le monéde catade in tuti i çentri piassé importanti de la zona e le do tombe del III d.C. a Cona. Storicamente, dopo el periodo romàn el teritorio l'è stà ocupà dai longobardi, par finìr ne le mane del Monastero de San Zén come ne dise el primo documento scrito su Sant'Ana d'Alfaedo (dal latin fagetum = faggeta e col tempo faedum) in particolar del Monte Loffa nel XI secolo. Un altro documento inveçe, del 1166 el nomina contrà Zivelongo. Ne la seconda metà del XIII secolo nàsse el Comùne de Cona con Alfaedo e Ceredo. Nel 1404 el Comùn el passa sóto a la Republica de Venessia mentre nei documenti del 1454 se parla par la prima 'òlta de la cèsa de San Gioàni in Lofa. Con la tremenda peste del 1630 el nùmaro dei abitanti el s'à dimesà bèn. Nel 1820 ai Austriaçi ghe salta in mente de unir el Comùne de Cona, Alfaedo e Ceredo con quél de Breonio con sede comunàl a Fosse fin al 1866, quando sóto el Regno d'Italia la sede comunàl l'è stà trasferida a Sant'Ana. Nel 1928 nàsse el Comùn de Sant'Ana d'Alfaedo. Interessante dal pónto de vista storico-artistico l'è la ceséta del XI secolo dedicà a San Gioàni Batista sul Monte Lofa, una tra le piassé antiche de la Lessinia, 'ndóe un tempo i dise abità da un eremita. L'atuàl cèsa de Sant'Ana con drénto un bèl dipinto del Balestra, l'è stà ricostruida nel 1626 e nei documenti risulta parochia dal 1458. Ne la frassión piassé popolosa del comun, Cerna, la parochiàl del 1735 sgrandà nel 1954 la g'à un bèl campanìl del 1798 su disegno de Luigi Trezza. Foto: Corno d'Aquilio



Pin It