San Bonifacio

SAN BONIFACIO
Popolassión: 21.284 Altessa: 31 metri sóra el livèl del mar
Superfice: 33,79 chilometri quadri Comùni confinanti: Belfiòr, Soave, Àrcole, Monteforte d'Alpòn, Gambellara VI, Lonigo VI

El comun piassé importante de l'est veronese posissionà a metà tra le çità de Verona e Vicensa lóngo l'antica Via Postumia. I numarosi reperti i pól farne pensàr de la sicura presensa romana ne la zona come nel caso de l'Abassìa de San Piéro a Vilanoa 'ndóe jè stà catà tochi de un capitel, de 'na colona, de monumenti funerari e de lapidi: ne la cripta de la cèsa durante i laori de restauro l'è stà scoerta un ara con sóra scrita 'na dedica a Giove Ottimo Massimo da Eutychus, 'na stele funeraria con sóra el nome de P. Geminius Saturninus, n'iscrission tombal de C. Codius Firmin(us); a Vilabela inveçe l'è vegnù a la luçe 'na lapide con n'iscrission funeraria de P. Rautulanus lanuarius morto a zinque ani; nel campanìl de la cèsa parochiàl de San Bonifacio ghe murà un ara votiva dedicà a Mercurio dai fradei L. Vitorius Festus e O. Vitorius Severus; mentre a Lobia l'è stà catà un cippus de confìn a forma cilindrica 'ndóe i ne dise che'l proconsole Sex. Atiluis Saranus, par ordine del senato romano, l'à messo i confini tra l'agro de Vicensa e quél de Este del 135 a.C.; inveçe a Praicardo scoerti tochi de 'na casa romana; altri reperti del teritorio sanbonifacese jè conservà al Museo Maffeiano e al Museo Archeologico de Verona come la stele funeraria de L. Bellicius Antho e Bellicia Mirtis de la gens Bellicia e del senator L. Bellicius Sollers. Dopo le devastassioni barbarache g'avémo notissie sul paese solo nel VI secolo grassie ai Benedetini, che in località Mota i à costituì 'na comunità agricola dando inissio ànca a la bonifica de la palude tra la via Postumia e l'Àdese denominada Zerpana. Tra el VI e 'l VIII secolo se vede la nàssita de l 'Abassìa de San Piéro de Vilanoa deventado in poco tempo un importante çentro economico-religioso arivando a contrólàr parfin tochi de zone de Legnago e Bardolìn. A la Mota l'éra stà costruì dai ghibelini un castèl, abità par primo da un çerto Milone marchese de Verona, amigo de Berengario Re d'Italia, fiól de Manfredo de Bosso de origini todesche, che nel X secolo l'à vólù 'na ceséta ('ndóe 'desso gh'è quèla de Sant’Abondio) drénto al castèl da dedicar a San Bonifacio, Santo nato in Inghiltera nel 673 e fondator de un fraco de cése in Germania; da quél momento la nòbil casada l'è stà conossuda nel corso dei secoli con el nome de Sambonifacio. I Vescovi e i Papi no vedendo de bòn ocio 'sta faméja i à fato in modo de farghe perdar un poca de autorità in paese, dandoghe tra l'altro la possibilità a la zente del lógo de costituir un libaro Comùn. Nel XIII secolo catémo l'ultimo "Conte de Verona" de la faméja Sambonifacio un çerto Rizzardo che l'à sposà nel 1221 Cunizza da Romano (vedi Divina Commedia, IX canto del Paradiso) sorela del famoso Eselin, che a so 'òlta l'à sposà la sorela del conte par scopi diplomatiçi. Nel 1225 dopo 'na separassion consensual da le "sorele" Eselin e Rizzardo i è ritornadi ai bei tempi, come prima del "matrimonio" quando i cambatea tra de lori; el poro Rizzardo l'è stà butà fora da Verona dopo avér perso. El castèl parò l'è restà ai Sambonifacio che dopo avér respinto i atachi dei Montechi e de Eselin, i à dovudo andàr in esilio a Pàdoa nel 1243 quando el stesso Eselin l'a vinto e butà zò el castèl. I Sambonifacio verso la fin del XIII jè stà butà fora dai Scaligeri, e 'l Comùn l'è passà a Bartolomeo de la Scala destacandolo dal Capitanato de Cologna ma a capo de un Vicariado con sóto le località de tór de Confin, San Gioàni de Locara, Perarolo e Vilanoa, in pratica l'atuàl teritorio sanbonifacese. Sóto i Scaligeri el paese l'éra ne le mane de grosse faméje, fin a quando, i Vescovi de Verona e i Benedetini de Vilanoa che i g'avéa un pochi de teréni ne la zona, jè riussidi a distribuir le propietà ne le mane de un mucio de propietari. Dopo i Scaligeri, i è rivà le signorie dei Visconti che i à portà un poche de guere e dei Carraresi mentre nel 1405 San Bonifacio l'è passà ai Venessiani. Sóto i Venessiani l'è deventà un importante çentro econimico e comerciale grassie al svilupo agricolo. Cossita se vede da 'ste parti, in 'sto periodo, la potente faméja venessiana dei Gritti, che l'à fato costruìr arènte a l'Alpón el Palasso de Vilabela. Sóto el periodo venessiàn la vita l'è andà avanti in tuta tranquilità fin a quando, verso la fin del '700, San Bonifacio no s'à catà in mèso a le lote tra austriaçi e francesi durante la batàjade Àrcole. Dopo 'sto dominio straniero de l'800 nel 1866 San Bonifacio l'è deventà Italiana. Da visitàr assolutamente l'è l'Abassìa de Vilanoa costruida nel VIII secolo e rifata nel XII secolo, con campanìl scomincià nel 1131 par opera de l'Abate Umberto dei Conti de San Bonifacio. La se presenta con 'na bèla fassàda in coto e in tufo mentre drénto l'è a tri navade con elementi romanici, colone con magnifiçi capitei, un altàr in marmo, de le formele con rafigurà la Crocefission con ai lati sene de la vita de Piéro e de Sant'Agata opera del Giolfino; Bei ànca i afreschi del '300 con rafigurà la vita de San Benedéto, una pala d'altàr del '700 de Sante Brentana, tele con rafigurà i 12 Apostoli opere del Guercino, 'na Madona incoronà da la Santissima Trinità con San Michele Arcangelo de Alvise Vivarini, una Pietà in marmo de Egidio da Wilnerneustadt. Sóto la pavimentassión de la cèsa gh'è sepelì quatro dogi mentre merita de sicuro 'na visita l'antica cripta a çinque navade passando par i soteranei e 'l ciòstro. Tra le cése da segnalàr quèla de Sant'Abondio in località Mota costruida sóra ai resti de l'antico castèl in parte ancora visibile, a unica navada con afreschi del XV secolo, 'na statua de San Abondio e 'na Pietà; la cèsa parochiàl ricostruida par la prima 'òlta nel 1769, in verita costruida piassé tempo prima, nel XII secolo con drénto un fantastico altàr maiòr e 'na Madona col Butìn e i Santi del '600; a Locara la cèsa parochiàl, antica capela de l'Abassìa de Vilanova la conserva 'na Natività de la Scóla del Tiziano. Tra le vile da segnalàr la stupenda Vila Gritti a Vilabela, su tri piani, con tór merlada, un bèl giardìn e un magnifica parco; Vila Carlotti del '700 a Proa; Palasso Sandri a San Bonifacio con saloni afrescadi e un bèl parco.