San Gioani Larión

SAN GIOÀNI LARIÓN (San Giovanni Illarione)
Popolassión: 5.113 Altessa: 194 metri sóra el livèl del mar
Superfice: 25,40 chilometri quadri Comùni confinanti: Vèstena, Cassàn de Tramegna, Roncà, Montecìa de Crosara, Tregnago, Chiampo VI

El paese l'è posissionà verso la fin de la Val d'Alpón, in un teritorio conossù par la gran produssión de sirèse de qualità e del vin Durel. San Gioàni Larión, l'éra in epoca mediovàl conossù come San Zuàn de la Rogna e fin al 30 diçembre 1923 el faséa parte de la provincia de Vicensa. La prima testimoniansa scrita del nome de San Gioàni Larión la catémo nel diploma de Enrico IV del 1091, 'ndóe vien elencà tra le tere da darghe al monastero de San Felice de Vicensa, "Sancto Joanne ad Aronna". El termine latin de Aronna, el par, sia stà vólgarisà in la Rogna, termine che i dise el sia riferido a 'n tipo de erbassa infestante, 'na gramégna. El toponimo el s'à trasformà nel tempo in San Joanne in Larogna nel XIV secolo, in Sancto Joanne habente la rogna verso el '400 e par finìr ne la version atuàl nel 1685 su la bóla papàl. Storicamente San Gioàni o Zuàn l'è stà abitada fin da la preistoria, çinquatamila ani fa infati, arènte al monte Calvarina tra le malghe Rocolo e Marognon, dovèa èssarghe un riparo dei cassadori alpini neandertaliani. In epoca alto medioval tuta la val de l' Alpón l'éra sóto l'aministrasion de Vicensa, fin a la metà del XI secolo, quando l'è stà regalà ai veronesi come ricompensa par 'vérghe dato 'na man ai vesentini, ma no S.Gioàni che g'avéa el comercio orientà verso el Veronese. La storia del paese, in 'sto periodo, l'è stà condisionada da numaròse beghe nate par i diriti de pascolo sul Monte Beloca e in zone confinanti, con i Comùni Veronesi in particolàr con Tregnago. El paese l'éra costruido intorno al castèl, 'ndóe 'desso gh'è la cèsa parochiàl de San Gioàni Batista de la frassión òmonima, e pròpio el castèl l'è stà teatro nel corso del XIII secolo de guere tra la nobile faméja dei Malacapela passadi con Verona e 'l Comùne de Vicensa; cossita nel 1241, el podestà de Vicensa l'à ordinà Uguccione de Pileo de Montecio in capo ai vesentini de atacar e no riussendo a sfondàr i à preferido devastàr el teritorio e ciavàr tuto quél che i podéa. Cossita l'ano dopo, grassie a l'aleansa con el famoso Eselìn da Romàn, i è riussidi a farse consegnar da Enrico Malacapela el paese. Durante la signoria scaligera San Gioàni l'è stà messo sóto la giurisdissión de Arzignan e nel 1382 le vien compilade le "Regole del Comùne". Dopo i Scaligeri e i Visconti i è arivadi i Venesiani e ànca in 'sto periodo se vede guere come quèla tra Venesiani e l'esercito milanese comandà da Piccinino, e quèla un secolo piassé tardi durante la Guera de Cambrai. Da 'édar gh'è la parochiàl dedicà a San Gioàni Batista (che someja bèn al Santuario de la madona de Monte Berico) de la frasion Castèl ricostruida ne l' 800 sui resti prima del famoso castèl e dopo de la vècia cèsa. Drénto gh'è conservà un dipinto del '500 con rafigurà la Madona col Butìn tra i Santi Antonio da Pàdoa e San Gioàni Evangelista de Bartolomeo Montagna. Inveçe la cèsa parochiàl in çentro a San Gioàni, l'è dedicada a Santa Caterina e costruida a l'inissio del '900 con 'na bèla fassàda con guje in stile neogotico mentre le fiancade jè decorade con piere bere de basalto de le cave locali. In contrà Scandolaro podémo 'édar la ceséta de San Zén del XIII, in contrà Boarie l'è stà fato costruìr da la faméja Balzi l'Oratorio nel 1715 e a Catignan gh'è la cèsa de fin '800 dedicà a San Benedéto.