San Gioàni Lupatoto

SAN GIOÀNI  (San Giovanni Lupatoto)
Popolassión: 25.066 Altessa: 42 metri sóra el livèl del mar
Superfice: 19,01 chilometri quadri Comùni confinanti: Verona, Butapièra, San Martìn Bonalbergo, Opeàn, Zevio.

El Comùn de San Gioàni l'è posissionà a sud de la çità de Verona e con l'Àdese che'l fa da confìn natural a nord. Le prime testimonianse su la presensa de l'òmo nel teritorio de San Gioàni jè i resti de palafite vegnudi a la luçe a Cà dei Fré a sud de Raldón e la "necropoli" de epoca romana a Campagnòl de Raldón oltre a 'na tomba ne la frassión Pósso. De la stessa epoca jè ànca le 50 monéde catà da un contadin sempre arènte a Raldón del tempo de Costantino (312-333 d.C.), Valentiniano (364-375 d.C.) Valente (364-378 d.C.) e la vila romana a le Marchesane. Tra le curiosità del tempo, secondo i nostri storiçi Maffei e Cipolla, a Raldón podarìa essarghe stà la famosa batàja dei Campi Raudii tra i romani e i cimbri (Raudium> Raudion> Raudon> Raldón) e no a Vercelli. Su l'origine del nome de San Gioàni Lupatoto gh'è varie versioni come quèla che catémo in un documento del 1178 "Sanctus Johannes ad lupum totum", lógo 'ndóe gh'éra la presensa dei lòvi (lupi) che da la Lessinia vegnéa zo ne la campagna; da "lupia" tipo de gramégna; da "Lucus totus" par la presensa de boschi. El 28 agosto del 1233 d.C. ne la piana a destra de l'Àdese l'è stà siglà la famosa paçe de Paquara su inissiativa del dòminican Fra Gioàni da Schio par finìr fora le numaròse e sanguinose lote nel teritorio, presenti i Da Romano, i Estensi, i Veronesi con Vescovo e Podestà, i "Caroci" con un fraco de soldà, i vescovi de un bèl poche de çità e 'l Legato Apostolico. Tempo dopo s'à 'isto la scalada al poter de Fra Gioàni da Schio a Vicensa e a Verona, deventando duca e retor ma goernando col teror; le do çità stufe del frate i l'à butà fora riciapandose l'autonomia perduda. In 'ste tere concesse dal Comùn de Verona ai contadini, nel 1405 con l'arivo dei Venessiani l'éra stà costituida la sede del Vicariado de Cà de Campagna, un consorsio che'l gestiva 'sta parte del teritorio secondo el metodo de l'antica sudivision: "Campanea Minor" a sanca de l'Àdese fin a San Martìn bòn Albergo e "Campanea Major" da San Gioàni Lupatoto a Somacampagna. Vicariado che'l riuniva oltre a 'sto Comùn ànca Butapièra, Cadidai, Castèl d'Assàn, Vigasi, Somacampagna e g'avéa sede a Cà de Macici. In sto periodo nasse la coltivassión dei morari par i cavaleri, che s'à rivelà 'na discreta fonte de schèi. Nei secoli XVI e XVII s'à 'isto nobili faméje Veronesi e Venessiane crompar un poche de zone messe mal da par poder coltivàr, Bevilacqua, Lazise, Maffei, Bongiovanni, Mocenigo, Sagramoso ecc... Cosita verso el '600 i Bongiovanni, i Contarini e i Mocenigo i avéa dimandà e otegnù dal Magistrato ai Beni Inculti de Venessia de poder far rivar l'aqua de l'Àdese in 'ste tere, travérso de le derivassioni idriche ciamade Boche de Sorio. Nel 1630 l'è passà la peste, dimesando piassé de metà de la popolassión e grassie ànca ai todéschi che 'ndóe i passava i ciavava de tuto, San Gioàni l'éra in miseria in 'na tera desolà. Ma 'pena finìo 'sto periodo scomincia 'na lenta ripresa in tuta tranquilità e ne risulta da la mapa de l'Archivio de Stato de Verona in data Milan 4 diçembre 1817, che'l teritorio l'éra diviso in do comuni, con San Gioàni Lupatoto a nord de l'atuàl via Palustrela mentre a sud gh'éra Raldón che'l comprendea la zona tra el Menago a ovest e la strada par Palù a est, sensa desméntegàrse de la località pósso. Nel XVIII l'economia local l'éra nel masimo splendór, grassie sóratuto a la costrussión de 'na strada par i cari in diressión Verona. Nel 1796 quando l'è rivà Napoleón jè rivà un poche de rogne, ma par fortuna el teritorio de San Gioàni l'è stà interessà solo in parte a le batàje tra francesi e austriaçi come quèla del 1798 ne la vissina Magnan de Butapièra. Nel 1818 el comun de Raldón che la Serenissima l'avéa messo con San Gioàni Lupatoto, sóto i austriaçi l'è stà diviso in do: la parte est al Comùne de Zevio con le località Bianca e Maffea mentre la parte ovest con Raldón, Pampaluna e Cà de Fré al Comùne de San Gioàni. Dopo la prima Guera de Indipendensa i austriaçi, i à costruido de le fortificassioni intorno a Verona e pròpio nel teritorio comunàl de San Gioàni, el Forte Cà Vecia. Nel 1866 el Comùne deventa Italian con a capo nel 1897 el sindaco Alfonso Zénetti, nel 1927 l'è passà a le dipensense de Verona ma tornando autonòmo nel 1933. A l'inissio del '900 secondo Luigi Sormani Moretti (regio prefeto) ne la so monografia su la provincia de Verona el teritorio de San Gioàni l'éra: " Dalle porte quasi della città, da presso Tombetta e Pestrino ... sino alla sinistra sponda dell'Adige sotto il forte di Santa Caterina, dove sono Ca' de' Dossi e Ca' de' Maffei o di Mazzè, il territorio di San Gioàni, passando per ... Paquara, per Sant'Andrea ..., per Vignale, per Camotto, per Lettobon, per canàli tracciati, aperti ma finora vuoti, del cessato Consorzio Giuliari, raggiunte in riva all'Adige le Bocche di Sorio, presa d'acqua ad irrigare le sottoposte campagne, e di là per l'oratorio di San Pietro, per Sorio stesso dov'éra un antico castèllo, per la Croce dei Tre Frati e per Ca' dei Zermani, arriva al Capoluogo. All'est di questo ed al sud, incontransi poi, dopo molti piccoli poderi e diverse fattorie, le frazioni di Pozzo con 134 case e di Ca' di Massicei, delle quali il tenere del Comùne prolungasi in una stretta linea intersecata da fossi e canàli insino a Pampaluna, a Ca' Nuova, a Ca' del Pra, alla frazione di Raldón con 197 case, andando in ultimo, per una lingua di terra in forma d'ascia, dove sono le località dette Casette o Ca' dei Fré, a ficcarsi nel Comùne di Oppeano" mentre el grande Luigi Simoni nel '900 ne la so Guida de Verona e Provincia "Paese industre e sede di opifici....dopo l'apertura del nuovo canàle derivato dall'Adige. In antico i Contarini, i Mocenigo e i Sagramoso ne avevano solo derivato uno ad uso agricolo". Tra le cése da segnalàr la parochiàl dedicà a San Gioàni Batista costruida nel 1765 mentre dal 1458 la parochia la dipendea da quèla de Vilafranca e dal 1553 da la Catedral. Drénto gh'è conservà 'na tela del Farinati con rafigurà San Roco, San Gioàni Batista e Sant'Ana. In contrà Sorio gh'è la ceséta de San Piéro Martire del 1585, in contrà Pontonsel la ceséta de San Girolamo del 1618 e par finìr la ceséta de la Madonina del '600 con piture del Resi. Tra le vile da segnalàr Vila Palazzoli del '700 ma ricostruida nel 1820, Vila Wallner del '400 modificà piassé 'olte e Corte Pampulana del '500 restaurà nel 1904 dopo che i g'avéa tacà fogo.


Pin It