San Martìn

SAN MARTÌN (San Martino Buon Albergo)
Popolassión: 13.095 Altessa: 38 metri sóra el livèl del mar
Superfice: 20,40 chilometri quadri Comùni confinanti: Verona, Messane de Sóto, Caldièr, Zevio, San Gioàni Lupatoto, Lavagno.

Importante Comùn a est de Verona a pochi chilometri da la çità e posissionà lóngo la strada statàl 11 che un tempo l'éra el percorso de l'antica Via Postumia. Probabili i è infati le origini romane del paese come ne dimostra el cippus romàn catà arènte a la cèsa parochiàl un tempo pagàna e dedicà al Dio Bono Evento che secondo el storico veronese Lodovico conte Moscardo in un so libro scrito nel 1762 "fu adorato anco dai Veronesi, avanti che avessero introdotta nella città la Religione Christiana, il cui tempio è credibile che fosse dove ora è la Chiesa di San Martino Buon Albergo, quattro miglia discosto da Verona, per il testimonio che rende un’ antica pietra ritrovata in quélla Chiesa ed hora appresso di me, che ha servito per piedistallo al simulacro di questo Idolo, nel quale si legge BONO EVENTO, che in questo modo al loco ritiene quasi l’antico nome, havendo mutato di Bono Evento in Buon Albergo, cioè da bòn evento a bòn ospizio" Secondo Luigi Simeoni el toponimo podarìa derivàr dal fato che, el paese ai tempi dei romani, essendo stà a l'incroso tra la Via Postumia e la Via Porcilana, el g'avesse 'na stassión de posta, cambio cavài e dei posti 'ndóe el viandante o el pelegrin el podesse fermarse par sponsàr e magnàr. Altri reperti come scrite su pièra e lapidi jè stà catà ànca ne la frassión Marçelise che i pól confermarne de la presensa romana in 'sta zona. Tra i fati storiçi piassé importanti e conossudi g'avémo quél del 27 setembre 489 d.C., 'ndóe, lóngo el progno Fibio, i s'à scontrà i soldà de Teodorico e Odoacre con la vitoria final da parte dei Ostrogoti e la conseguente invasion e dominassión in Italia. Tra i primi documenti scriti su San Martìn g'avémo quél del 1146 'ndóe se parla de la ceséta dedicà a San Martìn da Tours aministrà da l'Abassìa de San Zén, regalà dai Degani de Lavagno con relativi teréni e la possibilità de aministrarse, donassión confermà col tempo da parte de Federico I e da Urbano III. A San Martìn s'à fermà un fraco de eserciti prima de tacar Verona e par 'sto motivo la storia del paese l'è bèn colegada a quèla çitadina. Nel 1509 a San Martìn infati, el s'éra fermà l'esercito Venessian prima de dichiar guera a Massimilian d'Austria che'l contrólava la çità mentre nel 1701, da 'ste parti i è passadi i soldà guidà dal prinçipe Eugenio che travérso la Lessinia in diressión Legnago sensa farse scoèrzar dai francesi. Nel 1796 el generàl francese Augerau l'avéa tacà i soldà austriaçi del generàl Hohenzollern che da 'ste parte i s'éra fermà e grassie a l'arivo de Napoleón l'è rivà ànca la vitoria. Nel 1813 altri scontri tra 'sti du eserciti, ma 'sta 'òlta con la ritirada fin a Verona dei francesi. Cossita a causa de le guere, le numaròse atività industriali e comerciali jè andà piassé 'olte in roina come quéle che i éra partide al tempo dei Scaligeri, le famose cartiere che le avéa dà lustro al paese tanto da farlo ciamar San Martìn de le Cartiere, i lanifici "gualchiere" e i molini che chi, grassie a le aque del progno Fibio (che'l nàsse a Montorio e finisse nel progno de Ilasi e dopo ne l'Àdese) i s'éra svilupadi, sensa desméntegàrse de la Ferriera che l'à fato nome a la frassión Ferasse. In pratica el Fibio l'è sempre stà par i abitanti fonte de vita e de guadagno e par questo motivo sfrutà bèn. Con un decreto del 1927 l'è nato l'atuàl Comùn de San Martìn, unendoghe el Comùn de Marcelise e parte dei teritori dei ex-comuni de San Michele Extra e Montorio. Al dì de ancò le frassioni jè Marçelise, Mambrota e Ferasse. Tra le cése da segnalàr la parochiàl dedicà a San Martìn da Tours costruida sóra ai resti de n'altra antica nel XV secolo ma ricostruida nel 1744. Drénto ghe conservado 'na pala del Ottino con rafigurà San Martìn Vescovo, 'na tela no finìa de Wenceslao Huberti e 'na statua del '400 con rafigurà la Madona in Trono col Butìn, mentre ne l'oratorio gh'è 'na tela del '600 con Sant'Antonio e i so miracoli. Ne la frassión Marcelise gh'è la parochiàl dedicà a San Piéro in Catedra ricordà nel 1460 ma ricostruida nel 1830 su disegno del Barbieri, la conserva: du tele con rafigurà Santa Maria Madalena insieme con Santa Caterina Vergine e San Giorgio insieme con San Benedéto Abate, opere de Girolamo Dai Libri; du tele con rafigurà i Profeti (Isaia-Daniele), e la Madona insieme a San Giusepe in adorassion de Gesù, opere del Morone; inoltre se pól 'édar altre opere del Caliari e del Cignaroli. Tra le vile la piassè importante l'è quèla dei duchi D'Acquarone conossuda come Vila Musella dal nome de la faméja che l'à fata costruìr tra el XVI e XVII secolo, i Muselli; çircondà da un grande parco con statue la conserva opere de grande valòr storico e artistico. Vila Terreno nel XVI secolo propietà de la faméja Orti Manara nel '700 su la strada par Marcelise. Arènte al col de San Brissio, Vila Zamboni con parco, sculture e piture. Altre vile nel teritorio comunàl jè Vila Malagnini, Vila Sancassani, Vila la Ferrari, Vila Gaspari, Vila Sogara.Tra le piassé conossude ghe ànca la famosa Vila Girasole progetà nei ani '50 da Angelo Invernizzi, 'na vila girevóle che, grassie a dei mecanismi la pól giràr su se stessa durante la giornada, mostrando cossita, la fassàda al sol. E alora, ne resta che magnàr un bòn piato de spàrasi de la Mambrota o magari una mucio de sirése de Marçelise bevendoghe drio un bòn goto de vin......


Pin It