San Piéro in Cariàn

SAN PIÉRO IN CARIÀN (San Pietro In Cariàno)
Popolassión: 12.897 Altessa: 151 metri sóra el livèl del mar
Superfice: 20.24 chilometri quadri Comùni confinanti: Fumane, Maran, Negràr, Pescantina, Sant'Ambroso, Verona.

Comùn posissionà nel cor de la Valpoleséla con le frassioni Bure, Castèlroto, Corubio, Pedemonte e S.Fioran. L'òmo l'è presente in 'sto teritorio fin da la preistoria come i pól dimostràr i reperti del Neolitico vegnudi a la luçe in diverse località e 'n vilàio protostorico a Castèlroto. Ai tempi dei romani el teritorio de San Piéro in Cariàn, dovarìa èssar stà 'na zona de un çerto prestigio, 'isto i resti de case rusteghe rinvegnù a Ambrosan de S.Fioran (it.Floriano), Castèlroto e in località Quar. El toponimo Corubio (da Quadrivium incroso de quatro strade) e 'l reperto de un segnàl meiàr (it. miliare) i ricorda el passàio de la Via Claudia Augusta Padana o de 'na so derivassion. Altri reperti de l'epoca romana jè le steli funebri come quèla dedicà a Arnia Aquileia catà a Corubio e altre a Bure, are funerarie come quèla de Arria Protilde sempre a Corubio e quèla de Vario Massimo a San Fioràn, le scrite e i pilòti de pièra ne la fassàda de la Pieve de San Fioran e le tombe vegnù a la luçe a S.Piéro in Cariàn. Secondo i storiçi el nome "Cariàn", che l'è ànca 'na contrada arènte al paese, el par vegnér dal tardo latin Carilianus, terén de propietà de Carilius. 'Sto teritorio l'è posissionà tra Verona e la Val d'Àdese el nel corso dei secoli la 'isto el passàio de numarosi eserciti. Un pónto strategico difensivo che'l vardava da l'alto la campagna l'éra el borgo fortificà de Castèlroto, cosita ciamà dal nome del probabile costrutor del primo castèl "Castrum Rotharii", el re longobardo Rotario; el castèl l'è restà in pié fin al periodo visconteo e al dì de ancò podémo 'édar solo qualche toco de muro. Nel periodo Scaligero la Valpoleséla l'éra goernà da Federico De la Scala fin a quando no l'è stà butà fora da Cangrande parché l'avéa tentà de ciavàrghe el poter a Verona. Sóto la Serenissima San Piéro in Carian l'è stà sede del Vicariato de la Valpoleséla, un organo aministrativo che'l se gestiva da solo, sóratuto grassie ai privilegi in bòna parte concessi ne l'epoca Scaligera da Federico De la Scala e riconfermadi dai Venessiani. La costrussión piassé importante dal pónto de 'ista storico e artistico nel teritorio de San Piéro in Carian, l'è l'antichissima Pieve de S.Fioran nata nel periodo longobardo (forse costruì al posto de un tempio pagano) come i pól dimostràr i numarosi reperti de l'VIII secolo presenti ne la cèsa; quèla atuàl parò l'è del XII secolo modificà nel XV e XVIII secolo. In 'sto lógo nel 905 l'è stà scrito un diploma 'ndóe se lese che Re Berengario l'à concesso a un so servo de un poche de tere. De la cèsa originaria ghè restà el muro a nord e un toco de abside che'l va dal campanìl a la sagrestia. no podémo desméntegàrse del magnifico campanìl con parti antiche, forse un tempo tór de 'na fortificassion usà par difendarse dai barbari, el ciòstro del XVI secolo, el fonte batesimal in mono bloco de marmo rosso. La cèsa l'è a tri navade, un tempo sede religiosa de la Valpoleséla con altre do pievi, conserva afreschi sia drénto che fora, 'na tela del Brusasorzi e 'na Madona in legno del '400. La cèsa de San Piéro in Carian l'éra parochia zà dal 1458 mentre quèla atuàl l'è stà costruì nel 1830 su disegno del Barbieri. Del '300 l'è l'origine de la cèsa de Bure dedicà a San Martìn e ricostruida nel '900; del 1828 l'è la cèsa parochiàl de Castèlroto dedicà a Sant'Ulderico costruì sóra ai resti de un altro tempio; nel teritorio de la parochia de Castèlroto da segnalàr ànca la Capela de Ognissanti in contrà Negarine del 1300 e la cèsa dedicà ai Santi Martìn e Roco a Corubio in parte gotica e in parte romanica che la conserva piture del '300 del Maestro Cicogna. San Piéro in Carian l'è conossù oltre par la produssión del vin Valpoleséla ànca par le numaròse vile sparse chi e là: intorno a la "çità" de San Piéro in Carian podémo catàr Vila Verità de l'800 in stil neoclassico; Vila Borghetti-Falcieri del XIX secolo da 'ndóe se gode un bèl panorama; Vila Galli-Righi in posission magnifica con bèl parco; Vila Acquistapace-Castèllani del '500 de Scóla paladiana, con colone doriche, statue e lòsa; Vila Costanza del '600 con magnifico pòrtego e particolar par le do fasade una davanti e 'n altra de drio; del XVI secolo l'è Vila Galtàrossa. A Bure podémo catàr Vila Buri-Forapan del '500 con afreschi decorativi e Vila Monga-Castèllani ne le forma atuàl dal XIX secolo grassie a Luigi Trezza. A Castèlroto gh'è Vila Bellini-Carnesali del XVI secolo e Vila Sacchetti-Sagramoso del '400. A Cengia Vila Fagiuoli del '500 in stil sanmichelian. A Corubio vila Amistà del '700 costruì su disegno de Ignassio Pelegrini: In contrà Squaran catémo Vila Fumanelli costruì nel '600 sóra ai resti de la residensa de Re Bergario del X secolo. A Pedemonte in contrà Quar Vila Perez-Bertani-Montresor de Scóla sanmicheliana e Vila De Besi del '500. Arènte a Pedemonte la belissima Vila Santa Sofia vólù da la faméja Serego nel XVI secolo e costruì su disegno del Palladio mentre poco distante catémo la ceséta de Santa Sofia del XV secolo con magnifiçi afreschi e a San Fioran de l'800 l'è Vila Lebrecht.