Sanguiné

SANGUINÉ (Sanguinetto)
Popolassión: 4.101 Altessa: 19 metri sóra el livèl del mar
Superfice: 13,51 chilometri quadri Comùni confinanti: Nogara, Salissòl, Gazo Veronese, Cerea, Concamarise, Caselón.

Comùn de la Bassa Veronese a 40 chilometri in diressión sud-est da Verona posissionà tra i fiumi Tartaro e Menago. Sembrarìa che 'l nome Sanguinè secondo la toponomastica el possa vegnér da la pianta ciamada "Corpus Sanguinea" dai rami color porpora o rosso scuro e coi fruti neri che no te podei magnàr; un tempo coi rami piassé zoeni se faséa le spassaore. El primo vilàio in pratica l'éra stà costruì 'ndóe gh'éra 'na distesa de sanguenele o sanguini come ne dise uno dei primi documenti che i parla del paese. Gh'è inveçe ci dise che'l nome de 'sto Comùn el vegna dal latin "sanguinis" par le tremende batàje che nel corso dei ani jè stà combatù da 'ste parti, ipotesi parò da scartar. El primo documento che ne parla de Sanguinè l'è del 930 mentre tra i primi reperti storiçi da segnalàr la scoerta de un par de anfore e 'na cassa de monéde romane in località Venera. ànca se Sanguinè l'éra bèn fortificada e g'avéa un bèl castèl, nel 1232 l'è stà messa sóto-sóra dai mantoani; cossita del primo castèl no ghe restà pì gnente ma poco tempo dopo l'è stà rimesso in pié da nóvo e nel 1377 insieme col feudo l'è stà regalà dai fradei Antonio e Bartolomeo De la Scala a Jacopo Dal Verme che a so 'òlta el ghe l'à consegnà a so fiól. Nel 1451 el feudo el vien confiscà ai Dal Verme dai Venessiani parché ritegnùdi traditori e consegnà al Capitan de la Serenissima Gentile de la Leonessa con relativo titolo de conte che podéa trasmetar ai dissendenti, sia òmini che done; infati quando l'è morto lè propietà de Sanguinè jè stà divise fra le fióle: Milla sposa de Francesco Lion da Pàdoa, Tarsia sposa de Alessandro Venier da Venessia e Batistina sposa de Leonardo Martinego da Bressia. Nel 1438 Sanguinè l'è stà conquistà da Alfonso de Calabria par Ferara e poco tempo dopo riciapà dai Venessiani. sanguinNel 1509 durante la guera de Cambrai Sanguinè l'è passà sóto le trupe imperiali e nel 1511 i francesi jà remissià el paese. Par el resto la vita sóto la Republica de Venessia l'è andà avanti 'bastansa tranquila fin a l'800 quando jè passà: Napoleón (1796 e 1804), l'imperadór Francesco Giusepe (Ceco Bepe 1848) e Giusepe Garibaldi (1863). Tra le personalità famose che jè passà da Sanguinè da segnalàr Carlo Goldoni nel 1751 mentre Ugo Foscolo, Ippolito Pindemonte, Pietro Verri e Giulio Perticari i à sponsà a "l'Albergo de la Posta" la note del 15 setembre 1810. Tra le cése da segnalàr la Césa e 'l Convento de S.Maria de le Grazie conossuda come la "Ceséta dei Frati", complesso costruì a l'inissio del '600 da l' Ordine Minor dei Francescani "Socolanti"; da'édar drénto la cèsa, tri dipinti in gesso con rafigurà "l'Angelo Musicante", "Madona Sùnta in çiél" e " Du puti con cartijo". Del convento gh'è restà parte del ciòstro e un bèl pósso. Conossudo l'è "l'Oratorio de le Tri vie" ciamà ànca "Ceséta de la Rotonda" o "Ceséta del Capo de Sóto" costruì nel 1747 'ndóe gh'éra un capitel co l' imagine de la Madona, su progeto de Alessandro Pompei. La cèsa parochiàl de Sanguinè, dedicà a San Giorgio, l'è stà costruì su l'area de l'antica cèsa tra el 1802 e 'l 1826 su disegno de Gioàni Canella e la conserva opere de Agostino Pegrassi e de Gaetano Miolato; la prima cèsa l'éra 'na Capela a le dipendense de quèla de Casaleòn (docum. 1145 d.C.) ma passà col tempo ne le mane de le faméje nobili de Sanguinè (Dal Verme, Lion, Venier, Martinengo) con poter decisional su la nomina del prete. Tra i palassi da segnalàr Palasso Taidelli e Palasso Betti de fin '700 'ndóe i à sponsà Francesco Giusepe e Giusepe Garibaldi mentre lóngo la strada par Sustinenza gh'è "la Rangona" palasso del XVI secolo. Da visitàr par ci passa da 'ste parti l'è sicuramente el castèl modifica piassé 'olte nei secoli ma sempre magnifico e magico.


Pin It