Sóna

SÓNA
Popolassión: 17.683 Altessa: 169 metri sóra el livèl del mar
Superfice: 41,15 chilometri quadri Comùni confinanti: Verona, Somacanpagna, Valéso sul Menso, Castèlnòo del Garda, Bussolengo

El teritorio comunàl el se cata a ovest de la çità de Verona e l'è diviso in du parti, un toco in pianura con la frassión Lugagnàn e 'l resto posissionà sóra a le coline moreniche del Garda con el Comùn de Sona e le frassioni San Giorgio in Salici e Palassòl. L'òmo l'è presente in 'sto teritorio fin da la preistoria come i pól dimostràr i reperti vegnudi a la luçe de le popolassióni teramarìcole e euganee, tochi de un castelièr e de 'na scudèla neolitica a San Giorgio in Salici. In epoca romana Sona 'isto la so posissión strategica l'éra un bèl pónto de contrólo su le vie de passàio, par 'sto motivo, nei secoli l'è stà teatro de guere de 'na çerta importansa. Dopo la fin de l'Impero romàn jè rivà i Longobardi e Sona l'è stà inserida ne la Iudicaria Gardensis, un sistema giuridico e aministrativo de l'area gardesana; a testimoniansa del periodo longobardo l'è restà el toponimo "Palazzolo" (ver. Palassòl) da "Palatiolum", palasseto, forse çentro de comando e lógo sóto la giurisdissión de le autorità çitadine. El primo documento che'l parla de Sona l'è del XII secolo, 'ndóe se lese de 'na compravendita de teréni da parte del Monastero de San Zén. Tra el XII e 'l XIII secolo el Comùn de Verona dopo essarse rinforsà, par gestirse mejo dal pónto de 'ista aministrativo, l'avéa sudiviso i teritori dei comuni rurali o de campagna in Distreti e Colonei, cossita Lugagnan faséa parte de la "Campagna Veronese" e Sona del "Colonel de la Gardesana", restà in pié par tuto el medioevo. Nel XIII secolo numaròse jè stà le batàje tra guelfi e ghibelini e Sona l'è stà messa sóto sóra, con distrussioni e robarie. I Scaligeri 'isto l'importansa militàr de la zona i à pensà de fortificarla bèn e nel çentro de Palassol podémo 'dar ancora al dì de ancò la tór merlada de propietà del Comùn. Finìo sto periodo e 'l passàio de Visconti e Cararesi, Sona a l'inissio del XV secolo l'éra entrà a far parte de la Republica de Venessia gestida con la frassión Palassòl dal Vicariato de Bussolengo. Nei quatro secoli "venessiani" s'à svilupà bèn l'economia sóratuto grassie a l'agricoltura con la coltivassión dei morari par l'industria de la seda. Cascà la Republica de Venessia par man de Napoleón a la fin del XVIII secolo, ànca Sona l'è entrà verso la metà de l'800 nel lóngo periodo de le guere de indipendensa, no solo partecipando ma deventando teatro de batàje, con vitorie un colpo da 'na parte e un colpo da l'altra tra l'esercito dei Savoia e i Austriaçi. Tra le cése da segnalàr quèla de Santa Giustina a Palassòl costruida verso el 1000 sui resti de 'n altra cèsa; la se presenta a 'na sola navada e du absidi, con arènte 'na capela zontà del XVI secolo e circondà da un çimitero picenìn. Magnifici jè i afreschi in stil bisantìn del XIII secolo e carateristico l'è el campanìl a bifore. Fata coi sassi de l'Àdese come quél de Santa Giustina l'è la cèsa dei Santi Quirico e Giulitta del XIII secolo un tempo tacà a un convento de i Dòminicani, conserva dei stupendi afreschi come la "Crocefissioón" del Liberale ne l'abside. Ne la parochiàl de Palassolo dedicà ai Santi Giacòmo e Giustina costruida a metà del XIX secolo trasformando un vècio Oratorio dedicà a San Giacòmo del '400, podémo 'édar un bèl altàr dedicà a San Luigi del 1716 fato da la Società Corpus Domini e de le decorassioni del VIII secolo. A San Giorgio in Salici podémo 'édar la cèsa parochiàl del XVIII secolo costruida su disegno del Trezza in un lógo 'ndóe gh'éra un altro tempio ricordà tra i le propietà del Capitolo de la Catedral nei documenti del XII secolo. A Sona inveçe, la cèsa parochiàl del '700 un tempo dedicà a San Salvator la conserva 'na tela del '600 con rafigurà San Roco. Tra le vile da segnalàr quéle de Sona: Vila Giarola del XVIII secolo, Vila Trevisan-Calderari del XIX secolo, Vila Consolaro del XVIII secolo, Vila Sparici "dei Cipressi" del XIX secolo, Vila Silvestri "la Selara" del XIX secolo, Vila Macola del XVII secolo; a San Giorgio in Salici: Vila Bajetta del XVII secolo e Vila Giusti del giardìn in loc. Guastala Nova del XVII secolo; a Palassol gh'è Vila Schizzi del XVIII secolo e vila Berzacola "Belvedere" del XVIII secolo. 'ndóe Carlo Alberto e Ferdinando Maria Duca de Genova i à vardà le sorti de la batàja de Pastrendo del 30 april 1848. Tra le curiosità dovemo segnalàr che la frassión Lugagnàn un tempo divisa tra Verona, Bussolengo, Somacampagna e Sona, dal 1975 con referendum popolar l'è passà interamente sóto al comun de Sona. Da 'édar l'è el Museo Civico "Attilio Fedrigo" con materiali fossili da liItalia e dal'estero, 'na colessión de reperti de tute le ere geologiche, dal Paleozoico fin al periodo Oleocenico. Importanti jè reperti i trilobiti, graptoliti, ortoceratidi del'Era Primaria, grandi amoniti del'Era Secondaria, un pochi de grandi gasteropodi del Tersiario e resti de elefanti e altri bestie del'Era Quaternaria.


Pin It