Sorgà

SORGÀ
Popolassión: 3.042 Altessa: 25 metri sóra el livèl del mar
Superfice: 31,54 chilometri quadri Comùni confinanti: Erbè, Nogara, Gazo Veronese, Traénsòl, Villimpenta MN, Castèl d'Ario MN, Bigarello MN, Castèlbelforte MN

Comùne de la Bassa Veronese al confìn con la provincia de Mantoa e travérsà par tuta la so longhessa dal fiume Tión, che'l passa arènte a le frassioni Pontepossero, Tór Masin, Bonferar, Pampuro e Moratica. 'Sto teritorio l'è stà abità fin da la preistoria come ne dimostra i reperti archeologici catadi a Sorgà e in particolar a Bonferar de l'età del Bronso. El sito archeologico piassé importante, l'è quél de 'sta frassión arènte al molin, con resti rinvegnudi come vasi, colane, roba varia e sepolture de la çiviltà atestina. Le prime testimonianse scrite jè del IX secolo, quando l'è passà ne le mane del Monastero de San Zén quél picenìn de Moratica. El toponimo Sorgà el g'avù varie trasformassioni Suregàda nel’889 e Surgàda nel 927 e par che'l vegna dal latino suricum, “sorgo, saggina, mèlega in veronese”.. Nel 928 Sorgà la vien confermà come feudo, tra i possedimenti del Monastero dei Benedetini de Santa Maria in Organo da Ugo Re d'Italia. Monastero passado col tempo a l'ordine dei Benedetini Olivetani, riconfermando el feudo e la so gestión durà fin a la fine del XVI secolo. Un documento del 1571 ne dise de la vendita dei beni del Monastero de Santa Maria in Organo ai conti Gottardo e Giacòmo Murari. L'autorità de le istitussioni religiose l'è rimasta tal fin a l'arivo de Napoleón a l'inissio del XIX secolo, quando le à fate serar. Pontepossero inveçe l'éra feudo dei Canonici de la Catedral nel XII secolo, passado in epoca Scaligera ai De la Scala e comprà dai Conti venessiani Grimani nel 1406, quando tuti i beni de la nòbil casada veronese jè stà messi a l'asta da la Serenissima. In epoca venessiàna la gestión del teritorio de Sorgà l'éra ne le mane de le nobili faméje, infati podémo amiràr ancora splendide abitasioni, come l'elegante Vila Grimani fata costruìr da la faméja òmonima nel XVIII secolo a Pontepossero, deventà col tempo de propietà de la faméja Balestrieri. Poco distante sul fiume Tión, l'antico molin e la pila del XIV secolo; a Sorgà gh'è Palasso Murari del '500 conossù come "Palasson del Diaolo" a causa de una legenda che la disèa de la probabile presensa del diaolo drénto la costrussión e de le lote tra lu e 'l paroco del paese; Vila Bogoni del 1460, con afreschi de Giulio Romano alievo de Raffaello, abitada nel XVI dai Gonzaga; a Bonferar l'antica Vadum Ferrarii gh'è Vila Brà del XVI secolo con arènte el Museo de la civiltà Contadina. Tra le cése da segnalàr la parochiàl dedicà a la Natività de Maria a Sorgà, conossuda fin dal X secolo e ricostruida a la fine del XV secolo mentre l'oratorio arènte l'è del XVII secolo. La cèsa la conserva dei magnifici afreschi del Morone e del Maestro Agostino, del Creara; la pala del Coro con rafigurà la Madona coi Santi l'è del Farinati. Se pól amiràr ànca un bèl batistero del '500 con sóra, come el portal, i stemi dei Olivetani e de l'Organo simbolo del monastero parón de Sorgà; altra cèsa l'è quèla de Pontepossero dedicà a Tuti i Santi e ricordà fin dal XI secolo e ricostruida nel XVIII secolo. Drénto gh'è le pale del Brusasorzi e del Cignaroli oltre a un bèl fonte batesimal del XV secolo in marmo bianco. no bisògna desméntegàrse de la Corte Decima, 'na costrussión fata ànca coi resti del vècio castèl mediovàl del paese. Come dise el nome, vegnéa esercità l'autorità civile, prima dai monaci e col tempo dai Grimani. Tra le curiosità da segnalàr che Pampuro l'è entrà a far parte de la provincia veronese verso la metà de l'800, prima l'éra sóto Castèllaro de Mantoa.