Vilafrànca

VILAFRÀNCA (Villafrànca di Verona)
Popolassión: 33.194 Altessa: 54 metri sóra el livèl del mar
Superfice: 57,34 chilometri quadri Comùni confinanti: Vigasi, Castèl D'Assàn, Poiàn, Valéso sul Menso, Somacampagna, Verona, Mossecàn.

Vilafranca l'è uno dei Comùni de la Provincia Veronese piassé popolà a quasi 20 km in diressión sud-ovest da Verona. Da 'na stassión Eneolitica nel teritorio de Vilafranca jè vegnù a la luçe tredese scheletri, un alabarda, un petoràl d'arsénto e 'na sepoltura, che ne pól far capir l'importansa strategica fin da la preistoria de 'sto paese. De epoca romana inveçe l'è 'na scrita su pièra dedicà a Tiberio, scoerta nel 1872 a la base de la tór del castèl, che la ne fa vegnér a conossensa, tra l'altro, de l'esistensa de un arco costruido lóngo la Via Postumia, antica strada che nel so percorso verso Verona la taiàva Vilafranca. Nel stesso lógo jè stà catà ànca un poche de monéde, mentre un altra scrita ma de tipo funebre, grassie al Cipolla, l'è vegnù a la luçe sóto el tabernacolo de l'altàr magiòr de la vècia cèsa parochiàl, che la parla de 'na dedica de Lucio Aquilio a so mama e a so bupà. Con tuta probabilità da 'ste parti, ai tempi dei romani, gh'éra un campo trincerà nato par difendarse da le invasioni dei cimbri a la fin del II secolo a.C. e tra le ipotesi se pól pensàr ànca che la gens Probiana, o mejo, i dissendenti de l'Imperadòr Probio nel III secolo d.C. i fusse vegnù a vivar in quèla che 'desso ciamemo Prabiano, conossuda come scrito sui documenti del IX secolo come "Probianum". Alcuni studiosi i dise che, el çentro de Vilafranca in verità come scrito sui registri del '400 e '500 l'éra arènte al paese, 'ndóe gh'éra la çitadina de Civenna o Clavenna, vècio borgo probabilmente de antiche origini che'l serviva ai eserciti par sponsàr. Dopo che, l'è cascà l'Impero romàn, se pensa che nel 541 durante la guera gotico-bisantina el s'abia fermà l'esercito bisantìn con a capo Marciano prima de assediàr la çità. Del periodo Longobardo savèmo solo che jè stà catadi pugnài e armi nel vilafranchese mentre del periodo feudàl Vilafranca l'éra aministrà sia da la Campagna Veronese e sia da la Iudicaria Gardensis. Nel 1040 i dise che arènte a Vilafranca ghe sia stà una batàja persa dai Veronesi contro i Mantoàni finida con la deportassión dei prigionieri a Mantoa. Nel 1154 Barbarossa con 4000 soldà el s'à fermà tra Vilafranca e Poéjàn e unido al Duca de Sassonia l'à nominà i so feudatari. Nel 1164 a Vaccaldo nel teritorio de Vigasi ma arènte a Vilafranca, ghe stà la batàja persa dal Barbarossa contro i Comùni, vitoriosi a la fin a Legnano prima de la Pace de Costanza del 1183 che l'à determinà l'autonomia comunàl. Cossita Verona par paura che in futuro ghe fusse altre rogne l'à vólù sgrandàr le difese militari e par 'sto motivo s'à 'isto la nàssita del borgo de Vilafranca. Con 'na delibera del 9 marso 1185 i "Rettori" de Verona su proposta de Viviano dei Avvocati i avéa deciso de realisàr un fosso de protession e la fondassion de un nóvo borgo al limite de la campagna «a far gente per il comune stesso e a difesa contro i Mantovani». El 25 e 26 marso 1186 un console e un procuradòr i avéa consegnà a i òmini de 'sta nova Vilafranca i teréni. A ogni "colono" l'éra stà assegnà un "manso" (unità de misura agricola con 33 campi veronesi, composti da 32 «pro laborare» e uno par la casa) sensa desméntegàrse che 646 campi i éra concessi a Vilafranca in bosco e pascolo par un total de 2088 campi assegnà a 179 mansi (in pratica 179 faméje). ànca se a Vilafranca gh'éra stà cavà via tute le tasse la dipendéa sempre dal Comùn de Verona e par 'sto motivo se ciama cossita, "vila" nel senso de borgo o vilàio e "francus" libaro da le tasse. Inoltre tra le concessioni gh'éra ànca la possibilità de costruìr un pósso e de verzar el marcà. Verso la fin del XII secolo l'è scomincià la costrussión del castèl sóra 'ndóe 'na 'òlta gh'éra el "castrum", finida de corsa nel 1202 'isto le numaròse batàje tra guelfi e ghibelini. Nel 1231 a Vilafranca l'è stà firmà la paçe tra 'ste do fassioni ma Eselìn da Romàn amigo dei ghibelìn nel 1233 l'à tacà fogo al paese e al castèl. Nel 1268 el castèl l'à ospità i guelfi con Pulcinela da le Carceri e Lodovico Sambonifacio durante i preparativi par l'assalto a Verona contro Mastino de la Scala. Cossita 'na olta deventà Scaligera, Vilafranca al castèl gh'è stà zontà 'na tór. Nel 1285 Alberto de la Scala l'avéa confermà quél scrito ne l'ato del 1185 e ànca se in 'sto periodo ghe stà numaròse guera el paese el s'à bèn svilupà sóratuto con l'atività de le pegore e de la lana. Nel 1337 la zente l'éra scapà ne le campagne durante la guera tra i Scaligeri e i Venessiani coi so aleadi; par 'sto motivo Mastino II l'avéa fato costruìr tra el 1345 e 'l 1353 un murajon che partendo da Valéso e passando da Vilafranca el finiva a Nogarola Roca, conossù ànca come el "Serajo". costrussión che l'è servida a poco ai Scaligeri, parché nel 1387 i De la Scala i à dovù lassarghe el teritorio veronese a Gian Galeazzo Visconti. Dopo i Visconti e i Carraresi l'è stà el turno, nel 1405 de la Republica de Venessia, e Vilafranca l'éra a capo de uno dei Vicariadi con a le dipendense Alpo e Poéjàn. Nel XV secolo Venessia l'à combatù da 'ste parti contro i Visconti e i Mantoani, come nel 1441, quando i gà butà zò in gran parte el Serajo. Finide le guere el castèl l'éra deventà rifugio par i ebrei in fuga da Verona e in tuto el teritorio vilafranchese s'à visto un bèl svilupo economico. A parte la guera dei Venessiani contro la Lega de Cambray e la "visita" de Carlo V, nel XVI secolo s'à 'isto 'na discreta ripresa economica grassie ànca a la produssion de la seda con i "cavaleri" e grassie al Doge de Venessia, che con decreto del 22 febrar 1592, l'à fato partir el marcà stimanàl del luni sensa contàr numaròse concessioni fiscali. E con la certessa economica ghe stà un bèl aumento demografico e con abili ingegneri e geometri, l'è stà realisà come ai tempi dei romani, una çitadina bèn organisà e ordinada. Nel 1630 par merito dei Lanzichenechi l'è rivà la peste dimesando el nùmaro de la popolassión, ma par fortuna che, essendoghe l'esensión da le tasse, e l'istitussion de un nóvo marcà al mercoli con gran e fen, l'economia la s'éra riciapà. A metà del '700 l'è stà deciso de far un solo marcà stimanàl nel giorno de mercoli, presente ànca al dì de ancò. Con l'arivo de Napoleón nel 1796, jè finì i i privilegi e Vilafranca l'éra entrà a far parte de la Republica Cisalpina nel Dipartimento del Menso. Da dopo el congresso de Vienna fin al 1848 Vilafranca Austriaca la vivéa in tranquilità e durante la prima guera de indipendensa l'éra stà ocupà da l'esercito piemontese nei giorni de la batàja de Custosa. Nel 1859 la seconda guera de indipendensa l'è finì pròpio a Vilafranca; Dopo la vitoria a San Martìn e Solferin, Napoleón III el s'éra messo d'acordo con "Cecco Beppe" arènte a la ceséta de San Gioàni de la Paja par finìr i combatimenti. Cossita l'è rivà el momento del tratado firmà in casa Gandini, consegnando el Veneto a l'Austria. Dopo la III guera de indipendensa nel 1866 Vilafranca l'è deventà Italiana. Tra le cése da segnalàr quèla parochiàl dedicà ai Santi Piéro e Paolo scomincià nel 1768 sóra ai resti de quèla vècia nata con la fondassion del borgo; del '400 jè le cése: de San Roco, costruida dopo la peste 'ndóe gh'è la conservà afreschi de la Scóla del Morone; de San Gioàni in Paja arènte al "Monumento del Quadrato" costruida par vólontà dei cavalieri de San Gioàni Gerosolomitano; de la Dissiplina 'ndóe ghe conservà 'na tela del Farinati del '600 e statue del '400 ne la cripta. Arènte al castèl gh'è la cèsa dei Francescani de l'800. Del castèl ghe restà i muri esterni e quatro tóri mentre sóto la tór prinçipal gh'è la ceséta del Cristo costruida nel 1708 sui resti de un antica capela, che la conserva 'na Madalena del Brusasorzi e 'na Crocefissión del XII su l'altàr maiòr. Da ricordàr el palasso "Albergo Sole" che durante el dominio venessiàn l'éra la casa del Comùne e nel 1859 l'à ospità Carlo Alberto mentre un simbolo de Vilafranca l'è Palasso Gandini-Morelli-Bugna 'ndóe l'è stà firmà la paçe nel 1859.



Pin It