Vigàsi

VIGASI - IGASI (Vigasio)
Popolassión: 9.973 Altessa: 37 metri sóra el livèl del mar
Superfice: 30,76 chilometri quadri Comùni confinanti: Poiàn-Poéjàn, Vilafranca, Castèl d'Assàn, Butapièra, Isola de la Scala, Travénsòl, Nogarole.

Comùn de la Bassa Veronese a 16 chilometri in diressión sud-ovest da Verona, con le frassioni Forete e Isolalta. L'òmo a Igasi l'è presente fin da l'antichità come pól dimostrarne i resti de 'na necropoli in località Campagna Magra de popolassióni çeltiche vegnude a vivar da 'ste parti, che le faséa riferimento a la cultura de La Tene (III sec. a.C.); oltre a le tombe jè stà scoèrte ànca spade, armi, vasi e utensili. Su l'origine del nome i nostri storiçi i g'à varie versioni, gh'è ci dise che possa derivàr da Vicus Athesis, vilàio su l'Àdese, ipotesi scartà parché el fiume no l'à mai travérsà el teritorio de Igasi ànca se documenti dal XI° al XIII° secolo i ciama 'sto comun Aderis, Adhecis, Athesis, Vicoatesi e Vigaxio nel 1209; piassé probabile la seconda version, Vicus Attii, çità dei Atti, nome de la gens romana con a capo un çerto Attus presente ànca ne la vissina Castèl d'Assàn "Aciano". E pròpio nel periodo romàn se vede scrito el nome Tartaro, fiume che'l travérsa el teritorio comunàl, ne le "Historie" del poeta latin Tacito 'ndóe vien parlà de "paludes Tartari fluminis". Come avémo capido, l'origine de Igasi l'e sicuramente romana e a quei tempi, l'éra posissionà su la strada consolar che la corea de fianco a la Via Postumia, importante via de comunicassion del nord Italia. El primo ducumento scrito su Igasi l'è del 926, un ato de vendita 'ndóe vien nominà un çerto Ariverto de Dragimperto originario de "Vicus Aderis". Ma le prime testimonianse scrite, sicure, jè del 21 majo 1014 quando l'imperadór Enrico II l'avéa concesso a l'Abassìa de San Zén la zona de Igasi restà ai Benedetini fin al 1221. Cossita in 'sto periodo i frati i s'à fato su le maneghe e jà scomincià 'na granda opera de bonifica de le zone impaludé 'ndóe se podéa catàr i famosi "gambari" mentre a laoro ultimado jè stà piantà fruta e verdura come nel caso de la "rava"; nel stema comunàl infati catémo sia el gambaro che la rava. Nel 1164 l'imperadór Federico Barbarossa l'è vegnù in Italia nel tentativo de contrastar l'autonomia e 'el podér dei comuni, che nei ani l'éra aumentà dando vita pròpio in quél'ano a la famosa Lega Veronese; cossita Barbarossa dopo essarse fermà a Vacaldo ('na corte lóngo la strada che da Igasi la porta a Castèl d'Assàn) el s'à scontrà con la Lega Veronese e dopo avér perso l'è scapà verso la Lombardia. Nel 1226 l'è stà costituido ufisialmente el Comùn de Igasi con tanto de statuto, con a capo un "Decano" con a fianco dei consijeri e l'aministrador "Massaro", oltre al "Saltàro" che'l regolava el sfrutamento de boschi e pascoli. Nel 1232 del paese no gh'è restà gnente dopo le incursioni dei mantoani che par secoli jà lotà contro i veronesi; particolar importansa g'avéa in quèla ocasion la roca posissionà a difesa del fiume Tartaro butà zò nel 1442 par paura che la cascasse ne le mane del nemigo. Dopo i periodi Scaligero, Visconteo e Cararese, Igasi l'éra al çentro de importanti comerçi e sede de un prestigioso Vicariato sóto la Republica Venessiana, ( inissialmente nel periodo de la Serenissima faséa parte del Vicariato de Cà Campagna). Nel periodo Venessian no gh'è stà particolari avenimenti, come ànca nel resto de la provincia Veronese a parte la peste del 1630 o qualche passàio de soldà. Sóto Venessia l'è stà sistemà la rete idrica, bèn disboscà e bonificà le paludi e le tere piéne de gramégna, mentre a Igasi se podéa contàr bèn oto pile par la laorassion del riso che le se movea grassie ai corsi d'aqua usadi par l'irigassion dei campi de propietà de le asiende che g'avéa teréni e le coltivàa el riso; al dì de ancò, un pochi de paróni de fondi agricoli i g'à ancora i antichi diriti par irigar i so campi. no podémo desméntegàrse che i éra stà piantà i morari par i cavaleri e grassie ai numarosi pascoli, l'industria de la lana l'éra deventà un importante fonte de guadagno. Dopo la fine de la Republica Venessiana jè rivà Napoleón e i Austriaçi, Igasi dopo avér superà le guere del risorgimento l'è deventà Italiana nel 1866. Tra le cése da segnalàr la parochiàl dedicà a San Zén e ricordà in un documento del 1014 da l'imperadór Enrico II. De la vècia costrussión gh'è restà el campanìl del XIV secolo e un fonte batesimal del 1473; rifata ne l'800 l'è stà sostituida nei ani '60 da la noa cèsa. 'Pena fora a Igasi podémo'édar el Santuario de la Madona de Campagna Magra del XVII secolo, costruido con probabilità dopo la peste del 1630. 'Stà località la catémo insieme col scomparso Lago de Vacaldo ne le carte del XVI secolo, 'ndóe la vien ciamà Campagna Grassa forse a causa del disboscamento che l'à fato destinar la zona al pascolo, sbassando de conseguensa el livèl de produssion agricola. A Isolalta la cèsa parochiàl originaria del XV secolo conserva afreschi del '500. Tra le Vile da segnalàr Vila la Zambonina in stil baroco del XVIII secolo, con grandi sale decorade, statue e un bèl giardìn a l'italiana che l'è stà propietà prima dei Giusti e dopo dei Portalupi. A Forete da ricordàr Vila Malaspina in stil veneto mentre a Isolalta catémo el complesso rùstego con colombara de la Vila Carnesali. Tra i personagi famosi da ricordàr el musicista Italo Montemezzi nato a Igasi nel 1872.



Pin It