Scheda 01 - I Ponti de Verona

La storia dei Ponti de Verona in pratiche schede. Ponte Pièra, Castelvecio, Garibaldi, De la Vitoria, Novo, Aleardi, Ferovia. El Ponte Novo l'è stà costruì tante volte mentre quel de la Ferovia l'è stà inaugurà soto el marassiàl austriaco Radetsky. Le curiosità iè tante e val la pena conòssarle. Par ci vol savèr de più, basta spedìr 'na meil e ve disemo quali libri pol èssar utili a le vostre riçerche. L'è una rubrica che la pol dar una man a ci studia o par ci de Verona conosse poco. Basta discorsi in più, buta un ocio a la storia! 



ptpieraPonte Pièra
Ponte Piera El Ponte Piera l'è stà costruì quando Verona l'era deventà colonia Romana 89 a.C. Fato dai Romani in marmo rosso. Le 3 arcade verso el çentro storico i era stà ristruturade dai Scaligeri nel 1298. Fato saltàr nel '45 (IIa Guera Mondial). Ricostruido nel 1957 con piere recuperade nel'Adese. El ponte nel tempo l'è deventà uno dei simboli de la nostra çità.



ptcastelvecioPonte Castèlvècio
L'è stà costruido su disegno de Gioàni da Ferara e Jacopo Gozzo nel 1354. L'è longo 120 m e largo più de 7 su 3 arcade. El gà caminamenti in coto, i basamenti in marmo de Verona e con alcune piere asportade a edifici romani. Nel primo pilòn gh'è incastonadi quindese capitei corinzi. L'è stà fato salàar ne la 2a guera mondiàl e ricostru' nel '50.




ptgaribaldiPonte Garibaldi
El 16/08/1864, l'è stà inaugurà un ponte in fer col nome de quel che l'avea costruido, Newille. Par passàr bisognava pagàr, in modo da rimborsàr le spese de costrussion. El 07/03/1867 l'era vegnù a Verona Garibaldi, salutà dal popolo in festa andando verso Aèsa, passando propio su quel ponte. Nel 1934 rinforsà e cambià nome in Garibaldi in ricordo de quel avenimento. Decorà con 4 statue in tufo l'era stà sopranominado Ponte dei Strachi.



ptvittoriaPonte de la Vitoria
Le prime piere i èra sta posà nel '26, tri ani dopo era stà deciso dedicàr el ponte ai caduti in guera. Longo 100m largo 16  su 3 arcade. Sul lato interno dei piloni che i tien su i 4 cavài, gh'è incisi i boletini dela 1a guera mondiàl. Un ponte imponente, tra i più bei stilisticamente de la nostra çità. Da Riva San Lorenso se varda el ponte con de drio el magnifico panorama de le Toresèle.



ptnovoPonte Novo
El Ponte Novo anticamente colegàva la çità con l'Isolo (la lengua de tera isolada dala çità). L'è nato a la fine del 1110 e l'è stà costruì tante olte a causa de distrussioni naturali. Rifato da Alberto I° Dela Scala, un incendio el l'à distruto e Mastino II° el la fato su da "Novo". L'è stà ricostruido anca dal Sanmicheli. Nel 1882 (l'ano de la piena) el s'à spacà poi sostituido con uno in fer, e nel stesso ano l'è vegnù el re Umberto I in aiuto e par confortàr la gente. Nel 1884 ricostruì col nome de Ponte Umberto I. Nel 1894 ghè nè stà fato n'altro. Dopo 40 ani l'è stà butà zò e nel 1938 l'è sta costruido n'altro. Fato saltàr nel 1945. El ponte definitivo l'è del 1946.


ptaleardiPonte Aleardi
L'è stà inaugurà nel 1879 el ponte in fer a 5 arcade. Nel 1882 la piena el l'à distruto. Nel 1939 roinà da la guera l'è stà demolido e ricavà 200 tonelade de fer. Nel 1950 l'ultima costrussión. A Verona l'è conossù anca come "Ponte del çimitero".




ptferoviaPonte de la Ferovia
L'e' stà costruì a partìr dal 6 marso del 1850, finì in meno de 3 ani. Inaugurà el 10/11/1852. Da li ghe passava i treni che i vegnèa da Vicensa, passando par la stassión de Porta Vescovo e andando verso Mantoa. A la cerimonia g'avéa partecipà parfin el marassiàl Radetsky (Radècio par i veronesi). Le alte autorità citadine sora a un vagòn de veludo vermiglio trainà da una locomotiva ciamà Verona, partida da Porta Vescovo, i s'à fermà a metà ponte, mentre na banda militare la sonava "l'inno imperiàl" a tera. Radetsky l'avéa messo la pergamena comemorativa nel'ultimo arco del passagio de destra in uno spassio 'udo predisposto, serà dal'ultima piera. El discorso inaugurale l'è stà dito da Luigi Negrelli de Montalto ideatòr del canal de Suez (Sues). Le mine tedesche nel 1945 non i era riusside a butàr zo el ponte. Col tempo ghe stà stupà le ultime do arcade de sinistra, restaurado, e ritrovà la pergamena (trasferida a Venessia).


ptcadenaPonte Cadèna
El nome Cadèna, deriva da la cadena che al tenpo dei Scaligeri, congiungendo le do rive, inpediva e controlava tuti i spostamenti dei contrabandieri. A guardia del trafico, a metà de l'Adese, se pòl notàr ancora, l'antica toréta Scaligera.




ptnaviPonte Navi
Costruì verso l'ano 1000. Nel 1354 quando el ponte l'era in legno i s'à sfidà Cangrande II e so fradelastro Fregnano che sconfito el s'a negà nel'Adese. Nel 1757 una grossa piena l'avea travolto el ponte isolando la tore che colegàa le do arcade. Do done e du buteleti restà imprigionadi nel ponte i ris-ciava de negàrse, ma un fachin dela Dogana, Bartolomeo Rubele, el s'à butà nel' Adese con l'aiuto de soghe e sigagnole l'è riussì a salvarli. El popolo in festa l'à volù donarghe un bel mucio de schei, rifiutadi dal Rubele (soranome el Leon dela Valpantena). A quel eroe ghe stà intitolado un lungadese.

Ponte San Francesco
L'à ciapà el nome dal Bastion che ghe li vissin nel 1930. L'è stà costruido par scurtàr la strada al popolo tra Porta Vescovo e Porta Nòa.

Ponte Postumio
Nel 49 a.C. costruido arente al ponte Piera, pìù elegante, con 5 arcade, l'era posissionà longo la via Postumia. Ora no esiste pìù

Pin It