Scheda 10 - Toponimo Verona

Molti se dimanda 'ndoe l'è nata la nostra çità. Se uno el va par logica el pensa a un posto posissionà in alto su qualche montagna ma vissìn a l'aqua. Infati Verona l'è nata sora al col de San Piero tacà a l'Adese. Ma la dimanda che te pol farte l'è un altra. Ma el toponimo Verona che origine pol 'verghe? Gh'èmo le risposte a le to dimande in poche righe. Se impara sempre qualcosa de novo.








L'Origine de Verona
La çità de Verona no l'è nata in painura ma precisamente ne la zona 'ndoe ghe l'atuàl Castel San Piero a sinistra de l'Adese par opera dei "Galli" e dei "Veneti" 'ndoe i avéa creado el primo insediamento. Nel 2° secolo a.C. i romani i g'à pensà lori, conquistando la çità e i teritori viçini. Nel 49 a.C. Verona deventa municipio romàn, e la çità l'à scominsiado la sò espansión. Sula colina l'era stà costruida l'arx (la roca), pìù in basso el Teatro Roman e tuto intorno le mura e l'è stà zontà un ponte nòo vissìn quel in legno de drio ala Cèsa de Santa 'Nastasia con el nome de Postumio. Col tempo i Romani, come in altre çità ià realisado numerose opere de ingegneria idraulica par portàr l'aqua potabile ala zente. Così la çità la s'a sgrandà, secondo un criterio urbanistico che se ispirava ai acampamenti militari cioè su un impianto base costituido da du grandi viai incrosadi a 90° con i nomi de Cardo e Decumano. Nel caso de Verona el Decumano l'era rapresentado dale odierne Corso Portoni Borsari e Corso Santa 'Nastasia, mentre el Cardo l'era rapresentado dale odierne Via Leoni, via Capèl, Piassa Erbe, vicolo Monte e via San Egidio. Al'intersecassion se catàa el foro dove gh'èra el comando e tuta l'organisassion militàr. El lato sud l'era stà serà con mura bele alte riforsandole con tòri a destra de l'Adese in corispondensa del Ponte dela Vitoria fino al Ponte Navi (viçin a la basilica de S.Fermo). L'ingresso l'era consentido atraverso dò porte: Porta Borsari a Sud e Porta Leoni a Est. Nel 489 d.C. Teodorico re d'Italia, l'à fato costruìr altre mura che le seguiva el percorso del' Adeséto, alargandose a est dela çità, piegando verso San Zen in Monte e proseguendo inglobando la Roca e lassando fora la cèsa de San Stefano. Sul col de S.Piero, Re Teodorico l'à rinforsado le mura e al'interno el l'à fato costruir inoltre, la Cesa de S.Piero in Castel. Nei secoli sucessivi i Scaligeri ià dovudo sgrandàr la çinta muraria 'isto l'espansión dela çità e raforsando così la rocaforte militàr e nel 1390 Gian Galeasso Visconti l'à fato costruir a nord dela Roca, Castel S.Feliçe dito anca Castel Novo cambiando el nome così de quel de San Martin in Aquaro in Castel Vecio. Al' inissio del 19° secolo tuta la zona de Castel S.Feliçe e la cesa de Castel S.Piero l'è stada distruta dai Francesi prima de darghe el teritorio ai Austriaci. Quest' ultimi i à rinforsado tute le fortificassioni in colina, sia Castel S.Piero che Castel S.Feliçe tanto che nel 2000 se pòl 'edarle nel so splendor.



Probabile origine del toponimo Verona
Secondi alcuni studiosi, la Verona colinàr l'è stà fondà nel'età del bronso dal popolo dei Euganei (unidi ai Liguri). Sucessivamente jè subentradi i Veneti vegnudi dal' Asia minòr tra el 13° e 12° Secolo a.C. nel'ambito dele migrassioni dei "popoli del mar". I Veneti i era penetradi dal'Illiria par via mar, spostando i Euganei verso le Alpi. Inveçe i Reti de origine etrusca, probabili inissiadori in Valpoleséla dela produssión del vin "Recioto", i s'à posissionà sucessivamente a Verona ne la cura del' Adese dove l'è stà fondà la Verona Romana. In epoca preromana i Etruschi i era presenti anca a Verona ma col tempo paradi via dal' Italia setentrionàl par le ripetude invasioni dei "Galli". Da ricordàr anca insediamenti dei "Galli Cenomani" in boni raporti coi Veneti nela destra de l' Adese e forse in Lessinia. Con i Romani el flusso de novi popoli verso Verona no'l finisse. Col tempo i fa comparsa anca i popoli dei "Magiari" e dei "Unni". Dunque, l' Adese insieme con el Còl S.Piero e la val de soto, i g'a dato el via libara ala fondassión dela nostra çità. Numerosi studiosi i dise che el toponimo Verona el sia de origine Etrusca parchè la raisa silabica VE la dovarìa far riferimento ale popolassioni Venete sul còl S.Piero, la raisa silabica RO dovarìa derivàr dal verbo greco reo (scorro) che caraterisa molti antichi toponomi de fiumi e de çità nate sule rive de fiumi (in alcune çità compare RE) mentre nela raisa silabica NA se intravede el significado etrusco de çentro abitato. In pratica Verona l'è "la çità dei Veneti sul grande fiume".

Pin It