Scheda 13 - Trombini e Pistonieri

El trombin al dì de ancò el gà la funsión de far un forte bacàn ("el boto") con fumo, secondo un rituàl de "scongiuro" contro i spiriti maligni o quel de negativo, ma anca con un significado de festa e gioia. La presensa dei trombini l'è presente in varie zone de la provincia de Verona da alcuni secoli, ma in particolàr in Lessinia. A la fin del XVII sec. le visite pastorali del vescovo Francesco Barbarigo a Véste, Badia, Tregnago, Illasi e Bosco iè salutade dal riçevimento e da le esplosioni con armi da fogo, somejanti a archibugi.








trombiniI Trombini - l'Antica tradissiòn ne la tera dei Cimbri
Quela dei Cimbri l'è un' isola culturàl e linguistica che caraterisa gran parte del’altopiàn dei Lessini. Nel 13° secolo questo l'era un teritorio poco popolado e l'è stà asegnà dal Vescovo Bartolomeo de la Scala a un bel grupo de "coloni" de origine bavarese-tirolese, con el compito de tajàr i albari e ridurlo in pascoli par el bestiame. Ai coloni l'è stà concesso de gòdar dei fruti de la tera, de costruirsi case, aministrarse, far l'elessión dei  propi paroci che i parlasse la sò lengua, conservàr le propie tradissioni e de unirse in comunità piassè numerose. Quele comunità, col passàr dei tempi, jè cressude de nùmaro e de popolassión e, verso la fine del Treçento, i à costituido i Trèdese Comuni Cimbri de la “Montagna alta del Carbon”.I “trombini” o “s-ciòpi” o “pistoni”, come i vién ciamàdi in altra maniera, i sarìa derivadi da armi da guera del Sièçento/Seteçento usade, par lo più, per spaentàr, per butàr zò palissade, par farse largo tra la zente, per difendarse durante i viai. La sò denominassión, probabilmente la provièn da un arma che podarìa somejarghe, al “tromblòn” belga e olandese del passà, e par che g'àbia origine da la “tromba” (o campana) del svaso de la boca da fogo. Nel passà in ogni borgada de la Lessinia, squadre de “trombonieri” i faséa dimostrassioni folcloristiche con le sò scariche a salve a le manifestassioni dei sò paesi. Ancò, do associasioni folcloristiche: I “Trombini” de San Bartolomeo e i “Pistonieri” del’Abassia de Badia Calavena le porta inànsi le antiche usanse parteçipando con i sò “s-ciopi” par ralegràr e ufiçialisàr le feste del propio paese e dei paesi de la provinçia de Verona.


Storia e significado del trombìn
El trombin al dì de ancò el gà la funsión de far un forte bacàn ("el boto") con fumo, secondo un rituàl de "scongiuro" contro i spiriti maligni o quel de negativo, ma anca con un significado de festa e gioia. La presensa dei trombini l'è presente in varie zone de la provincia de Verona da alcuni secoli, ma in particolàr in Lessinia. A la fin del XVII sec. le visite pastorali del vescovo Francesco Barbarigo a Véste, Badia, Tregnago, Illasi e Bosco iè salutade dal riçevimento e da le esplosioni con armi da fogo, somejanti a archibugi. E l'è nel secolo dopo, forsi ne la seconda metà del XVIII sec., che da le cronache de le visite pastorali se rileva la presensa ne le varie comunità de milissie locali, e grupeti de òmeni siélti munidi de trombini che i podéa, nel momneto del bisogno, èssar impiegadi con compiti de polissia locàl. (Nel 1763 par la prima volta se parla de "schioppi" a indicàr i trombini e non più i archibugi). A 'olte, 'ste milissie i era ciamade "Sepolcreri" e le g'avéa el compito durante le funsioni de la Setimana Santa de custodir in costume el Sepolcro e de sparàr co' i trombini al Gloria del Sabo Santo e de la Pasqua. Da qual arma el deriva el trombin? Molto probabilmente el deriva dal`archibugio, dal qual l'è difarente par "l'apertura" de la cana a forma de tromba, da cui l'à ciapà el nome.


'Ndòe se usa el trombìn
L`uso del trombin come ufissialità cerimoniàl. Prima del sparo gh'è la sfilada dei trombini, lo schieramento e el caricamento, cui sovritende un comandante: i "trombonieri" in costume, coi tochi in spala, i marcia in colona precedudi da bandiere e labaro portadi da butèle in costume e da uno o più sonadori de corno. Lo schieramento el vien fato in una zona giusta, lontana dal publico, con i "trombonieri" messi a semiçercolo e i trombini colocadi a tera. Par el caricamento e el sparo, ghe vol tanta esperiensa: el trombin se carica versando una prima dose picenina de pòlvar nera con grafite ne la cana, distribuida col misurino dal comandante. Con una bachéta de legno se bate sul fianco del trombìn in modo che la pòlvar impenissa ben el canèl e che'l vaga fin al porta-capsula dove el bate el can. Una seconda dose de pòlvar nera da mina la vien distribuida sempre dal comandante (in ragione diversa a seconda de la grandesa del trombin) e compressa con asta e massa de legno insieme a alcuni tochi de giornàl. El comandante distribuisse quindi una capsula d`inesco, dita "patrona". Ogni pistonièr par ripararse dal boto e da le scotade el g'à ligà su la gamba sanca un toco de saco ("s-ciavìn"). Dopo che l'è stà sonà el corno che'l dise a la zente che manca poco al sparo, ogni trombonièr alsa l`arma in brasso con la cana rivolta al terèn e 'l dèo messo sul griléto. I spari i se ripete singoli o in copia, o a tri, secondo i ordini del comandante. El sparo l'è spetacolàr e forte come el boto de un canón, "fragoroso e fumoso". El trombin inisialmente rivolto verso el basso, par el forte rincùl el vién sospinto in alto e questa manovra va controlada da ci spara 'compagnandola con un mèso giro del busto e una rotassión de 180° alsando el pesante trombin su la spala sanca. El tuto in modo da non èssar butadi in tera dal rincùl. Da la nùgola se spande un forte udòr de pòlvar da sparo. I trombini i se sparava e i se spara ancora durante el "Gloria" del Sabo Santo, durante le feste e le sagre locali in Lessinia, l`ingresso de novi paroci e alcuni matrimoni.

Pin It