A disposission par tuti i amici de La Rena Barçelona le informassioni utili par vegnar qua: Venite a CATarci. Nojaltri ve disemo indoe podí catar le informassioni, vojaltri ve preparé el viagio, ve organizé e ve fasí tuto el resto. La parola d’ordine l’è: un pò de quel che se ghe dise... rangive! Nojaltri ve demo la nostra disponibilità par andar a bear quatro goti e far quatro ciacole quando si rivé.

A Barçelona se ghe 'riva in machina, in tren, in aereo, in nave, a pié.... Sicome a nojaltri no ne piase mia la machina e ne fa mal ai pié, consigliemo:

In aereo gh'è tante posibilità:
Da Verona, Bergamo, Treviso, Venesia
www.iberia.com / www.clickair.com / www.ryanair.com

In tren el viajo l’è piassé rilassante e el dura tuta la note.
El tren el se ciama: TRENHOTEL SALVADOR DALÍ e el parte da Milan. Se parte ale nove de sera e se riva ale nove de matina a Barçelona Sants. Par ci vol un viajo rilassante l’è consijabile prenotàar el letin. Insima al tren ghe el vagon ristorante e el bar. L’è un pò careto però val la pena a ci ghe piase.... Tute le informassioni utili le catí al linc:
www.trenitalia.it o www.renfe.com o www.elipsos.com

In barca se pol ciapàr el tregheto de Grandi Navi Veloci da Genova.
Ghe anca la posivilità de far un uic-end. I tragheti i par de le navi da crociera. http://www1.gnv.it El grosso vantagio de ‘rivar in barca l’è che se riva praticamente sule Ramblas. Te smonti dala barca e te si in centro.

'Sto capitolo l'è stà scrito parché sperimentà de persona dal nostro Diretòr tegnendo conto de rivàr a l'aeroporto "El Prat" a un tiro de s-ciopo dal çentro de Barçelona. Quél da Girona l'è massa lontàn, a 100 km de distansa da la çità ma daltronde le compagnie low-cost jè lì a parte la ClickAir. A sto punto parte la Vostra aventura a Barçelona; dovì pensàr come spostarVe da l'aeroporto e una 'olta rivà in çità.

Pena se smonta da l'Aereo ve convien nar a "l'ufisio informasioni" de l'aeroporto (i conosse molto ben l'italiano)  e farVe dar la cartina de Barçelona oltre a farVe indicàr 'ndoe se cata la fermata de l'Aerobus e altre informasioni utili de 'sto capitolo. El biliéto el se fa sora al bus e chi dovì dirghe a l'autista "Billete vuelta" o in catalàl "Bitllet vuelta" praticamente "andata e ritorno" cossita se riesse a sparagnàr 1 euro e meso rispeto a la sola andata. Me racomando par quanto pol someiarghe el catalàn al veronese, se sora la porta del bus gh'è scrito "Salida" vol dir l'esato contrario "Uscita". Se par caso te perdi el bus no sta preocuparte el passa ogni 15-20 minuti da le 5.30 de la matina a le 1.30 de note del giorno dopo. Le fermate jè Placa d'Espanya (arente a le fontane a la funivia e ai musei del Montjuïc), Gran Via Urgell, Placa Universitat, Placa Catalunya (dove gh'è la famosa Rambla un tempo "progno"), Passeig de Gracia, Av. Roma Urgell, Estació de Sants, Placa d'Espanya-Creu Roberta. Se volì sparagnàr schéi e a seconda de le fermate che Ve par più comode rispeto al precedente, con solo 1 Euro e méso podì tor el treno RENFE che finisse la corsa ogni 30 minuti in pieno çentro (Estacio de Franca, Passeing de Gracia, o Barcellona Sants conossù come Sants Estacio). In 'sto ultimo caso, in aeroporto, te devi caminàr sora un bel colegamento querto e fate trasportàr dal nastro pedonàl tra i terminal A e B. Se te vol far el "sboròn" ciapa el taxi a 25 Euro a corsa.

Molto comoda l'è la "Barçelona Card", con questa te gh'è trasporti urbani a maca (ghe mancarìa altro visto quanto la costa), el treno da l'aeroporto, sconti ai musei e cése oltre che al 20% in manco par l'Aerobus. Se te rivi dopo disnàr, no te convién farla in Aeroporto visto che la costa: € 25,00 par 2 giorni de fila, € 30,00 par 3 giorni, € 35,00 par 4 giorni e € 40,00 par 5 giorni. I sconti più interessanti jè del 50% al Museu Picasso (€ 9-10 molto belo, bisogna lassàr zò le borse soto ciave e farVe 'na bela fila par entràr), 30% Museu d'Història de Catalunya 20% Centre de CulturaContemporània de Barcelona (CCCB), Museu d'Art Contemporani de Barcelona (MACBA) Museu Nacional d'Art de Catalunya (MNAC), Museo Miró, 12% Casa-Museu Gaudí (che se cata drento al Park Guell, altro posto da visitàr), Temple de la Sagrada Família, Casa Batlló - Antoni Gaudí, Gran Teatre del Liceu, Palau de la Música Catalana. Quando se va nei musei o ne le cése me racomando de tiràr fora quatro schéi in più par le audio-guide, veramente ecessionali, altrimenti no se capisse un Pi...casso!

Una cosa spetacolàr l'è la Metro de Barçelona, bela, comodissima par giràr la çità, no podì farghene de manco. (Col stesso biliéto se pol tor el bus tradissiònal a carbonela ma par spostàrse Ve costa tempo e fadiga)  A seconda de la zona e dei giorni che Ve fa comodo de trasporto: Travel card T-10 (diése corse)  7 € zona1 / 31 € zona 6, Travel card T-Dia (1 giorno)  1,50 € zona 1 / 5,50 €  zona 6, Travel card 2 T-Dia (2 giorni)  10 € , Travel card 3 T-Dia (3 giorni)  14 € , Travel card 4 T-Dia (4 giorni)  18 € , Travel card 5 T-Dia (5 giorni)  22 €.

Se no te conossi una eva de Barçelona te convién ciapàr el Bus-Turistico http://www.tmb.cat che'l costa più de 20 € e te giri una giornada come un mòscolo in 3 percorsi (du, più quel particolàr de note). Grassie a le 45 fermade te pol seitàr su e zo dal bus par vardàr i monumenti e le cose che te interessa, tanto el séita a passàr ogni 10 minuti. In più te gh'è i vari sconti. Con la Barçelona Card te pol usàr i sconti su più giorni, mentre con el Bus Turistico te devi usarli in un giorno solo, che vol dir caminàr come disparadi. Par informasioni gh'è el sito ufisiàl del turismo http://www.barcelonaturisme.com

Assolutamente racomandabile la pagina ueb Barçelona-on-line: http://www.Barcelona-on-line.es/ita/index.asp Nel stesso sito podì catar de tuto, hotel, pensioni, foto. L’è fato veramente ben. Da no perdar. Chi soto un pochi de hotel che consijemo se no savì 'ndoe 'ndar..... e alora Bona note!

Pension Jardí (tel. 93 301 59 00). Stanza doppia più o meno 85€. Ne la pittoresca Piassa del Pi, in mezo al Barrio Gotico.
Hostal Gat Xino e Hostal Gat Raval www.gataccomodation.com. Nel quartier multietnico del Raval, ex Barrio Chino. Stansa dopia più o meno 80€.
Hotel Banys Orientals www.hotelbanysorientals.com. Stansa dopia intorno ai 100€. Vissin a Santa Mª del Mar. Belo e tranquilo.
Se no, podì çercar in du cadene de hotel afidabili: la NH e la DERBY
www.nh-hotels.com o www.derbyhotels.es

Gavì 'na fame da lovi e ve piaserìa una balena par scominciar? Beh, non esageremo, con questa guida podì catàr la solussion .....come magnar a Barçelona!

Importante:
No bisogna desmentegarse dei orari par magnar:
Disnar 14.00 - Çena 21.00
In qualche ristorante par turisti se pol magnar anca ale 13.00/20.00

Barçelona è una dele çità europee con el numero piassé alto de ristoranti pro-capite. Altretanto par i bar. L’oferta l’è infinita. I ristoranti che gh’è su la Rambla jé par turisti

Pesse e Paellas: Nel quartier de Barceloneta gh’è i ristoranti a bon presso con bon pesse fresco e squisite paellas.

Disnar par tirar inansi - Quando andemo a far i turisti da qualche parte e emo za speso schei par el viagio, l’è normal che qualche giorno (o tuti) çerchemo qualche postesin par tirar inansi, sensa far ‘na gran magnada. Nojaltri ve consigliemo qualche postesin par magnar un menù del dì e spendar al massimo 15 €. De sera el costa piassé.
Restaurant Carmelitas (C/del Carme, 42; Tel. 93 412 46 84)
Presso del menú da lunedí a venerdí: 8,5 €.
Andando zo da la Rambla, a destra prima del Palau de la Virreina.
Restaurant Les quinze nits (Plaça Reial)
Entrando in Plaça Reial, a sinistra. Mejo andarghe in orario italiano. No stazì spaentarve se ghè la coa. Bisogna saver spetar. L’è normàl far la coa.
Restaurant La Fonda(Calle Escudellers, 10; tel 93 301 75 15)
Presso del menù aprossim. 11€
L’è sta uno dei primi ristoranti del tipo “belo e mia caro”.

4.0 'Sa fenti ? Te vol visitar Barçelona e non te se 'ndoe 'nar? Tute le informasioni par girar Barçelona e dintorni in pochi giorni......


Par visitar Barçelona l’è utile seguir i consiji de qualsiasi guida turistica. Se pol catar i monumenti prinçipali e le più importanti atrassioni culturali. Pol essar de aiuto un grosso ufisio de informassion turistica soto Piassa Catalunya!

Se no, ghe n’è uno ancora piassé grande in fondo a Passeig de Gràcia, a l'incroso con Avenida Diagonal: el Palau Robert un palasso tuto dedicà a la promossion turistica. Sarea come averghe un grosso uficio turistico a la Gran Guardia. Importantissima la so pagina ueb: http://www.gencat.net/probert Qua podí catar tute le informassioni utili par visitar e girar Barçelona. Importantissimo.....

A Barçelona g’è talmente tanti ristoranti, hotel, cinema, teatri, bar e in general oferta cultural che l’è molto consigliabile comprarse, apena se riva, la rivista LA GUIA DEL OCIO (1€). Ne la so version informatica ve podì comprar anca i biglieti par i concerti. http://www.guiadelocio.com/barcelona

Ad ogni modo, par ci no è mai stà a Barçelona, no l’è mia na bruta idea ciapàr el primo giorno un bel BUS TURISTIC in Piassa Catalunya, che el ve mena in giro par la cità e ve fasí un idea de come l’è.

Da 'edar a Barçelona:
La vista da l’alto da la colina del Tibidabo (le nostre Toresele)
Una visita al Palau de la Música Catalana
El marcà de la Buqueria (no massa presto).
La Sagrada Familia (preparive par la confusión de turista)
La Catedral con el cortil pien de ochi vivi.
Quatro passi nel quartier multi-etnico, pien de spusse e de profumi, de luci e de colori del Raval.
La basilica di Santa Mª del Mar nel quartier del Born.
Quatro passi su Rambla Catalunya (che no l’è mia La Rambla) prima de cena, verso le oto
el Museo Picasso http://www.museupicasso.bcn.es
el MACBA, museo de arte contemporanea de Barçelona, http://www.macba.es
el CCCB Centro de Cultura Contemporanea de Barcellona http://www.cccb.org
el Museo Maritimo (co la ricostrussion de la caravela de Colombo) http://www.diba.es/mmaritim

Fora da Barçelona:
La montagna del Montseny - A un ora da Barçelona, con una machina a nolegio, g’è, parco natural protetto, che l’è come el nostro Monte Baldo, dove se pol far caminade in mezo a una vegetassion de montagna mediteranea. Consigliabile assolutamente una sosta per un bianco a l’Hotel Sant Bernat (andando in su, dopo el paesin che se ciama Montseny) anca solo per respirar el silensio asoluto e amirar el paesagio verdissimo.
La Costa Brava del nord - A tri ore da Barçelona, con machina a nolegio o autobus che parte da la Estación del Norte, in du-tri orete se pol ‘rivar ai so paesini incantevoli e le so cale con l’aqua trasparente:
-Cadaquès, paese rampegà su la colina,rifugio dei artisti;
-Begur con le sue splendide cale Sa Riera, Sa Tuna e Aiguablava, Tamariu...
-Peratallada, un paesin in mezo ai campi, tajà ne le piere. Par far ‘na çena romantica soto un magnifico perlar iluminà da le lampadine taché ‘ia. http://www.hotelelpati.net