Quante olte n'è capità de catarse in sbrindolon e no saver indoe 'ndar a farla? Nojaltri emo catà diversi posti in centro a Barcelona par pisar sensa pagar. Quando gavemo certe urgense l'è importante orientarse in pressia. Tuti i posti che ve indichemo i g'a la carateristica de essar gratis, che nessuno ve dize gnente e che jè più o meno neti. Se ve catí en la situassión che ve si persi o ve stasí pissando 'dosso, la parola d'ordine l'è: "Perdone, el baño?" ("El me scusa, in doelo el bagno?"). No stasí complicarve la vita con "la toilette" parché no i ve capisse mia.
Su la porta del cesso pol essarghe scrito:
Serveis en catalan
Servicios o Aseos en spagnolo
Quando entré al cesso, normalmente ghe i disegneti de un omo e na dona, ma podaressi catarve anca:
H= omini (homes en catalan, hombres en spagnolo);
C= omini (caballeros en spagnolo);
D= done (dones en catalan, damas en spagnolo);
M= done (mujeres en spagnolo).

Speremo che la guida la possa essarve utile nei momenti de vero bisogno.

Passeig de Gràcia, fra Carrer d'Aragó e Carrer de València. L'è na botega de libri che l'è granda che la par un supermarcà. Entrando da Passeig de Gràcia, el cesso l'è sotto, in fondo a la discesa a sinistra. Entrando da Carrer València, el cesso l'è soto, in fondo a la discesa a destra. L'è el cesso gratis pissé neto de Barcelona. L'è tacà a la Pedrera e a la casa Battló, du tape obligatorie de tuti i turisti. El cesso l'è neto, novo e ghè la carta igenica: l'è el massimo. ^ torna su ^

Passeig de Gràcia (davanti a la fermata del tren e de la metropolitana Passeig de Gràcia). L'è un bar che za el nome el fa cagar. L'è proprio a l'uscita de la metropolitana a Passeig de Gràcia, al'incrocio con C/Aragón. Basta entrar e tirar driti in fondo. Drento al bar ghe passa sempre tanta gente che se pol essar scambié con gente sentà ai taolini fora. L'è un cesso da usar solo in caso de emergense "cori-cori" o par la pisadina prima de ciapar el metro o el tren.

Rambla Catalunya, Passeig de Gràcia, Carrer Aragó. El Boulevard Rosa l'è 'na galeria de boteghe che a va da Rambla Catalunya a Passeig de Gràcia e C/Aragón. Ghè varie entrate e come minimo du cessi gratis: uno entrando da Rambla Catalunya e l'altro in mezo al Boulevard, soto dove ghè el bar. Qua l'è mejo chiedar direti a qualche botega par no perdarse. ^ torna su ^

Plaça de Catalunya, 14 - canton de l'Avda. de Portal de l'Àngel.
El Corte Inglés el se cata in piassa Catalunya e lè un grande magazin. Par catar i cessi bisogna entrar da la porta a destra guardandolo da davanti. Da a parte indoe scominsia una strada de passegio che se ciama Portal de L'Angel. Se va zo, al pian soto dove ghè i alimentari e le piante, e lí a sinistra se cata le indicassion par i cessi e el parchegio. I cessi i vien neté a orari fissi durante el dí. Con un poco de cul se pol catar anca la carta igenica. ^ torna su ^

Plaça de Catalunya - canton de Carrer de Pelai. Da l'altra parte de la piassa Catalunya gh'è un FNAC come quel de Via Cappello, però de quatro o cinque piani. Par catar el cesso bisogna entrar da la porta che g'è vissin a un bar che el se ciama Zurich. Atenti, el bar el g'ha un cesso, ma no l'è mia massa consigliabile. Invece el cesso del FNAC l'è abastansa neto, i le lava periodicamente diverse olte al dí. Entrando, bisogna andar in fondo dove gh'è la agensia de viagi coi televisori tacà ia. Lí se va zo da le scale a sinistra.

In piassa de la Catedral ghe anca varie entrate al parchegio soteraneo. Entrando a pie da quela che ghè da la parte de la Via Laietana, davanti a un ristorante che se ciama La Taverna del Bisbe, ghe dei cessi grandi che no ghe va quasi mai nesuni.

Pochi i conosse el cesso che ghè drento al patio de la Catedral de Barcelona. Atensión a no confondar ravani con naoni: la Catedral no l'è mia la Sagrada Familia! La Catedral l'è la ciesa gotica che ghè nel cor de la çità. Drento ghè na corte con dei albari de naranse, quatro sinque ochi bianchi, 'na fontana e un cesseto picinin che el se cata girando intorno a la ringhiera dei ochi. Ghe 'na turca che la spussa da campegio in agosto e normalmente no ghè carta igenica.
^ torna su ^

I cessi che consigliemo nojaltri iè dei bei cessi novi che i ha costruio ne la parte nova del edificio del '600. Entrando da una de le porte de davanti, bisogna andar sempre verso sinistra atraversando uno, du o tri belissimi cortili pieni de naranse, fin che se cata la parte nova con de le porte de vero. Se entra ne l'edificio novo con le porte de vero e se gira zo da le scale a destra. Se caté qualche guardia se pol chiedar par no sembrar che volemo entrar par scrocar el bagno!!!

El cinema Verdi l'è in mezo a quartier de Gràcia, el quartier inteletual de Barcelona che fin al 1897 l'era un paesin fora da Barcelona: boteghe de vestiti, bareti, butei, cani, librerie, musucisti e el cine. A parte la programassion de film in versión original che l'è la mejo de la çità, gh'è anca dei cessi al primo piano, in fondo a sinistra su da le scale dopo la baracheta dei popcorn. Se pol andarghe anca sensa aver comprà el biglietto. Mi comunque consiglio de entrar far na pissadina e entrar al cinema.

In fondo a la Rambla de Mar, la continuassión de la Rambla dopo el monumento de Cristoforo Colombo, gh'è dei cessi nel centro comerciale Maremagnum, entrando da le grande porte de vero, dopo le scale mobili a destra, lassando a la nostra destra la botega del Barça. I cessi je come quei del tren de la linea Verona-Brescia, però se sa che tempo, cul e siori far quel che vol lori.

Vissin al Museo Picasso. Par quei che vien fora dal museo Picasso e el g'ha fatto un effetto lassativo o diuretico, o par quei "òldoncan, me son desmentegà de pissar", consiglio el bagno che gh'è a l'entrata del Museu Textil ne la stessa strada del museo Picasso. Entrando se cata un cortile e su la destra dei taolini coi ombreloni. Drito in fondo a sinistra, sensa entrar al bar o al museo gh'è i cessi abastansa neti, co 'na bela luce ciara da dentista.

La Rena Domila Barcelona la presenta la guida CdS: par andar al cine pagando poco. A Barcelona ghe 39 cine par un total de 210 sale. Tuti i giorni, sui giornai vien fora du pagine de programi. Al Vendri ghe le novità. In tuti i giornai la programassion dei film l'è presentada in do parti: prima tuti i titoli in ordine alfabetico con la spiegassion de la trama (Peliculas en cartel) e dopo tuti i cinema in ordine alfabetico coi orari (Cines)

Esempio: da el giornal La Vanguardia del 14.08.2003
Cartelera = L'è el titolo de le pagine dei cinema.
1. Peliculas en cartel
Novedades = I film novi che vien fora ancó
Estrenos = Film novi
Reestrenos = Ex novità che i le fa de novo.
Reposiciones = Film veci, classici, mitici, intramontabili
Madrugada = Film che i fa de note
V.O.S.E. = Version Original Subtitulada en Español
2. Cines
Cines de Barcelona
Cines de Cataluña
Cinema en Català = Film sototitolé en catalan
Sala X = I film porno i se ciama "Pelicula x" (Pron.: Pelicula echis) ei se fa ne le sale X.

La Coa
Parlando de film porno me vien in mente l'importansa de la coa. Quela che bisogna far par entrar nei cine a Barcelona. 'Na roba molto importante da far presente a la gente che l'è mai sta al cine a Barcelona, l'è "come" se va al cine. Qua ghè la strana abitudine de far le coe ne le boteghe e anca al cine se fa la coa, ansi, do coe: una par comprar i biglieti e l'altra par entrar. Ben senti, no ve podí mia imaginar, par nojaltri che semo bitué a entrar al cine sburtonando, sa vol dir, vedar de le coe che le fa el giro del marciapié del cinema. Se vegní a Nadal a Barcelona podí vedar de le coe inspiegabili. Quando te rivi davanti al cinema la frase l'è: "El me scusa, questa ela la coa par comprar i biglieti o par entrar?". L'è n'altro mondo. En catalan se pol domandar: "Aquesta cua es per comprar les entrades o per entrar?" (Pronuncia: Achesta cua es par cumprà las entradas o par entrar?)