Ci semo - Son Umberto (par i amiçi El Berti), vivo da sie ani a Granollers, vissin a Barcelona, ma son de Tombeta. Ex zugador de fúbal, ex sasofonista, ragionier pentido e laureado in Lingue. Ho conossuo el Silvano quando fazea el profesor de Taglian. 'Desso son impiegato in una dita de mobili. A parte el dialeto veronese, la me passion l'è la musica gies. Grassie a la me compagna, la Patrissia, me son abituà a vivar qua, lontan dal Liston, da Santa 'Nastasia, da l'Adese e da Sotoriva. Fao le vasche su la Rambla e el me Liston el se ciama Passeig de Gràcia. Nel cor g'ho sempre un tochetin de polentina col pocin dei useleti, anca se qua se magna ben assé. G'ho l'adesivo del Ceo su la Opel Corsa, ma reconosso che 'na olta ho votà "Elkjaer sindaco". Quando posso vao a vedar el Barça al Camp Nou e me piaze vivar qua parché la gente la laora, ma no l'ha mia perso la 'oia de godarse. E mi son Silvano, de Arbissàn. Vivo a Barcelona dal 1984. Ho scominsià a laorar come ilustrador de libri par diverse Case Editrici de Barcelona e ho fato do mostre a Barcelona a la Sala Gaudì (nel 1985 e nel 1987) e una a Palma de Mallorca. Dal 1989 son Bibliotecario de l'Istituto Italiano de Cultura de Barcelona. Vint'ani via da Verona, da Arbissàn e dala Valpolesela, ma el me cor l'è sempre lì, 'ndo son nato e `ndo ò pasà i ani pi' bei de la me vita. Berti e Silvàn.

Caro Diretor, ieri sera ó visto una de le piassé bele partie de fúbal de la me vita. No solo parché zugaa el Barça, che el zuga da manual, ma anca parché l’á vinto contro l’Inter, ‘na squadra de pelegrini, o mejo, de pensionati, che no i savea indoe çercar el balon. Se fusse stà nà partìa de quele che se fazea ‘na olta, quando s'érimo buteleti a Tombeta, un zugador de ‘na squadra come l’Inter el se sarea ‘rabià e el sarea andà a casa pianzendo. Ma lassando star le questioni tennico-tattiche, e la relativa smerdada a Mouriño, me piasarea spiegarte parché andar al Camp Nou l’è una esperiença quasi mistica. Par un butél come mi, cressù nel fúbal veronese, che á zugà nela Tebaldi, nel Zevio Centomo, nela Juventina Pojano, nel S.Martin Officine Bra (tuti nomi gloriosi del calcio de provincia), ‘rivar a catarte davanti al Campo Noo (Camp Nou) pien de gente, ‘scoltar l’inno de la Champions League e védar el verde coi slusini del campo che el par un campo de golf, insoma, l’è un sogno. Come sa ben tuti quei che è ‘nda qualche olta al stadio, la partìa la scominsia ore prima. Ieri ale sete me son catà con Ramon, el capo del me uficio, che el m’a invità con l’abonamento de so mojer. Primo punto: i abonadi del Barça, che i è anca soci, i è pias´´e de 120.000. El stadio l’è piassé picolo. Se i ghe va tuti al stadio no i ghe sta mia. I abonadi i è de tute le età, dal vecioto a la signora, al bupà con so fioleta a la butéla col moroso. Insoma, tuti i va al stadio. A sto punto l’è inevitabile far paragoni co l’atmosfera de gueriglia urbana che se vive in Italia, ma lasso star e te spiego solo quel che sucede qua, e ci vol el fa i paragoni. Secondo punto: el publico el va a védar el spetacolo del calcio, l’aplaude le assioni dei zugadori, l’e orgoglioso de éssar un publico coreto. El tifoso del Barça l’e`contento solo quando la so squadra la zuga ben, no solo quando la vinse. Con Ramon semo ‘rivé al stadio un’ora prima e el stadio l’era quasi udo e così emo aprofità par magnarse un panin co la “botifarra”, na specie de salsicia picante e calda, e se semo beui ‘na bireta analcolica, parché i alcolici i è proibii al stadio. Se semo sentè ai nosti posti (tuti numeradi) e finché magnavimo podeimo vedar su dei picoli monitor che gh’è ogni diese metri taché al teto dele gradinate, dele imagini de partie precedenti. Nel fratempo el stadio el scominsiava a riempirse de gente, de bandiere, de cori festivi, de musica, de colori e se cominciava a respirar l’ambiente festivo de la Champions League.
El momento piassé emotivo de tute le partie in casa del Barça l’è l’inno del Barça, espression del orgoglio de la catalanità, parché savemo che el Barça l’è “més que un club”: piasé de ‘na società da calcio. (Ino del Barça http://www.youtube.com/watch?v=8b8cGhxhAsY) Quando tuto un stadio de piassé de sentomila spetatori el se alza in pié e el scominsia a batar le mane e a cantar, el cor el te s-ciopa, l’adrenalina la entra in circolassion e se sente un emossion coletiva simile al enamoramento. Quando po te vedi che i valori che te ste condividendo coi altri i è valori positivi come l’amicissia, la toleransa, l’umiltà, el respeto par l’aversario, te capissi che in fondo semo tuti bona gente che l’unica cosa che volemo al mondo l’e star insieme ai altri e godarse la vita par quel che se pol. E questo l’e`el gran miracolo de Guardiola, el mago, el psicologo, el sciamano. Lu l’è riussio a vinsar fasendo zugar 7, e digo 7, zugadori  del vivaio del Barça, lassando in panchina Messi e Ibrahimovic, le do super star, fasendo zugar Avidal, un zugador che tre giorni fa l’era in leto con l’influensa A. Guardiola l’à dimostra a tuti che quel che importa l’è la squadra e no i zugadori singoli. La partia l’è sta bela, pecà che à zugà solo una squadra, parché quei altri no i à visto el balon. Ricordando i tempi del scudeto del Hellas e del mitico Roberto Puliero in direta in piassa Bra, direa che a Verona no se vede na partia così dai tempi del vecio Bintigodi quando l’e ale i era le ale e i tersini i era tersini e comunque, se voli vedar el vero fúbal, g’avi de vedar le partie del Barça, che el zuga, more uxorio, “mejo de Iorio”.
VISCA EL BARÇA I VISCA CATALUNYA ¡! Berti.