Un giorno, dopo avér finì le ferie al mar, prima de ciapàr l'autostrada ò volù far visita ai paesi che gh'era poco distante dal me ombrelòn. G'avéa dei ricordi circa la Via Postumia che passava da Aquileia. Cossita, impostà el navigadòr e vardà internet sul pc portatile, colpo de telefono al Museo Archeologico de Aquileia...e viaaaa.... Ancò Ve parlo de la Via Postumia, antica strada consolàr romana del 148 a.C. fata costruìr da Postumio Albino console romàn che l'avéa pensà de unìr, ne la Galia Cisalpina (che domila ani dopo ciamemo Pianura Padana), i du porti principali del nord Italia Genova e Aquileia. Da Genova in diressiòn dei Apenìni passava par "Pons ad decimum lapidem" e dal Pian de Reste, Monte Pogio, Libarna, Dertona (ancò Tortona). A Piacensa incrosava la Via Emilia ma séitando par Cremona, Verona, Vicensa, Oderzo e Iulia Concordia (ancò Concordia Sagitaria) par finìr ne la bela Aquileia. Alcuni studiosi i dise, che la Via Annia, altra strada romana che da Adria finiva sempre ne la citadina friulana, nel toco Concordia-Aquileia utilisava propio el stesso percorso e la stessa pavimentassiòn de la Via Postumia costruì 17 ani prima. In provinsia de Verona segnalemo el passaio da Vilafranca nel toco da Goito al foro romàn de Piassa Erbe e de le località de San Michél, San Martìn, Caldiér e Soave nel toco dal Ponte Postumio (costruì arénte al Ponte Piera) a la çità de Vicensa, strada che 'desso ciamemo Strada Statàl 11. El Decumànus Maximus, che ne la pianificassiòn urbanistica romana l'era 'na strada co' orientamento est-ovest, a Verona causa la conformassiòn geologica e in particolàr del percorso de l'Adese, l'è stà modificà in sud-ovest/nord-est. Par capirse entrava da l'atuàl Porta Palio, drita par Corso Cavour 'ndoe gh'era l'Arco dei Gavi, Porta Borsari e incrosava nel foro romàn el Cardo Maximus che vegnéa da Porta Leoni da 'ndoe antrava la Via Claudia Augusta da Hostilia. Séitava el percorso saltando l'Adese con un ponte, da l'atuàl Piasseta Bra Molinari de drio a Santa 'Nastasia e i Giardini de la Giarina poco distante dal Teatro Romàn. In pratica l'era el percorso çitadìn che faséa la via Postumia. Ma a Verona in coéi tempi ghe passava la Via Gallica, una diramassiòn da la Via Postumia in diressiòn Mediolanum passando par Brixia e Bergomum, sensa desmentegarse che da Hostilia vegnéa la Claudia Augusta Veronensis, che dopo avér percorso la Vald'Adese finìa in Germania a Augsburg. L'altro toco de la Claudia Augusta denominà Altinate, la partìa da l'incroso con la Via Annia in corispondensa de Quarto d'Altino e passando par Bellunum e 'l Brenner la finìa anca coéla ne la çitadina todesca. Ma tornemo par un secondo a Verona, nominà dai romani come Municipio "Res publica Veronensium", g'avéa tuti i servissi de l'antica Roma oltre legislativi come teatro,anfiteatro, terme e aqua; faséa parte del "Regio X Venetia et Histria" con capitàl Aquileia. Tra le curiosità dovì pensàr che la nostra Rena, la podéa ospitàr el stesso numàro de persone che in coél periodo i abitava a Verona. Cossita par una serie di curiosità ò pensà de visitàr la çitadina friulana con relativo Museo Nassionàl Archeologico a Villa Cassis Faraone praticamente composto da tuti reperti de epoca romana. Ma vegnemo sul discorso Aquileia, importante çitadina romana soratuto dal ponto de vista strategico che vardava verso nord-est europeo e de la mercansia con magasìn "Horreum" e "Portus" sul fiume Natissa "Natiso" (che finìsse nel Mar Adriatico). Nel "Forum" romano incrosava el Cardo Maximus e relativa Via Iulia Augusta antica strada che menava fin a Noricum in Austria (da no confondarse co' coéla Julia Augusta in Liguria) co' el Decumànus e relativa Via Annia da ovest e Via Gemina da est (da Emona conossù come Lubiana). Oltre ai classici servissi e costrussioni come Basilica, Curia, Teatro, Anfiteatro e Terme, g'avéa anca el "Circus" che solo l'altra capitàl Mediolanum podéa verghe sensa desmentegarse de la "zecca". Penso de aver contà 'bastansa, ve invito a visitàr le strade de Verona, magari faséndo quatro passi a Castel San Piero da 'ndoe podì vardàr la çità e le strade romane, el teatro romàn e 'l Ponte Piera. Se magari le vostre vacanse v'a portà in Friuli, magari un salto al Museo Archeologico de Aquileia no l'è mal. Saludi.....El Diretòr