Valeso

VALÈS SUL MÉNS - VALÉSO SUL MÉNSO (Valeggio sul Mincio)

Popolassión: 15.098 Altessa: 88 metri sóra el livèl del mar Superfice: 63,96 chilometri quadri Comùni confinanti: Castèlnóvo del Garda, Sona, Somacampagna, Vilafranca, Mossecàn, Peschiera, Roverbella MN, Marmirolo MN, Mozambàn MN, Volta Mantovana MN, Ponti sul Mincio MN

Comùn al confìn con el mantoàn a 27 chilometri da Verona in diressión sud-ovest e posissionà a sanca del fiume Ménso (Mincio), ne le coline moreniche del Garda. Secondo la toponomastica el nome Valéso dovarìa derivàr da "vallensis", abitante de la val del Ménso e ghe ci dise dal latin "Valles de(or)um" deventà "Valedium" che vól dir "Val de i Dei" fórsi par la presensa de templi pagani. Mentre el nome del fiume el deriva dal latin Minctio "scolo, deflusso" riferendose a l'aqua che vien fóra dal Lago de Garda che la da origine al Ménso. La zona l'éra abità fin da la preistoria, come pól dimostrarne i pai de legno de un vilàio su palafite de l'Età del Brónso, piantadi in origine in mèso al Ménso, ma catadi arénte a la frassión Borgheto su "l'Isolón", un isola lónga 350 metri e larga 60, che la s'à formà coi materiài trasportà dal fiume. Chi, l'éra la residensa de popolassióni venete o retiche e grassie ai scavi del 1956, avémo podù savér ànca, che a quéi tempi i faséa ceramiche, i lavorava la piéra e 'l brónso, oltre cusir e filàr come dimostrà dai reperti. Al vilàio parò, i gà tacà fogo bén do 'olte par dopo èssar bandonà dal tuto. Dal II secolo a.C. g'avémo la presensa romana come i ne dimostra i reperti de anfore, monéde, lumini catà nel teritorio e con tuta probabilità ànca le fondamenta del pónte de Borgheto, i è fate secondo metodi de costrussión de l'Impero romàn.

Ne la frassión Salionse (toponimo da San Leone - San Lionce o Leonzio) gh'è stà el storico incontro nel 452 d.C. tra "l'ambassadór" Papa Leone I mandà da l'imperadór Valentiniano e Attila che l'avéa fato sosta coi Unni da 'ste parti, finido con la ritirada dei barbari. Nel medioevo sul Monte Ongheri l'è stà costruido el castèl a difesa de le case con tuta probabilità presente dal X secolo, quando in giro par la provincia veronese su concessión de Re Berengario, i éra stà costruidi un fraco de castèi par difendarse da le invasioni dei Ungari. El primo documento scrito sul castèl l'è del 1277 quando el Comùn de Verona el ghe l'avéa dà in concessión a Alberto de la Scala. Nel 1325 el castèl l'éra deventà propietà dei Scaligeri e grassie a l'Abassìa de San Zén ànca i teréni de la frassión Borgheto.

Ma i primi documenti che i parla de Valéso i è i diplomi imperiali del 884, 945 e 997, mentre ne la conferma de re Berengario al vescovo di Mantoa Egilulfo del 2 diçembre 894 vien nominà tra i beni «ambe ripe Mincii de Valegio». Tra el 1145 e 'l 1193 se lese i nomi "Valegio" (la césa locàl con la tassa de le deçime, la vien ricordà nel 1145: «Plebem de Valegio cum capellis et decimis»), Valisium, Valesio, Valevo e Vallezo. Con Cangrande De la Scala nel XIV secolo el castèl l'è stà rinforsà in maniera incredibile (nel periodo visconteo gh'è stà zontà l'alta ròca tra le 4 tóri), mentre sóto el fiól Mastino II, l'è stà portà a bón fin el progeto del famoso "Seràjo", un murajón che partendo da Valéso e passando da Vilafranca el finiva a Nogarola Roca. De 'sti muri se pól 'édar i resti del Casteléto del Gherlo che'l segna el confìn col Comùn de Vilafranca. Dal 1387 l'è stà el turno a Valéso dei Visconti fin ai primi ani del XV secolo, e grassie a Gian Galeasso nel 1393 s'à isto la nàssita del famoso ponte fortificado lóngo 600m e largo 26 con muraioni alti 10m e tóri merlade a Borgheto; in parte rovinà nel 1702 e nel '900 par farghe passàr la ferovia, nel 1598 l'éra deventà propietà dei marchesi Guarienti, nel 1825 dei Maffei, col tempo dei Conti Nuvólari e par ultimo del Comùn.

Nel XV secolo, sóto la Republica de Venessia, l'éra posto de confìn e par 'sto motivo gh'è stà numaròse guere e solo dal XVI s'à 'isto un poca de tranquilità. Nel 1595 i çitadini par vosse dei marchesi Guarienti i g'avéa dimandà con 'na létara ai Capitani de Verona, de usar liberamente la róca del castèl e 'l pónte, e grassie al Doge l'è rivà la concessión. Nel 1747 dopo varie bèghe la Serenissima l'à confermà i diriti del Comùn su Roca, Castèl, Ponte, Castèleto del Gherlo con la Fossa e 'l murajón. Ai tempi de la sucession al Ducato de Màntoa nel XVII secolo, l'esercito venessiàn andà in aiuto de Carlo I de Nevers el s'éra fermà a "Valezo sóra Menzo", parché "loco bén difeso et proteto". Nel 1630 dopo le batàje perse a Vilabona e Marengo s'à 'isto i Venessiani ritirarse verso Castèlnóvo e Peschiera lassando Valéso ai todéschi Lanzichenechi che dopo avér robà, spacà fora tuto e portà la peste, i g'a butà fóra par 'nano i abitanti de Valéso che in fuga i s'à rifugià a Verona. Nel 1796 grande batàja a Valéso tra i Francesi e i Austriaçi finida con la ritirada austriaca verso Verona e Peschiera e con l'ingresso in paese de Napoleón, 'ndóe l'à sponsà nel Palasso Guarienti (ora Casa del Patriota) ris-ciando de èssar ciapà dai nemiçi.

Altra batàja de quéle toste l'è stà nel Nadàl del 1800, tra i francesi e i austriaçi, finida con la vitoria francese e 'isto la mancada convocassión de le autorità de Valéso, el generàl Brune l'avéa autorisà i soldà a métar sóto sóra el paese. Nel 1848 durante la prima guera de indipendensa italiana, l'esercito piemontese, guidà da Carlo Alberto, dovér avér vinto a Goito, l'éra entrà el 10 april a Borgheto e ritornà el 30 majo durante l'assedio a Mantoa, con quartier generàl a Vila Maffei. Nel teritorio de Valéso s'à svólto gran parte de batàjade Custosa. Nel 1859 dopo la batàja de Solferin e San Martìn, prima de l'armistissio de Vilafranca l'è rivà Napoleón III a Vila Maffei. Nel 1866 altra batàja a Custosa con Valéso piéna de feridi ne le cése, ospedai e case. A Otobre Valéso l'è deventà Italiana. Da 'édar a Valéso ghe Vila de la Quercia un tempo dei Maffei costruida nel 1692 su disegno de Vincenzo Pellesina de la Scóla del Palladio con arènte el Parco Sigurtà tra i piassè magnifiçi del mondo, composto da pré, àlbari, boscheti, giardini su 'na superfice de 50 etari.

Altra Vila l'è la Portalupi del '700 vóluda da i nobili Verzeri. Tra le cése da segnalàr la parochiàl de Valéso dedicà a San Piéro costruida su disegno de Adriano Cristofoli e consacrà nel 1760, la conserva 'na tela de Savério Dalla Rosa con rafigurà San Piéro in Catedra; la césa de Santa Maria dei Monti costruida sul terén regalà nel 1595 da le móneghe de San Lussia d'Ognissanti de Verona; a Borghéto paese che'l ciapa el nome da la faméja Borghetti, gh'è la césa de San Marco ricostruida nel XVI-XVII secolo con l'abside de 'n antico tempio romanico, la conserva la campana regalà dai Scaligeri nel 1381 e l'imagine de la Beata Vergine de la Mazon venerà da secoli. E alora 'dèsso ne resta che magnarse un bón piato fumante dei famosi Tortelini de Valéso.