VELO VERONESE - Véljie
Popolassión: 770 Altessa: 1087 metri sóra el livèl del mar Superfice: 18,90 chilometri quadri Comùni confinanti: Selva de Progno, Badia Calavena, San Moro de Saline, Roarè Veronese (Roverè)
El paese el se cata a cavàl tra la Val Squaranto e la Val d'Ilasi, in mèso tra el Monte Purga (1257 m.) e 'l Monte Stòze (1080 m). El teritorio comunàl el se presenta con le frassioni Camposilvàn e Adarìn (Azzarino), sensa contàr un bèl mucio de contrade sparse un po da partuto tra cui Kùnech, Tèce, Baltieri, Battisteri, Campe, Comerlati, Carrà, Croce, Foi, Garzin de Sóto, Menotti, Pozze, Purga, Riva, Salaorno, Scrivazzi, Stauder, Taioli, Val, Via Verde. El primo nucleo abitativo i dise che'l sia stà sul Monte Purga, parchè a quanto par gh'éra un bèl "Casteliér" (sistema de abitassioni fortificade) de l'età del fero e ne la stessa zona jè stà catade alcune ceramiche, masenini par el colór, strumenti de folénda (selce) e un par de siguréti de brónso; sucessivamente in epoca romana l'è stà messo in pié un "Castrum" (butado zò nel 1854 par costruirghe l'atuàl ceséta) e usado in epoca longobarda come postassión. Defàti ne la toponomastica el par che'l nome "Purga" el possa vegnér dal çimbro "burg" che vól dir roca. Mentre el nome Velo l'è de origine latina come scrito nel documento del 1287, "Vellus sive curia Vellj", dal Vescovo de Verona Bartolomeo de la Scala par la concessión e la gestión dei teritori de la Lessinia ai cimbri; Velo defàti l'éra uno dei tredese comuni de 'sta comunità.
Istésso discorso par un altro comun cimbro ora frassión, Adarìn (Azzarino) , dal latin àrger, argine che nel veronese deventa àrzere; el teritorio l'è "arginado" da un par de çime e vai, mentre ne le mape medioevali podémo catarlo come "Azerinum". Da visitàr a Velo l'è la césa parochiàl de San Gioàni Batista del 1485 con tri altàri a Santa Maria, San Roco e Corpo de Cristo, un bèl batistero del 1533 in marmo rosso. A l'esterno de la césa gh'è diverse lapidi del '400 e '500 come a esempio quéla del 1801 che la fissa i scheì del vin, del gran e del formento. De questa vècia césa no rèsta altro che un póche de vòlte e de colone, essendo stà rifata la fassàda e l'abside oltre avér sbassà el pavimento a la fine del secolo XIX, su disegno del'abate Gottardi. Da segnalàr la céseta piéna de storia e tradissión de San Carlo Borromeo a Camposilvàn, che la ne ricorda la sosta del Santo Vescovo de Milàn durante el so viaio verso el famoso Conçilio de Trento. Secondo la tradissión l'è stà costruida dai abitanti come ringrassiamento a Carlo Borromeo quatro ani prima che deventasse santo, par avérli liberadi da strie, orchi e altri esseri oscuri presenti ne la Lessinia.
Nel corso dei secoli l'è stà più vólte slargada e nel 1907 gh'è stà zontà el campanìl. Me racomando de no desméntegàrse de visitàr "Covóli" de Velo e Camposilvàn, magnifiche cavità carsiche, 'ndóe jè stà catadi reperti de l'età del brónso e de l' orso speleo nel primo e utensili preistorici nel secondo. Quest'ultimo che se cata in contrada Cóvolo de Camposilvan ve lo consiliemo, parché oltre a èssar bén atressado, gh'è la possibilità de 'édar dei fenòmini meteorologici al'interno de la cavérna e sóratùto parché l'è poca distansa dal Museo Geopalentologico volùdo dal grande Tilio Benetti che merita de sicuro una visita. Chi podì 'édar fossili e reperti preistorici de granda importansa. Se Ve piase el "carsismo" alora podì far du passi verso la "Val de le Sfingi" longa 800m, 'ndóe gh'è presenti una serie blochi de piéra calcare, modeladi da la disgregassión e da l'erosión, bén alineadi e regolarmente distansiadi l'uno da l'altro.
