VÈSTENA - VÈSTENANÓA (Vestenanova)
Popolassión: 2.608 Altessa: 515 metri sóra el livèl del mar Superfice: 24,18 chilometri quadri Comùni confinanti: Badia Calavena, Selva de Progno, Tregnago, San Gioàni Larión, Altissimo VI, Mussolino VI, Chiampo VI, Crespadoro VI
El paese de Vestenanova el cata a la fine de la Val d'Alpón e confina in parte con la provincia de Vicensa con coltivassioni de patate e numerosi pascoli ne la parte alta del teritorio e de ua ne la parte bassa. El çentro abitado el se presenta come un mucio condensà de case iluminade dal sol e dominade da l'imponente césa parochiàl de San Leonardo costruida tra el 1849 e 'l 1853 su disegno de l'abate Gottardi come nel caso de le cése de Casaleón (Caselón), Roncà e Ferara de Monte Baldo. Al so interno podémo amiràr una pala del Ceschini (1583-1649) co' l'arlévo del pitór Alessandro Turchi, rafigurante i Santi Roco e Bastiàn. Quasi in contemporanea con la so costrussión jè stà ricostruide ànca quéle de le frassioni de Bolca nel 1860, Castèlvero nel 1856 e Vestenanova tra el 1863 e 'l 1874. In questo teritorio l'è presente la cèsa romanica de Sant' Antonio Abate tra le più antiche de la val e situada sul col vissìn al çentro abitado.
In questa zona jè presenti i 'basalti colonari', un fenomeno natural de origine lavica molto difuso da ste parti come ànca i fossili, basta pensàr a la vissina Bolca. Propio in questa località la Faméja Cerato da oltre çinque secoli, nel più importante giacimento fossilifero del mondo conossù come "Pesciara", continua a scoèrzar novi reperti archeologici de notevóle importansa storica. Tra i più bei segnalemo el Cocodrilus vicentinus, l'unico esemplàr completo de la so specie, tri fantastiçi péssi Angelo conossudi ànca come Eopletax papilio. Da visitàr assolutamente l'è el Museo dei Fossili de Bolca 'ndóe podémo catàr i reperti fossili de la sopracitada "Pesciara" con didascalie, disegni e ricostrussióni che spiega i fenòmini de la zona de 50 milioni de ani fa come l'avelenamento naturàl dele aque del mar che le querzéa la zona. Dal punto de vista storico, le località de Castèlvero, Vestenavècia, Vestenanoa e Bolca anticamente i-éra autonome.
Defàti "Castrum Vetus" (dal latin castèl antico) ne indica el lógo 'ndóe l'è stà costruida una forificasion o castrum. Nel 1145 questo toponimo risulta èssar atestado a causa de problemi tra el prior del monastero de San Mòro de Saline e i Canonici de Badia Calavena, par la giurisdissión su la césa dedià a San Salvator. Durante el periodo dei scaligeri, i paroni de i teréni del lógo, i-éra i Mezzagonnella che presso el monte Castelàr i avéa costruido el so castèl. Durante el periodo de la Serenissima el teritorio l'è passà sóto la giurisdissión de la faméja nobile veronese dei Da Campo che za' nel 1478 i risulta avérghe un abitassión e una capèla con relativo capelan da mantegnér, sgravadi da questo onore, grassie a l'assegnassion de la quarta parte de la decima a cura de Francesco q.Cristofaro Da Campo. Se parla de l'esistensa de Vestenavècia in un documento del 1145 ma la so origine etimologica sembrarìa derivàr da un nome de persona Vestinus, successivamente vólgarisado in Vestena. Risulta ànca, che dal 9 lujo 1414, sia Vestenavècia che Vestenanova i-éra passade sóto la giurisdissión de la nobile faméja venessiàna dei Emo che lóngo la strada par Bolca l'avéa costruido una serie de edifici rùsteghi.
Questo l'è stà uno dei motivi che l'a contribuido a lo svilupo de Vestenanoa e la so progressiva autonomia dal' originario nucleo de Vèstenavècia, avegnuda con dificoltà par una serie de problemi su la riscossion de le deçime. Queste do località le faséa parte del Vicariado de la Montagna sóto la giurisdissión de la çità de Verona. A Vestenanova i éra sta fabricade de le case denominade "vile", 'ndóe 'desso gh'è el çentro del paese, ma el comune l'éra costituido ànca da contrade sparse par el teritorio. Dei documenti i ne dise che i abitanti de Vestenanova a cause de le tasse massa alte, i éra andà dal Consilio dei Savi e dal doge Marino Grimani che con decreto del 24 genar 1604 jà disposto la ridussión fiscal. Nel 1630 a causa de la peste, el paese l'a perso la metà dei so abitanti zà in completa miseria. "Bubulka cum Vulpiana" inveçe l'éra una "vila" apartegnuda zà dal X secolo a un convento de eremiti agostiniani dipendenti da Badia Calavena, ànca se sóra al Monte Purga, per motivi difensivi, l'éra stà costruido un castèl, de proprietà dei Mezzagonnella.
Nel 1410 l'è passà sóto el dominio de Venessia come Comùn indipendente e faséa parte del vicariato di Tregnago. Nel XVI sec. a causa de scontri tra Venessiani e imperiali, questi lóghi jè stà popoladi da persone in çerca de rifugio, tanto che Bolca podéa contàr quasi 450 abitanti. La prima notissia sui fossili de Bolca l'è databile 1555, bóna parte dei teréni coltivabili i éra passadi in man a le Reverende Mòneghe de Sant'Antonio del Convento de Verona e de la nobile faméja Verità a cui bisognava pagàr 'l livèl. A la fin del '700, la contrada de Cracchi l'è deventà un importante sede notaril de Antonio Cracco e nel tempo, del fiól Piéro. Nel 1785 el Comùn de Bolca l'è riussido a deventàr autonòmo da Tregnago, grassie al riconossimento de Vicariado. L'economia locàl, l'éra conçentrada principalmente su l'alevamento bovin e la lavorassión del legno.
