Colognola

COLOGNOLA (Colognola ai colli)

Popolassión: 8.627 Altessa: 177 metri sóra el livèl del mar Superfice: 20,90 chilometri quadri Comùni confinanti: Ilasi, Soave, Belfiór, Lavagno, Caldiér.

Comùn de la val de Ilasi a est de Verona con le frassioni de Monte e Vila, Pieve, Strà, San Vitor, San Zén e Cadelara, lóngo la strada che in epoca romana l'éra l'antica Via Postumia. E pròpio a quél periodo deriva el toponimo "Coloniola o Coloniola ad Colles", infati, in 'sta zona s'à fermà i veterani de l' XI Legión Claudia Pia Fidelis formando 'na "Colonia" con relativo "vicus" e incaricadi de tegnér d'ocio l'importante arteria stradal da possibili incursioni straniere. I Romani i dividea con un çerto criterio i teréni (710 metri quadri par lato) "centuratio" in modo da podér contentàr 100 veterani. E zà in quél periodo vegnéa fato el vin, ricordà parfin da Plino, Marziale e Strabone, el famoso "Reticum". E cossita, 'ista la so importansa, el paese l'è deventa sempre piassè grando, tanto che nei primi secoli dopo Cristo l'è stà costruida 'na fortessa. Tra i reperti romani, da segnalàr scrite de ogni tipo, tochi de 'na vila e de 'n aquedoto, monéde, cipi, fibule, vasi; in particolar che i pól dimostrarne de la centurassion romana ghe i cipi gromatiçi ne la frassión Pieve e 'na scrita dedicà a Mercurio murà ne la fassàda de l'antica pieve.

Colognola nel' XI secolo l'éra feudo de la faméja Nogarola come pól testimoniàr la lapide catada nel vècio campanìl de la césa, e pròpio in 'sta epoca l'è stà costruido el castèl su la colina sóra ai tochi de fortificassión romana 'ndóe 'desso gh'è la césa parochiàl. El nòbil e grande castèllo l'è stà butà zò e ricostruido un fraco de 'olte, come nel 1231, quando, a causa de l'autodeterminasion de la popolassión de Colognola che l'à vóludo stacarse da la çità, el Podestà de Verona "condannò a fil di spada quél povero popolo, abbandonò la rocca e le case al furore del ferro e del fuoco che le distrusse dal fondo". Dopo la distrussión del castèl, Colognola l'è passà sóto al dominio Scaligero e col tempo Visconteo e Venessian con giurisdissión dei Conti Nogarola e dopo dei Nobili Priuli. Con "il mal contagioso" importà in Italia nel 1630 dai Lansichenechi conossù come peste, la popolassión l'è passà dai 2172 abitanti a i 1083 de l'ano dopo.

Colognola l'è rimasta fedele a Venessia fin al tratato de Campoformio del 1797 quando l'è passà a Napoleón, mentre nei ani sucessivi fin al 1812 ghe stà un bèl poche de batàje tra francesi e austriaçi de 'na çerta importansa ne la zona, finendo definitivamente sóto l'Austria nel distreto de San Bonifacio fin al 1866 quando l'è deventà "Italiana". Tra le cése da segnalàr la parochiàl dedicà ai Santi Fermo e Rustico, ricostruida nel '600 al posto de l'antica capela ricordà da papa Eugenio III nel 1145, sgrandà nel XV secolo. Gh'è rimasto ancora dei tochi de l'antica costrussión come capitei, colone e bassorilievi del '300 con rafigurà la vita de S. Biagio mentre la fassàda e 'l campanìl jè de la metà del '700. Tra le zonte del XIX secolo gh'è la cupola e l'altàr maior col tabernacolo, copia picenina de l'Arco dei Gavi, mentre tra quéle del XX secolo ghe le quatro capele.

Drénto la césa se pól'édar 'na bèla scultura del Giolfino del '400 con rafigurà S.Antonio Abate, 'na bèla "Anunciassión" del Morone e un fonte batesimal del XV secolo. Un importante Pieve l'è ne la frassión òmonima, 'na 'òlta antica sede parochiàl la "Plebem Coloniolae" citada ne la bóla papàl de Eugenio III nel 1145 e costruida sóra a un tempio pagan dedicà a Mercurio come scrito su la fassàda. Drénto se pól'édar numarosi afreschi del '300 e '400, statute del XV secolo e du altàri del '600. Altre cése interessanti jè quèla de San Vitor costruida nel '900 al posto de n'altra del XI secolo, de San Zén costruida nel 1770 al posto de l'oratorio arènte al çimitero con drénto una pala del Farinati e l'Oratorio de Santa Crose fato costruìr dal Conte Nichesola nel 1786 arènte vila Fano. Tra le vile da segnalàr quèla ne la piassa prinçipal la vila Cavalli-Peverelli del '500 con tochi de l'antico castèl, Palasso Portalupi in stil baroco e nel teritorio de Colognola Vila Fano ne la frassión Vila del '700, Vila Zoppi a San Zén del XVIII secolo, Vila Moscardo con capela del '700, Vila Maffei de origine del '500 a Cadelara. Colognola s'à svilupà sóratuto ne l'agricoltura con le colture de l'ua, de l'olivo e in particolar dei bisi conossudi par l'otima qualità dei "Verdoni".