curvasup
rena
titoli
etimo
scrivano


Come curarse sensa tor le mediçine
Mediçina alternativa o un alternativa a la mediçina?
ATENSION: 'Na guida de fine '800 su come 'na 'olta la zente se curava sensa mediçine ma con metodi naturali. Me racomando de no usàr 'sti metodi sensa prima avér consultà el Vostro dotòr de fameja. In qualsiasi caso el sito no l'è responsabile se a vojaltri Ve salta in mente de provàr una cura alternativa de quele che indichemo, l'è solo un documento storico da visiònar.

Capitolo 1.0 Par i dolori muscolari (carne grea) se mete 'na moneda de rame sora al muscolo che te fa mal. Dopo se fissa 'na candelina "de la çeriola" impissà sora la moneda. A 'sto punto se ciapa un bicér udo roersandolo sora la candela, fasendo come 'na ventosa. El dolòr el va tuto nel bicér. Par le gambe sgionfe: Se fa un infuso con foie de nogara e èdara, zontandoghe un pugno de sal. 'Desso te pol farte un bagno ai pié e a le gambe. Se col fredo salta fora le Buganse (geloni) se fa dei bagni caldi ai pié o se ghe pissa sora.

Capitolo 2.0 Se par sbaio uno el se taja, bisogna disinfetàr con el pisso e ligarghe insima la scorsa de 'na rama de morar. Quando la scorsa l'è seca la ferida l'è bela e guarìa. Una variante jè le foje de betònega o de malva con fili d'erba, o anca la famosa erba ciamà "ojo de tajo". Par la féara (febbre), un rimedio l'è far un bearon con piantine de fraghe selvadeghe tiré su da la tera co' tanto de sentaini tacadi a le raise. Par finir in belessa, 'na 'olta da le parti de Soave gh'era 'na scudela de marmo murà arente a la porta de la césa de la Madona de la Bassanela 'ndoe la zente ghe metea drento la molona, nel tentativo de far passàr l'Emicrania. Se disea...se la Madona la vol...se guarisse.....

Capitolo 3.0 Par i cai bisogna metarghe sora un poche de foie de erba grassa. Par le done con problemi de cisti a le tete no l'è mal una ciara de ovo batù con l'oio de oliva; tamponàr par nove giorni reçitando una novena. Par i reumatismi se cura con dei sachei de séndre calda o basta ciapàr un poco de sol sul lago. Par la tosse canina se prepara un piato de roba da magnar al butin;. Prima de darghelo da magnar se ghe fa dar dò o tri lecade a un can; In alternativa, e l'è bastansa scontà, se porta i butini a la matina presto in un altro paese par farghe cambiàr aria. Par l'Ulcera e chi entremo nel mejo de la mediçina, se magna un bel bogòn intiero e vivo.

Capitolo 4.0 Par el mal de stomego se beve un bel cordiàl che el vien fato lassando a bagno ne la graspa la stropa de canapa. Par l'orsiol (orzaiolo) se varda con l'ocio malà drento na bossa de oio o se fa impachi de camamìla. Prima che te vegna la peronòspera (rafredor) meti na castagna mata in scarsèla.

Capitolo 5.0 Par el mal de testa se podarìa metarghe un par de fete de limòn su la fronte tegnù da un bel fassoléto imbevù con l'asé; pol darte 'na man, béar un bel gosso de cafè slongà col sugo de limòn; se magari la cefalea t'è vegnù dopo aver magnà massa (imbugà) te convien purgarte o se l'è vegnù fora parché te eri incassà alora un bel gosso de camamìla no te fa mal.

Capitolo 6.0 Par el mal de pansa, polmoni, stómego o altri parti del corpo se ligava el malà a la pianta, in particolàr el téjo (tiglio), róero (quercia) e fò (faggio). La venerassiòn par le piante l'era in uso ne le popolassioni todesche come quele dei Cimbri; el téjo l'era sacro, par questo l'era piantà al çentro del paese e l'era simbolo de giustissia mentre soto al fò se faséa granfi afari. La pianta, in pratica, la dovea "magnàr" el màl del poro malà. Par la gastrite se posissionava de le foje de Bardana sul stòmego, che'l podéa èssar ònto con la camamìla butà ne l'oio de olìa frito.

Capitolo 7.0 Par stimolàr la "diuresi" al dì de ancò ne le publicità, i te dise de bèar una tal marca de aqua. Un tempo parò se beveva una bela scudèla de pissacàn mojo fata bóiar in aqua; o par ci voléa gh'era la variante con la çéola. Come sistema depurante e disintossicante no gh'era la "lavanda gastrica" ma el ménego maìstro Par le feste o i "cenoni", un tempo in Lessinia, se ghe metéa in aqua la ruta. Par le infiamassioni inveçe o par el brusòr de stómego la malva o la genziana. Par el colesterolo, gnente mediçine o dotori, in aqua se faséa bóiar i bruscànsoli e le ortighe. Par finìr in belessa, contro i "dolori mestruali" o in caso de ritardi, bagni ai piedi con aqua calda, semola e sénar par 10-15 minuti.

'Na ponta de flora veronese
Conossemo le piante veronesi, un poche de curiosità nel segno de la tradissiòn e de la storia de la provinçia.
foto Rumando tra i me libri ò catà calcossa de interessante, su la "flora veronensis" del 1822 scrito in latìn par man de un çerto Ciro Pollini. Cossita Ve parlo de 'sto mondo sconossù anca dal ponto de vista veronese. Nel periodo de Nadàl va de moda el "pungitopo", pianta sempreverde che conossemo tuti con le famose baléte rosse che in origine l'era messa a protessiòn de la roba da magnàr in caso che i rati, magari de inverno, i magnasse le "proviànde" (provviste). Se te fe fadìga a pissàr, l'è anca un componente de le "5 raìse", diuretico in compagnia del sèleno (sedano), parsémolo, fenòcio e spàraso. Noàntri lo conossemo come "Brusco" mentre ne la léngua de Catullo l'è el "Ruscus aculeatus Liliopsida" bon anca ne la fritàja se ciapèmo i buti (germogli) o anca nel manestròn e ne le salate. Ne le nostre montagne lo catemo nei boschi ai pié de àlbari come quéi de le giande (ghiande); pochi i sà che i comuni de Roarè e Séro Veronese i g'à come simbolo o "stemma" la pianta de la Quercia, infati el primo l'è el "Quercus robur" mentre el secondo l'è "Quercus cerris". A proposito de piante "comunali" gh'emo Nogara conossù come l'àlbaro de le nose mentre l'italiàn bosso no l'è altro che el "Vérdo" dal latìn "Buxus sempervirens" el paese de Bussolengo 'ndoe ai tempi dei romani gh'era un bosco con 'ste piante. E Sanguiné? Un tempo i diséa che da 'ste parti ghe fusse tante piante da le foie rosse de "Cornus sanguinea". Quante cose emo imparà in poche righe? A la prossima....El Diretòr




menego maistro
MÉNEGO
MAÌSTRO
Le cure de un tempo co' le erbe, ne la provinsia veronese >vai
menego maistro
DIZIONARIO BOTANICO
I nomi de le erbe, piante, àlbari, fiori nel veronese >vai
el magnar in taola
EL MAGNÀR
IN TÀOLA
El magnàr de la tradissiòn veronese in pratiche schede >vai
proverbi
PROERBI E
MODI DE DIR
La più grande colessiòn de proérbi e modi de dir del veronese su internet >vai
ai tempi de me nono
AI TEMPI DE
ME NONO
Fole, zughi e filastroche, momenti de vita vissuda >vai
mighecredo.htm
MI GHE CREDO
Le tradissioni tramandà de pare in fiòl, da generassioni >vai
menù
La Rena Menù
Se te vol tornàr al menù del sito in pochi secondi....