06 Genàr - Brusémo la vècia!
Scarga el spécial de la Bassa e de la Lessinia.... Scarga.

25 Genàr - San Paolo dei segni.
La prova de le sèole. Ne la note del Santo, se mete de fora, sul davansàl de la to finestra, dodèse spighi de sèola con sora del sal grosso ne l'ordine che te vol. Ogni spigo l'è un mese de l'an. Se el sàl se desfa poco o tanto, te capiré se ghe sarà un mese con piova o suta.

29 Dugno - La Barca de San Piero
La sera del 28 dugno, vigilia de San Piero e Paolo, se ciapa un bel fiasco de vero, trasparente, che vegnarà impienì de aqua fin a metà. Dopo se lassa cascàr drento la ciara de l'ovo. Te meti el fiasco su l'erba in maniera che'l ciapa la rosada (rugiada) de la note o se te vivi in çità sul davansàl de la finestra. El giorno dopo buta un ocio al miracolo, la ciara de l'ovo ciapa la forma de una barca a vela. A seconda de la forma de le vele te pol savér le previsioni del tempo par el resto de l'an agrario. Vele verte vol dir che vegnarà el sol, longhe e strete aqua. Una tradissiòn unica che ogni an provémo e ogni an ne fa restàr a boca verta, una maraveia che dovì provàr!

13 Diçembre - Santa Lussia
Come mai ogni ano in diçembre tra l'8 e 'l 13, vién posissionà dei banchéti che ciamemo de Santa Lussia, co' dolçi, roba da vestìr, zugatoli e curiosità in Piassa Bra? Tra le varie ipotesi de Don Antonio Pighi nel sò opuscolo "La Fiera de Santa Lussia in Verona e l'origine dei regai" del 1903 e ciapà in man anca da Arrigo Balladoro nei so studi su le tradissioni popolari Veronesi, par, che l'adorassiòn de Santa Lussia a Verona sia ligà a una bruta epidemia a i oci nel '400, che faséa deventàr orbi in particolàr i buteléti. I genitori no savendo da ci 'nar i s'a messo a pregàr Santa Lussia, faséndo un voto, con la speransa de farli guarìr. Cossita un giorno sti pori buteléti, scalsi, i è andà verso la césa de Santa Lussia che un tempo se catava in Corso Porta Palio nata nel 973 d.C. Ma par convìnsarli a far 'sto voto, gh'era sta dito che la Santa, nel fratempo la impieniva co' i dolçi, le scarpe e le calse lassade a casa. In 'sta césa g'avéa sede la compagnia dei orbi, che l'andava a manghèl (questua) portando in giro par la çità la Santa. Da la césa de Porta Palio, el 31 otobre 1584, la compagnia l'era passà in coèla de San Bernardo ciamà de Santa Maria Vècia, che la se catava 'ndoe ancò ghe el colegio Angeli in via Battisti. Nel 1608, i orbi i s'a spostà ne la césa de Santa Agnese 'rente a Piassa Bra dove ancò l'è presente el Muniçipio. L'era una bela césa e tuto atorno, nel lato orientàl de la Bra, un quartiér belo grando, come ne dise i "ati notarili" del 1268. Tacà a la costrussiòn dal 1478 gh'era un ospedàl par le pestilense. Femo un passo indrio, al discorso de la tradissiòn dei regài e de le bancarele del 13 diçembre. Finìa l'epidemia, l'è restà la tradissiòn de portàr i buteléti el giorno de Santa Lussia ne la césa 'ndoe se venerava la Santa fin al 1810, coàndo l'è stà butà zò. Le bancaréle con i zugatoli, tri giorni prima de la festa de Santa Lussia in Piassa Bra, le sarìa ligà a un usansa religiosa, infati, de chi, se passava par 'nar in pelegrinaio a la statua de la Santa. La césa l'era dedicà a Santa Agnese e Santa Lussia, infati gh'era scolpide do statue su la fassada (facciata) e sora la pala de l'altàr magiòr. Anca nel terso milenio i sèita a rivàr i banchéti in Piassa Bra, mantegnendo in vita una de le tradissioni più importanti de Verona.

Si Quaeris (Sequéri miracola)
Quando se perdeva calcossa, da 'na pena a 'n gato, se dovéa far dimanda a Sant'Antonio da Padova. Un tempo in ogni contrà gh'era l'esperto che recitava a memoria, come un prete, i Sequéri (Le Massime Eterne - Libro da Messa - de S.Alfonso Maria de' Liguori). Par far in modo che la preghiera la fusse 'scoltà mèio dal Santo, la vegnéa dita da un buteléto e tuti insieme insenocià davanti al quadro de Sant'Antonio. El problema l'era che pochi i savéa lésar e vegnéa fora de quei stramboti da paura. El risultato l'è garantì. Si quaeris miracula: mors, error, calamitas, daemon lepra fugiunt; aegri surgunt sani. Cedunt mare, vincula: membra resque perditas, petunt et accipiunt, iuvenes et cani. Pereunt pericula, cessat et necessitas, narrent hi qui sentiunt, dicant paduani, Cedunt mare etc... Gloria Patri eet Figlio et Spiritui Santo. Cedunt mare etc. Ora pro nobis, beate Antoni, ut digni efficiamur promissionibus, Christi....Oremus....Ecclesiam tuam, deus, beati Antonii, confessoris tui, atqua doctoris, deprecatio votiva laetificet: ut, Spiritualibis semper muniatur, auxiliis et gaudis perfrui mereatur, aeternis. Per Christum Dominum, nostrum. Amen. Recitàr tri Pater, Ave e Gloria.