LA RENA DOMILA - DAL 1999 EL SITO VERONESE DEI VERONESI IN VERONESE

03 Speciali - Vènardi Gnocolàr 2018 - Le foto e do parole su la manifestassión

El Vènardi Gnocolàr l'è una manifestassión che da piassé de 500 ani la va inànsi a "moto perpetuo". No serve grandi sforsi, basta far quel che s'a sempre fato. St'ano catémo 'na coriera par i marcà a portàr i gnochi e dei mercatini a San Zèn oltre a i càmion del sponsor neta fogne in prima fila al corteo. Questa l'è l'inovassión 2018. Co' el novo comitato, se podéa spetàrse de mèio, par far védar che qualcosa l'è cambià a livèl organisativo. El recupero de la cultura carnevalesca podarìa dar una grossa man a far le cose secondo un çerto criterio. Se no gh'è La Rena Domila co' le conferense storiche e 'l museo del carnevàl, a Verona no se vedarìa la cultura del carnevàl. El poro Papà del Gnoco emossionà e agità, no'l vedéa l'ora de finìr el percorso ancora prima de scominçiarlo, difiçile da fotografàr. La nostra proposta, a la qual semo stà messi a la berlina, l'era de realisàr una scola par i Papà del Gnoco, 'ndoe ghe vegnéa insegnà la storia, la cultura generàl veronese, far capìr ci l'è el Papà del Gnoco e soratuto stàr co'la zente. Personalità, caratere, carisma e umiltà, dovarìa èssar el significato del Papà del Gnoco. Una màscara no par tuti. Ma questo passa al convento par quanto ghe sia la bona volontà. Qualcuno scominçia a capìr che'l carnevàl l'è dedicà a i butelèti e che, de conseguensa, i ghe porta i genitori che stranamente i era in costume. St'ano, èmo visto un poca de alegria, mancà nei scorsi ani, forsi parché tanti figuranti e màscare vece no le gh'è più a causa de l'età anagrafica. I cari de la provinçia, da sempre, la nota de colòr de la manifestassión, nel 2018, a parte qualcuno, i dimostrava seri problemi economici, par quanto bei da vèdar, par fortuna bilancià co' i colori de le coreografie. Tra le cose negative che se ripete ogni ano, come el corteo lento, distansa tra un grupèto e l'altro de 5-10 minuti a metà percorso, l'è stà, el volume de la musica dei cari che se sentìa fin su le Toresèle. El nostro voto a questa manifestassión, tegnendo conto de le polemiche nate dai comitati storici prima del vènardi gnocolàr l'è 6,5. Questo voto el sarà presente anca par i prossimi ani, par far el salto de qualità serve ben altro. p.s. i butèi bisognarìa portarli nel carnevàl inveçe de védarli a tirarse drio ovi e farina.... La Redassión