LA RENA DOMILA - DAL 1999 EL SITO VERONESE DEI VERONESI IN VERONESE

El Vènardi Gnocolàr l'è una manifestassión che da secoli va inànsi a "moto perpetuo". No serve grandi sforsi, basta far quel che s'a sempre fato. St'ano émo visto la volontà de cambiàr o quasi le cose, a parte le polemiche durante le elessioni par el sire. Come al solito la parte del león l'è riservà ai càri de la provinçia, costruì veramente ben, anca se i faséa massa bacàn. Tanti comitati s'à presentà con du, tri rapresentanti, forsi l'era el caso de no sfilàr. Tri palcheti sparsi longo el percorso nel tentativo de contàr tri parole in croçe su la sfilada, ma con scarsa preparassión soratuto storica. In positivo, gh'è da segnalàr, manco "busi" tra i vari comitati che sfilava anca se, 'sto problema, no l'è mai risolto nei secoli. El poro diretòr artistico, fresco de nomina, l'à dovù organisàr el Vénardi gnocolàr 2019 in un solo mese, ma a parte la festa in màscara a la Gran Guardia del marti grasso, no émo visto do righe de novità. In Piassa Bra, segnalémo buteléti co ovi e farina, specialisti in un zugo che faséa 'bastansa schifo da 'èdar co' i vigili no propio presenti. Come voto par el carnevàl de st'ano confermémo el 6.5 de l'an passà. La sfilada l'è andà via, sensa grandi emossioni. La Redassión