LA RENA DOMILA - DAL 1999 EL SITO VERONESE DEI VERONESI IN VERONESE

Tuta colpa de le vache - No l'è el riscaldamento de le abitassioni e gnanca el pm10 che pol provocàr el bùso ne l'ozono ma le scorése (mèio se vestìe) de le vache. Da una riçerca Italo-Mericàna, vièn fora che almanco el 10% dei gas sparsi par el mondo e che i pol far mal al nostro pianéta, iè par colpa de le bestie; de questa persentuàl gh'émo, le vache par el 74%, pègore par el 9%, bùfali par el 7%, porséi par el 5% e le cavre par el 4%. Dal 1961 al 2010 i gas butà fora dal de drio iè deventà sempre de più, co' un aumento del 51%. Sarìa mèio, magnàr manco carne, ma ossi de porco e brodo de galina inquina de manco. In pratica le vache da late, le buta fora el metano grassie ai microorganismi che se cata nel processo de digestión e dal protossido de azoto del luàme devéntà smarso a l'aria. A tal proposito semo andà in Lessinia dal nostro amigo Bifolco Villici, esperto bacàn da generessioni, che''l n'a dato una solussión al problema. Basta métar un tubo nel cul a le vache par la produssión del metàno par riscaldàr le malghe e far nar i tratòri.