LA RENA DOMILA - DAL 1999 EL SITO VERONESE DEI VERONESI IN VERONESE

L'ultima nel veronese giusto par farse riconòssar. Nel Comùn de Bussolengo, a un omo, gh'è capità da pagàr una multa de tresénto euri par colpa de le sgaùie. Avì capìdo propio ben. Da tempo, i "operatori de le sgaùie" i passa porta a porta da le famèie, par portàr via la roba da butàr. Un giorno la plastica, un giorno la plastica, un giorno el vero, un giorno el mòio ecc... 'Sto poro desgrassià, l'à sbaià 'stimàna, parchè ogni 15 giorni se buta via la carta e propio nel giorno sbaià l'è passà el vigile del Comùn che'l g'a fato 'na bela multa. Magari calchedùn g'a fato un scherso e la sera prima el g'a messo la carta e ciamà i vigili par farghe ciapàr la multa! Tresénto euri, gnanca fusse passà co' el semaforo rosso! El belo l'è, che tanti, i preferisse butàr plastica e vero longo la strada, ma a quèi, nissuni ghe dise gnente, parché no i riesse a védarli; nel nostro caso qua de sora, el poro omo el g'a un nome, un cognome e un indirisso. Durante el periodo de Nadàl, ne vién segnalà, che i vigili no i-è così bràvi nel dar le multe a ci parchègia poco distante da una famosa botèga de fiori longo la strada in divieto de sosta. Quel si, quèl no, quèl forse, sempre quèi a la fine che paga. Penso che una multa de quel tipo, l'è pari a tri ani de pagamento del servissio cava-sgaùie/porta a porta. Queste notissie te fa capìr che la "Legge" no l'è stessa par tuti, le "regole" rispetà solo dai soliti. Qua se parla de carta, no de oio e benzina o roba che inquina l'ambiente. El bon senso dov'èlo? Sempre figure de merda, che al dì de ancò le va a finìr su tv e giornài in poche ore. Le Istitussioni le par che sia par conto suo, ma fémo notàr che i-è pagà da l contribuenti, i-è lore a le nostre dipendense e no al contrario!.......  El Diretòr (Verona 30.10.2018)