LA RENA DOMILA - DAL 1999 EL SITO VERONESE DEI VERONESI IN VERONESE

Se mi dovesse far un bel presepe, par farghe el niàl al fiol de la Madona, me bastarìa vardàr la me Verona e restarìa incantà fin San Giusepe, se mi dovesse far un bel presepe. Con queste prime righe de una grande poesia, el poeta scultòr Mario Salazzari ne parla de la nostra Verona come de un presepe. Eh si la çità l'è un qualcosa de unico, che meritarìa de meio, èssar valorisà. Ma purtropo, passa le aministrassioni, ma no cambia gnente, semo sempre magnà dal smog e dal casìn, veci palassi udi che casca zò, altri che no se sà cosa fàrghene. Semo patrimonio de l'UNESCO, ma cosa femo par meritàr questo riconossimento? La cultura no l'è capida e ci le porta avanti el vién scambià par un alieno. Quando vién fato qualcosa dai soliti noti che no l'è gnente de particolàr vién portà in alto in pompa magna, ma ci se fa un bel cul col volontariato el vièn sconto; tante persone le se fa védar bele col làoro oscuro dei altri. Qua a Verona la statueta del paracul l'è de casa e nel me presepe podarìa mètarla dapartuto e se risolvarìa la disocupassion, mentre de mussi ghe ne tanti e no ghe sarìa posto ne la stala. Dovémo èssar più boni nel mese del Signòr, ma l'è anca el mese de le falsità, 'ndoe te ghe fe i auguri a ci te stà su le bale, 'ndoe te fe un soriso sforsà. Forse con più onestà e responsabilià el nostro presepe el sarìa più bel e Gesù ne la nostra "Minor Hierusalem" el ghe starìa ben.... Bon Nadàl ! (Verona deçembre .2018 - El Diretòr)