LA RENA DOMILA - DAL 1999 EL SITO VERONESE DEI VERONESI IN VERONESE

Cari veronesi, l'è passà un altro ano, ma gnente de novo s'à visto a Verona, no l'è cambià un casso. Questo dirìa me nono se fusse ancora vivo. Se vol tornàr indrio ai bus co' le tiràche come 60 ani fa, casca a tochi l'arsenàl, el pm10 l'è rivà a le stele, auto dapartuto e la cultura ciapà a pessatade par far posto a le cagàde che fa moda. Gh'è sempre più butèi disocupà che i vive in famèia come 100 ani fa e gh'è sempre manco schèi nel quàia, ma l'importante l'è gòdarse, pecà che i barùfa anca nel carnevàl. Dal 31 deçembre al primo genàr no cambia un casso, t'è finìdo un ano de merda e te pol scominsiàrghene un altro de stesso. Chi vive sperando el more cagando. Bon ano? De cosa? La sopravivensa l'è l'unica cosa che te serve. I schèi no i fa la feliçità? Prova a no vèrghene gnanca uno, te vedarè. La Rena Domila in questi vint'ani l'è andà avanti sensa contributi, così el primo de aprìl smorsa vinti candeline. Uno dei siti piassè veci de Verona che porta avanti la nostra cultura. I grupi su feisbuc iè vegnù tuti dopo, parfìn el quotidiàn de la nostra çità su internet. Dovì tegnerlo presente e savér che tante 'olte i ne ciava el nostro materiàl publicà, parché pochi iè boni de portàr avanti le tradissioni veronesi come femo noàntri. Gh'è bisòn de l'aiuto de tuti, a 'olte basta poco, dieserighe, le stesse che magari scrivì drento a pagine de sociàl che dimàn no le ghe sarà più. Qua tuto l'è a la luçe del sol e sempre disponibile. 1999-2019 nissuni l'è come La Rena Domila! Bon 2019... (Verona deçembre .2018 - El Diretòr)