LA RENA DOMILA - DAL 1999 EL SITO VERONESE DEI VERONESI IN VERONESE

Caro Veronese, nel 2019 La Rena Domila smorsa vinti candeline, par questo motivo podémo dir che l'è uno dei siti internet piassè veci de Verona. In questi ani, a parte le publicassioni sul Ueb, èmo organisà convegni e manifestassioni,stampà libri sensa 'verghe schei ma solo par passion. Nel tempo, i novi siti internet e in particolàr i molti utenti dai social, iè vegnù drento La Rena Domila par copiàr el nostro làoro, segno de l'ignoransa che gh'è in giro e del nostro grande làoro par mantegnér vive la storia e le tradissioni. Nei social 'ndoe se cata un fraco de zènte, te pol scrìvar i to pensieri e 'verghe 'na risposta de un altro nel giro de pochi secondi. Ma no tuti ghe piase 'sto tipo de casìn, 'ndoe gh'è sempre qualcuno che'l vol stàr sora l'oio no savendo un casso. La Rena Domila publica tuto a la luçe del sol e l'è façile da catàr, l'è sempre disponibile. Noàntri femo filò, ne piase catarse denànsi a un piato de riso co' el tastasàl, vardarse nel muso e ciacolàr de la nostra cultura in alegria. No se scondémo drio a falsi nomi, semo veri, fati de cicia. Utilisémo anca Fb ma l'è solo a scopo divulgativo del nostro làoro, no per far beghe. Te devi pensàr che La Rena Domila l'è uno dei pochi siti veronesi, presenti nel sito del Ministero dei Beni e le Atività Culturali. No cassade! Inveçe de butàr la to sapiensa in posti 'ndoe la visibilità l'è limità a un par de ore, contribuissi a la cultura su La Rena Domila nel mondo, scrivendo un articolo de dieserighe@larenadomila.it del to paese o su una de le 50 rubriche e se te no te vol fàrghene de manco, anca su FB. In questo ultimo caso, vardèmo la to idea e se l'è bela, finisse nel sito. Gh'è bisogno de ti. La Rena Domila l'è unica, i altri iè nati dopo! Nissuni l'è come La Rena Domila!  (Verona genàr .2019 - El Diretòr)