LA RENA DOMILA - DAL 1999 EL SITO VERONESE DEI VERONESI IN VERONESE

Grassie a la giunta comunàl de Verona, sarà verto un grandioso eliporto par le sdinsàle del Sahara ne l’istà 2019. Con manco de 50 mila euri, AMIA l'è el nóvo responsabile par la campagna anti-sdinsàla par tuta la çità de Verona, 260 mila abitanti. I veronesi parò i g'à un nùmaro verde telefonico messo a disposissión da AMIA par segnalàr i nóvi eliporti che podarìa nàssar nei parchi e nei giardini. Intanto ne le botéghe, qualchedùn fa scorta de Autan, Raid, antistaminici, gerani, sgulmarìn e lavanda che podarìa mancàr nel momento de bisogno vista la forte dimanda. El comune de Padova, el ghe tién a la salute e a la rotura de maroni de i so çitadini, difàti, tira fora dal tacuìn più de 200 mila euro l'ano, contro le sdinsàle. Ma atensión che visto le elessioni europee de fine maio, el risultado eletoràl no l'è sicuro. Se par sbàio, in questi giorni, el veronese medio vién smorsegà a un brasso o 'na gamba, podarìa cambiàr el voto a favòr de l'oposissión co' tanto de bastiéme. In pratica, la volontà de risolvàr questa problematica, da parte del Comùn l'è pari a zero; l'è come usàr el salarìn su le strade ingiassà d'inverno o speràr che piova par sbassàr i livéi de inquinamento. Ma, se mi pago le tasse, dovarìa 'verghe de ritorno dei servissi utili o almànco una crema contro i smorsegòni da sdinsàla!.... Toni Marùgolo da Bùtapiéra (Verona 30.04.2019)