LA RENA DOMILA - DAL 1999 EL SITO VERONESE DEI VERONESI IN VERONESE

A Verona semo ormai abituàdi a le buse par le strade, erba su i marciapié, palassi che ogni tanto perde un toco come ultimamente la Gran Guardia. Oplà par magia, parò, quando gh'è un grande evento, salta fora i schei par sfaltàr e parlémo de 320 mila euri. El 2 de dùgno a Verona ghe sarà la gara a cronometro del 102°Giro d'Italia, famosa corsa ciclistica; se parte da la Fiera, passando par le Toreséle e se finisse drento a la Rena. Le vie interessade a i laori i-è: viale Piave, circonv. Spere de Sol, via del Fante, LungAdese Capuleti, via Torbido, via dei Partigiani, via Bassetti, via Barana, viale dei Coi, via Nievo, ponte dela Vitoria, via Diaz, corso Cavour e corso Porta Palio, via Scalzi, via Scopoli, via Dei Monteci, via Mameli, via Bixio, viale de la Fiera, LungAdese Matteotti, via Valverde, via Caroto e via Marsala. Altri 130 mila euri i-è par interventi de sistemassión par el giro da parte de Agsm, Open Fiber e telefonia. Dovémo inventarse qualche altro evento in vie secondarie par védar sfaltà? Quindi invitémo i Veronesi a butàr un òcio a i laòri, giusto par farse un idea de cosa vol dir 320 mila euri spesi par le strade, tegnéndo conto che la gara l'è su 17 km. Par ci el 2 de dugno l'è a Verona, par tuto el giorno ghe sarà un bel casìn, quindi spostarse in auto no convién, magari una catapulta podarìa èssar utile par scavalcàr la çità. Al Stadio, Fiera e in çentro, par ci riesse a rivàrghe, gh'è i parchegi co' i bus che i va, avanti e indrio. Quindi da le 14 a le 17 tacàr la tilivision e vardàr la corsa comodi in poltrona, l'è la cosa méio da far. Par i pori ciclisti, no savémo se l'è stà previsto el cambio de bici in Corso Cavur con una Mòntan-baic, no se pol far i miracoli in un mese, la pavimentassión l'è quela che l'è, da tante aministrassioni..... Piera Rossi da Sant'Anbròso (03.05.2019)