LA RENA DOMILA - DAL 1999 EL SITO VERONESE DEI VERONESI IN VERONESE

Pochi i sà, che a Verona, e più precisamente a "l'àlbio" o tomba de Giulieta, gh'è anca el Museo de i Afreschi G.B. Cavalcaselle co' testimonianse dal X° al XVIII° secolo de l'arte a Verona. Opere uniche e càrghe de storia come quela de Bernardino India del '500, restaurà in questi mesi, grassie a un contributo de 20 mila euri de l'associassión Inner Wheel Club de Verona che l'à volù festegiàr cossìta i 200 ani de la nàssita del più grande divulgatór de l'arte veronese, el grande Cavalcaselle. Le "Alegorie de Verona, Rovigo e Treviso" (cm.257 x 223) i-era spenelà sora al muro del palasso Fiorio de la Seda comissionà dal màrcante Fiorio dei Flori 'ndóe gh'è l'atuàl Ponte Nóvo par capirse. Palasso butà zò nel 1891 par costruìr i murajoni de l'Adese dopo la piena del 1882. No gh'era solo le opere piturà su malta fresca del Bernardino sbregà dal muro e portà a i Musei Civici ma anca quele del più famoso Brusasorzi. Una costrussión che l'era 'na vera opera d'arte che parò l'è stà scancelà. Se noàntri no salvémo la nostra storia, ci ghe pensa? Ghe vorìa altre donassioni par salvàr quanto de belo gh'è a Verona, çità turistica e patrimonio U.N.E.S.C.O....Far un salto al Museo ghe ne val la pena quando g'avì un par de ore lìbare dal celulàr....... Giulia Cappelletti (07.05.2019)