LA RENA DOMILA - DAL 1999 EL SITO VERONESE DEI VERONESI IN VERONESE

I m’a insegnà, che, se gh’è de le regole, bison rispetarle anca se no le me piase o magari no i-è giuste par mi. In Piassa Erbe parò no l’è cossita co’ el regolamento su i banchéti. Multe da parte de i vigili i-è piovù in man de i “Piassaroti” che i fa presente come el Comùn no vol ‘scoltàr i so problemi e le so proposte par la piassa. Gh’è da dir, che in questi ani parò, anca el Comùn no g’avù grandi idee su come gestìrla situassion, ma el g’a messo nero su bianco de le regole. Quasi la metà de i banchéti no i-era in regola. Ci rispeta el regolamento pol catàrse che un banchéto tacà, che’l vende la stessa roba, el tegna verto dopo l’orario consentì o che’l se slarga de qualche metro o che’l taca via roba a l’ombrelon. Questo no l’è rispéto, e gnanca una sana concorensa, come véndar qualcosa che no l’è previsto. Sul regolamento parò, se podarìa far de meio, dando precedensa a quanto de bon gh’è ne la tera veronese, come el magnàr o quel fato co’ le propie mane da brai artesàni (artigiani) e soratuto che la sia in tema co’ i nostri usi e costumi, veronesi in primis poi veneti; difàti no se capisse la vendita de le màscare venessiane. No me par che a Venessia vegna vendù i “ricordi de Giulieta e Romeo”! Se vardémo, tanta roba da vestìr, te pol catàrla anca nei marcà de i rioni, con un par de difarense, el logo e la presensa par più giorni. Piassa Erbe el deve éssar el biliéto da visita par una çità turistica come la nostra. El regolamento el deve éssar sistemà ma anca rispetà, ghe sarà sempre qualcuno che no ghe piase le noe regole. Ghe vol ordine e no “strasse a la berlina” come diséa el bon Berto Barbarani, ‘Verghe un banchéto in una de le piasse più bele del mondo l’è un onòr e anca un privilegio, che pochi i pol pàrmétàrse. Lamentarse parché el Comùn te cava de i giorni par tegnér verto, me par massa. Anca mi come veronese g’o el sacrosanto dirìto de gustarme ogni tanto Piassa Erbe sensa banchéti. Se no te va ben le regole, te pol véndar la to roba giràndo nei marcà come un mòscolo 7 giorni su 7, par tuta la provinçia veronese.El bon senso el dovarìa éssar messo in primo piàn su tuti i fronti, ma quando le Istitussioni no le te ‘scolta, la solussion l’è far quel casso che se vol?....... Gino Perbe (13.05.2019)